(රෝෂන් තුෂාර)
දෙස් විදෙස් ස්ථානාපති කාර්යාල ඇතුළු මෙරට ජාතික වැදගත්කමින් යුත් මර්මස්ථාන වල ඡායාරූප තබා ගනිමින් ඉතාලි තානාපති කාර්යාලය ඡායාරූපගත කිරීමේදී අත් අඩංගුවට පත් සැකකරු ලබන 11 දින දක්වා රක්ෂිත බන්ධනාගාර ගත කිරීමට කොළඹ අතිරේක මහේස්ත්‍රාත් මංජුල රත්නායක මහතා නියෝග කළේය.
ඉතාලි තානාපති කාර්යාලය ඡායාරූපගත කර සිටිමින් සිටියදී කුරුඳුවත්ත පොලිසිය මගින් අත්අඩංගුවට ගත් මිනුවන්ගොඩ යාගොඩ මුල්ලේ පදිංචි ඒ. ටිරාන් තුෂාන් කවිරත්න(54) නැමති සැකකරු මෙසේ රක්ෂිත බන්ධනාගාර ගත කළේය.
සැකකරු ජාතික ආරක්ෂාවට තර්ජනය වන අයුරින් අන්තවාදී ක්‍රියාවන් සිදු කිරීමේ සැකයට අත්අඩංගුවට ගත් බවත් ඒ අනුව ඉදිරි විමර්ශන කටයුතු සිදු කරන බවත් පොලිසිය අධිකරණයට කරුණු ඉදිරිපත් කරමින් සඳහන් කළේය.
සැකකරු විසින් එක්රැස් කළේ යැයි කියන තොරතුරු පොතක් සහ ඡායාරූප සාක්ෂි ලේඛන ලෙස අධිකරණයට ඉදිරිපත් කර ඇති පොලිසිය සාක්ෂි සම්පින්ඩන වාර්තාවක්ද අධිකරණයට ඉදිරිපත් කරමින් සැකකරු සම්බන්ධයෙන් ඉදිරි විමර්ශන කටයුතු සිදුකිරීමට ඇති එයින් රක්ෂිත බන්ධනාගාර ගත කරන ලෙස ඉල්ලා ඇත .
සැකකරු කිසියම් ත්‍රස්ත සංවිධානයක් හා සම්බන්ධව කටයුතු කරන්නේ ද යන්න පිළිබඳව විමර්ශන සිදු කරන බවද සඳහන් කළේය.
පොලිසිය ඉදිරිපත් කළ කරුණු සලකා බැලූ මහේස්ත්‍රාත්වරයා සැකකරු සම්බන්ධයෙන් විමර්ශනය කර කඩිනමින් අධිකරණයට කරුණු ඉදිරිපත් කරන ලෙසද සැකකරු ලබන 11 වැනි දින ප්‍රධාන මහේස්ත්‍රාත්වරයා වෙත යොමු කරන ලෙසද නියෝග කළේය.
