(ඉන්දිකා රාමනායක)
සෞඛ්‍ය අමාත්‍යාංශයට බලහත්කාරයෙන් ඇතුළු වී එහි දේපළ වලට අනර්ථයක් සිදු කළැයි කියන සිද්ධියක් සම්බන්ධයෙන් රිමාන්ඩ් කර සිටින අන්තර් විශ්ව විද්‍යාලීය ශිෂ්‍ය බල මණ්ඩලයේ කැඳවුම්කරු ලහිරු චතුරංග වීරසේකර ඇතුළු ශිෂ්‍ය කි‍්‍රයාකාරි සමාජිකයින් පස්දෙනා ලබන 05 වැනි දා දක්වා යළි රිමාන්ඞ් කරන ලෙසට ප‍්‍රධාන මහේසත‍්‍රාත් දුලානි එස් වීරතුංග මෙනවිය අද (19) නියෝග කළාය.
ලහිරු වීරසේකරට අමතරව අන්තර් විශ්ව විද්‍යාල භික්ෂු බලමණ්ඩලයේ කැඳවුම්කරු ටැම්පිටියේ සුගතානන්ද හිමි, ෆසිසාන් අහමඞ්,දිනේෂ් මධුරංග, සහ දිමුත් ලක්ෂාන් යන අය රිමාන්ඩ් කෙරිණි.
දිනේෂ් මධුරංග, සහ දිමුත් ලක්ෂාන් නැමැති සැකකාර සිසුන් ඊයේ හදුනා ගැනීමේ පෙරට්ටුවකට ඉදිරිපත් කෙරුණු අතර සෞඛ්‍ය අමාත්‍යාශයේ ආරක්ෂක නිලධාරීන් ඇතුළු සාක්කිකරුවන්ට ඔවුන් දෙදෙනා හඳුනා ගැනීමට නොහැකි විය.
ඉකුත් (21) වැනි දා පස්වරුවේ කොළඹදී පැවති සයිටම් විරෝධී පාගමනින් අනතුරුව සෞඛ්‍ය අමාත්‍යාංශයට අයුතු ලෙස ඇතුළු වී එහි දේපල‍වලට රුපියල් ලක්ෂ 9 ට ආසන්න හානියක් සිදුකිරීම සම්බන්ධයෙන් සෞඛ්‍ය අමාත්‍යාංශයේ අතිරේක ලේකම් ආර් ඒ විජේසේකර මහතා මරදාන පොලිසියට කළ පැමිණිල්ලක් මත මොවුන් අත්අඩංගුවට ගෙන තිබුණි.
