වර්තමානයේ ජනප්‍රිය ගායන ශිල්පියෙකු මෙන්ම රියැලිටි තරුවක් ලෙස සංඛ දිනෙත් හැඳින්වීම වරදක් නොවේ. සංගීත අධ්‍යයනය සිදුකරමින් එකිනෙකට වෙනස් වූ නිර්මාණ කිරීමට තැත් කරන සංඛ, වර්තමාන ගීතය හා කලාකරුවන් පිළිබඳ කළ විමසුමකදී මෙලෙස සඳහන් කළේය.
"මේ වෙනකොට මේ රට ඇතුළෙ සංගීත කර්මාන්තය තුළ අර්බුදයක් තියෙනවා. තමන්ගෙ රසයට අහන්න ඕන ගීතයක් තියෙනවා නම්, ඒ ගීතය කොහෙන්ද අහන්නෙ කියන එක ගැටලුවක් බවට පත්වෙලා. තෝරගන්න ඕන දේ සම්බන්ධයෙන් ලොකු අර්බුදයක් තියෙනවා. එයට වගකිව යුත්තේ ලංකාවෙ මාධ්‍යම තමයි. මේ තුළ වාණිජකරණය ලොකුවට තිබෙනවා.
කර්මාන්තයක් දියුණු වෙන්න වාණිජකරණය අවශ්‍යයි. එය මිනිසුන්ට බලපානවා නම් එතැන ලොකු ප්‍රශ්නයක් තියෙනවා. අහන්න පුළුවන් පිළිවෙළක්, විදිහක් තියෙනවා.
ජේම්ස් කැමරන් "ඇවෙටර්" කියලා චිත්‍රපටයක් කළා. ඒත් ඒ රටේ මිනිස්සු ඒ වගේ චිත්‍රපට කරන්න ගියේ නැහැ. ලංකාවෙ "අබා" කියලා චිත්‍රපටයක් හැදුණා. ඊට පස්සෙ ඒ වගෙ චිත්‍රපට දිගටම හැදුණා. ලංකාවෙ නිර්මාණයක් කළාම ඒකම කොපි කරන සෙට් එකක් ඉන්නවා. මම කියන්නෙ අපි මියුසික් කරන විදිහට එහෙම වෙන්න ඕන නැහැ. අපේ ප්‍රකාශනය තමයි ඉදිරිපත් කරන්න ඕන. ඒ වගේම ඒ ප්‍රකාශනය හරි අවංක වෙන්න ඕන. ලංකාවෙ බහුතරයක් අවංක නෑනේ. කලාකරුවෙක් වෙන්න මුලින්ම තියෙන්න ඕන අවංකකම. අද ඒක නැහැ.
අවංක ප්‍රකාශයක් තියෙන්න ඕන. ඇයි මම මේ දේ කරන්නේ කියන අවබෝධය තියෙන්න ඕන. ඒකයි වැදගත්. මිය යන මොහොතේ ගත කළ ජීවිතය ගැන සතුටු වෙන්න පුළුවන් නම්, ඒක තමයි හොඳම දේ. අපේ රටේ සංගීත අධ්‍යාපනය අතිශය යාන්ත්‍රිකයි. ප්‍රා‘යෝගිකරණයට වැඩපිළිවෙළක් තිබිය යුතුයි. කලාකරුවෙක් හැදෙන සිස්ටම් එකක් මේ රටේ නැහැ. අපි ලෑස්ති ඒ දේ කරන්න."
