ඇමැති ජෝන් සෙනවිරත්න වගකීම් රහිතව කතා කරන බවත් ඔහුගේ කට ආණ්ඩුව පැත්තේ වුවත් හිත වෙන පැත්තක බවත් ඇමැති ෆීල්ඩ් මාෂල් ෆොන්සේකා මහනුවරදී පැවසීය.
මහනුවර දී දළඳා වහන්සේ වැඳපුදා මල්වතු අස්ගිරි මහානාහිමිවරුන් බැහැ දැකීමෙන් පසු ෆොන්සේකා මහතා මෙසේ ද පැවසීය
‘මේ රටේ හැට දෙලක්ෂයක් ජනතාව මහා පෙරළියක් කර අලුත් අණ්ඩුවක් ඇති කළා. ඒ ආණ්ඩුවට එක් වී සිටින ඇමැති සෙනවිරත්න හදන්නේ ජනතාව ප්‍රතික්ෂේප කළ අය ප්‍රබලයන් කර ඉදිරියට ගෙන ඒමට සැරසීමයි. ඔහුට තනිවම ඡන්දයකට එන්නට බෑ. කූඩුල්ලකු සේ කාගේ හරි ඇඟේ එල්ලී ඡන්දයට එන්නැයි ඔහු හදන්නේ.’
ප්‍රශ්නය : ඔබ එක්සත් ජාතික පක්ෂයට එකතු වෙනවාද ?
උත්තරය : දැන් එක්සත් ජාතික පක්ෂය සමඟ අපේ පක්ෂය සන්ධාන ගත වී සිටිනවා. පලාත් පාලන ඡන්ද ඇතුළු ජන්ද වලට එජාපය සමඟ මුහුණ දෙනවා
ප්‍රශ්නය : මුදල් ඇමැති රවී කරුණානායකට එරෙහිව විශ්වාසභංග යෝජනාවක් ආවොත් ඊට මුහුණ දෙන්න සූදානම්ද?
උත්තරය : ඔහු බදු පනවන්නේ ඔහුගේ වාසියට නොවේ. රට ණය උගුලෙන් බේරා ගන්නයි. ඔහු ක්‍රියා කරන්නේ සත් භාවයෙන්. ඔය විශ්වාසභංගයේ අරමුණ දේශපාලන වාසි ගැනීමයි. අපි එය පරාජය කරනවා. කල්ලි ගැසී සිටින 30 කට 40 කට රජය පෙරලන්න බෑ.
ප්‍රශ්නය : ඔබ ප්‍රාදේශීය සංවර්ධන ඇමැති ලෙස මොනවද කරන්නේ?
උත්තරය : ආයෝජකයන් මගින් මෙරට විරැකියාවට පිළිතුරක් දිය හැකි ක්‍රමයක් අනුගමනය කරනවා.
ප්‍රශ්නය : ඇවන්ගාඩ් මැරිටයිම් ආරක්ෂක සමාගම ගැන ඔබේ ස්ථාවරය කුමක් ද ?
උත්තරය : මම ඒ සමාගමට එරෙහින කතා කළා. ඉදිරියටත් එහෙමයි.මෑත දී රජයේ ප්‍රභූවරයෙකුගේ විවාහ මංගල්‍යට ප්‍රධාන මෙසේ පුටු 2 ක් තිබ්බා ඉන් එකක් ඇවන්ගාඩ් අධිපති නිශ්සංක සේනාධිපතිටයි. අනික ඔහුගේ බිරියටයි. එහෙත් එහෙම කරන එම ප්‍රභූවරයා කියන්නේ ඒ මිනිහා තමා නාදුනන බවයි.
