(සිතුම් චතුරංග)
මන්නාරම, වෙඩිතලතිව් යුද හමුදා පුහුණු කඳවුරේ පුහුණුව ලබන සෙබළුන් අතර උණ රෝගයක් පැතිරයාම හේතුවෙන් එම කඳවුරේ සෙබළුන් පිරිසක් කඳවුර තුළ නිරෝධායනය කිරීමට කටයුතු කොට ඇතැයි වන්නි ආරක්ෂක අංශය පවසයි.
කඳවුරේ සෙබළුන් 20 කට ආසන්න ප්‍රමාණයකට ඉකුත් දා යම් උණ රෝගී තත්වයක් වැළදී ඇති බවත් අසාධ්‍ය වූ එක් සෙබලෙකු අංගොඩ උණ රෝහල වෙත ඇතුලත් කොට ඇති බවත් පැවසීය.
උණ රෝගයට ගොදුරු වු තවත් සෙබළුන් පිරිසක් රෝහල්ගත කිරීමට පියවර ගෙන ඇති බවත්, කඳවුර තුළ සිටින තවත් සෙබළුන් 500 කට ආසන්න ප්‍රමාණයක් සෞඛ්‍ය අංශ උපදෙස් මත කඳවුර තුළම නිරෝධායනය කිරීමට පියවර ගෙන ඇති බවත් වන්නි ආරක්ෂක අංශ පැවසීය.
පැතිර යන උණ රෝග තත්වය නිශ්චිතව හදුනාගැනීමට පරීක්ෂණාගාර වෙත යොමුකොට ඇති අතර දින හතරක පමණ කාලයක සිට උණ රෝගය පැතිරීම සිදුව ඇති බවට මුලිකව පරීක්ෂණ වලදී අනාවරණය වී ඇති බවද මන්නාරම ප්‍රාදේශිය සෞඛ්‍ය වෛද්‍ය නිලධාරී කාර්යාලය පවසයි.
මන්නාරම සෞඛ්‍ය වෛද්‍ය නිලධාරී කාර්යාලය වැඩිදුරටත් පැවසූයේ රෝගී තත්වය පාලනයට ගත හැකි සියළු ක්‍රියාමාර්ග එම කඳවුරේ යුද හමුදා සෞඛ්‍ය අංශ සහ සෞඛ්‍ය අංශ පියවරගෙන ඇති බවයි.
