අපේ සංගීත කණ්ඩායමට ජන සංගීතය ආශ්‍රයෙන් කරන නිර්මාණවලට කිසිම චෝදනාවක් එල්ලවෙලා නැහැ.
වර්තමානයේ ගීතයට ජන නාද රටා යොදාගනිමින් ජාත්‍යන්තරයට ගිය සංගීත කණ්ඩායමක් වන "සෙන්ටිග්‍රෙට්ස්"හි නියමුවෙකු වන තුසිත් නිරෝෂන් ජන සංගීතය නව නිර්මාණවලට යොදාගැනීම සම්බන්ධයෙන් අදහස් විමසුමට "සාරවිට" ආලින්දයට ගොඩවැදුණේ මෙලෙසිනි.
"අපේ මුල් අවධියේ තමයි ජන සංගීතය නිර්මාණයට යොදා ගත්තේ කියලා මම හිතනවා. මුල් කාලේ ඉරාජ් මෙය භාවිත කර තිබුණා. මම හිතනවා ඒ නිර්මාණය සාර්ථකයි කියලා. මේක අපේ දෙයක් විදේශ රටකට ගෙනයාම සඳහා කළ එක් උත්සාහයක් විදිහට දකින්න පුළුවන්. "මනුසත් කුලේ" වගේ නිර්මාණ දකින්න පුළුවන්. මම ජන සංගීතය ගැන දන්නෙ නැහැ, ඉස්කෝලෙදි බොහෝදුරට සංගීතය හදාරලා තියෙනවා. නමුත් මං මේ ජන සංගීතය භාවිත කරලා ගැටලුවක් ඇති වුණොත්, එය මට වගේම මගේ කණ්ඩායමටත් බලපානවා. මම ඒ නිසා කළේ සෞන්දර්ය විශ්වවිද්‍යාලයේ හිටිය ධම්මිකා, තුෂාරි කියන අක්කලා දෙන්නගෙන් උපදෙස් ලබාගෙන නිර්මාණය සිදුකළ එක. තව තවත් සංගීත කණ්ඩායම් නිර්මාණය වුණා. ඒ අයත් භාවිත කළේ ජන සංගීතය. මං හිතන්නෑ දැන් ඒක කියනවා කියලා. වාසනාවකට අපේ සංගීත කණ්ඩායමට ජන සංගීතය ආශ්‍රයෙන් කරන නිර්මාණවලට කිසිම චෝදනාවක් එල්ලවෙලා නැහැ."
