(අංජුල මහික වීරරත්න)
1. අග්‍රාමාත්‍ය සහ අධ්‍යාපන ,උසස් අධ්‍යාපන සහ වෘත්තීය අධ්‍යාපන අමාත්‍ය ආචාර්ය හරිනි අමරසූරිය මෙනවිය:-
කොල්ලුපිටිය බිෂොප් විද්‍යාලයෙන් මූලික අධ්‍යාපනය ලබූ අමරසූරිය මෙනවිය සමාජ විද්‍යා පිළිබඳ උපාධිය දිල්ලි විශ්ව විද්‍යාලයෙන්ද මානව විද්‍යා හා සංවර්ධන අධ්‍යයන පිළිබඳ ශාස්ත්‍රවේදී උපාධිය ඕස්ට්‍රේයාවේ සිඩ්නි නුවර මැකවරි විශ්ව විද්‍යාලයෙන් ද සමාජ මානව විද්‍යා, අන්තර්ජාතික සෞඛ්‍ය හා සංවර්ධන අධ්‍යයන සම්බන්ධ ආචාර්ය උපාධිය එඩිම්බරෝහි queen margard විශ්ව විද්‍යාලයෙන්ද ලබාගෙන තිබේ.
ශ්‍රී ලංකා විවෘත විශ්ව විද්‍යාලයේ සමාජ විද්‍යා අධ්‍යයන අංශයේ ජ්‍යෙෂ්ඨ කථිකාචාර්ය වරියක ලෙස සේවය කර ඇති ඇය 2020 වර්ෂයේ ජාතික ජන බලවේගය නියෝජනය කරමින් ජාතික ලැයිස්තුවෙන් පාර්ලිමේන්තු මන්ත්‍රීවරියක ලෙස පත් වූවාය.
2. විදේශ කටයුතු විදේශ රැකියා සහ සංචාරක අමාත්‍ය විජිත හේරත් මහතා:-
පාර්ලිමේන්තු මැතිවරණ ඉතිහාසයේ 7,16,715 ක් වූ වැඩිම ඡන්ද සංඛ්‍යාවක් ලබාගත් විජිත හේරත් මහතා කැලණිය විශ්ව විද්‍යාලයේ විද්‍යාවේදී උපාධිධාරියෙකි.
ජනතා විමුක්ති පෙරමුණේ පුර්ණ කාලීන දේශපාලනයෙහි නිරතව සිටින විජිත හේරත් මහතා 2000 වර්ෂයේ සිට අඛණ්ඩව පාර්ලිමේන්තුව නියෝජනය කරන ජනතා නියෝජිතයෙකි.
3. කම්කරු අමාත්‍ය මහාචාර්ය අනිල් ජයන්ත ප්‍රනාන්දු මහතා:-
වරලත් ගණකාධිකාරී, සහතිකලත් කළමනාකරණ ගණකාධිකාරීවරයකු වන අතර ව්‍යාපාර පිළිබඳ උපාධිධාරියෙකි.
ජාතික ජන බලවේගය ජාතික විධායක සභික කමිටු සාමාජිකයකු වන අනිල් ජයන්ත මහතා එහි ආර්ථීක කවුන්සලයේ සාමාජිකයකු ලෙසද කටයුතු කරයි.
4. සෞඛ්‍ය සහ ජනමාධ්‍ය අමාත්‍ය වෛද්‍ය නලින්ද ජයතිස්ස මහතා:-
පොලේගොඩ මහ විද්‍යාලයේ සහ මතුගම සී.ඩබ්ලිව් .ඩබ්ලිව් .කන්නංගර මධ්‍ය මහ විද්‍යාලයේ ආදි සිසුවකු වූ නලින්ද ජයතිස්ස මහතා ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨයට ඇතුළත් වෛද්‍ය පීඨ ශිෂ්‍ය සංගමයේ සභාපති හා වෛද්‍ය පීඨ ශිෂ්‍ය ක්‍රියාකාරී කමිටුවේ කැඳවුම්කරු ලෙස ද කටයුතු කළේය.
වෛද්‍යවරයෙකු වශයෙන් සේවය කරමින් සිටියදී 2007 වසරේදී රාජ්‍ය සේවයෙන් ඉවත්ව පූර්ණ කාලීනව දේශපාලනයට එක් විය . 2009 වසරේදී බස්නාහිර පළාත් සභා මන්ත්‍රීවරයකු ලෙස පත්වූ ඔහු 2014 වසරේදී දෙවන වරටත් පළාත් සභාවට පත් විය.
2015 පාර්ලිමේන්තු මහ මැතිවරණයේදී කළුතර දිස්ත්‍රික්කය නියෝජනය කරමින් ප්‍රථම වරට පාර්ලිමේන්තුවට තේරී පත් විය.
5. කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා:-
මාතර මහ මැතිවරණ ඉතිහාසයේ අපේක්ෂකයකු ලබා ගත් ඉහළම මනාප ඡන්ද සංඛ්‍යාව වන 249,251 ක් හිමි කරගෙන මෙවර පාර්ලිමේන්තුවට තේරී පත් වූ සුනිල් හඳුන්නෙත්ති මහතා හිටපු පාර්ලිමේන්තු මන්ත්‍රීවරයකු ද වේ. ඔහු කෝප් කමිටුවේ හිටපු සභාපතිවරයෙකි.
කොටපොල මහා විද්‍යාලයේ හා අම්බලන්ගොඩ ධර්මාශෝක විද්‍යාලයේ ආදි ශිෂ්‍යයකු වූ හඳුන්නෙත්ති මහතා ශ්‍රී ජයවර්ධනපුර විශ්ව විද්‍යාලයේ කළමනා කරණ විශේෂවේදී උපාධිධරයෙකි. එමෙන්ම, ඔහු ජාතික ජන බලවේගයේ විධායක කමිටු සාමාජිකයෙකි.
6. කාන්තා සහ ළමා කටයුතු අමාත්‍යය සරෝජා පෝල්රාජ් මහත්මිය:-
මාතර දිස්ත්‍රික්කයෙන් දෙවැනි ස්ථානයට වැඩීම මනාප සංඛ්‍යාව වන 148,379 ක් හිමි කරගෙන පාර්ලිමේන්තුවට තේරී පත් වූ සරෝජා පෝල්රාජ් මහත්මිය මාතර ශාන්ත මරියා කන්‍යාරාමයේ ජාතික ජන ගුරුවරියකි.
ජාතික ජන බලවේගයේ විධායක කමිටු සාමාජිකාවක වන ඇය, අයිතීන් උදෙසා කාන්තාවෝ' සංවිධානයේ සභාපතිනිය ලෙසත්, ප්‍රගතිශීලී ස්ත්‍රී එකමුතුවේ' ජාතික කමිටු සාමාජිකාවක ලෙසත් කටයුතු කරන්නීය. කැලණිය විශ්ව විද්‍යාලයේ පරිවර්තන හා අර්ථ නිරූපණ ඩිප්ලෝමාධාරිනියක වූ සරෝජා මහත්මිය, රුහුණ විශ්ව විද්‍යාලයේ බාහිර කථිකාචාරිනියක ලෙස ද සේවය කරන්නීය.
7. මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල මහතා:-
කොළඹ විශ්ව විද්‍යාලයේ සමාජ විද්‍යාව පිළිබඳ ගෞරව උපාධියත්, ජයවර්ධනපුර විශ්ව විද්‍යාලයේ අපරාධ විද්‍යාව හා අපරාධ යුක්තිය පිළිබඳ පශ්චාත් උපාධි ඩිප්ලෝමාවත්, කැලණි විශ්ව විද්‍යාලයේ සමාජ විද්‍යාපති උපාධියත් හදාරා ඇති විජේපාල මහතා අධිකරණ හා නීති ප්‍රතිසංස්කරණ අමාත්‍යාංශය යටතේ වූ හානිපූර්ණය සඳහා වන කාර්ය මණ්ඩලයේ අධ්‍යක්ෂ ජනරාල්වරයා ලෙස කටයුතු කළේය.
2004 වර්ෂයේ අනුර කුමාර දිසානායක මහතා කෘෂිකර්ම අමාත්‍යවරයාව සිටියදී ඔහුගේ පෞද්ගලික ලේකම්වරයා ලෙසත් ජනාධිපතිවරයා ලෙස පත් වූ පසු ද පුද්ගලික ලේකම්වරයා ලෙසත් කටයුතු කළ විජේපාල මහතා පූර්ණ කාලීනව දේශපාලනයේ නිරත ජාතික ජන බලවේගයේ ජාතික විධායක සභිකයෙකු ලෙසත් කටයුතු කරන්නෙකි. කුරුණෑගල උස්ගල සියඹලංගමුව තිස්ස මහා විද්‍යාලයෙන් හා බළල්ල ජාතික පාසලෙන් මූලික අධ්‍යාපනය ලැබූ ඔහුට ජාතික විද්වත් සංවිධානයේ ජාතික සංවිධායකවරයා ලෙසද කටයුතු කරයි.
8. බුද්ධ ශාසන, ආගමික සහ සංස්කෘතික කටයුතු අමාත්‍ය මහාචාර්ය හිනිදුම සුනිල් සෙනෙවි මහතා:-
වසර විසිපහක විශ්ව විද්‍යාලයීය සේවයක් ඇති හිනිදුම සුනිල් සෙනෙවි මහතා සබරගමු විශ්ව විද්‍යාලයේ භාෂා අධ්‍යයන අංශයේ සේවය කළ මහාචාර්ය වරයෙකි. ඔහු ජයවර්ධනපුර 1988 විශ්ව විද්‍යාලයෙන් ශාස්ත්‍රවේදි උපාධිය ලැබීය. 2003 වර්ෂයේදී කැලණිය විශ්ව විද්‍යාලයෙන් දර්ශනපති උපාධිය ද, පේරාදෙණිය විශ්ව විද්‍යාලයේ 2013 දී දර්ශනසූරී උපාධිය ද හිමි කරගත්තේය. දේශීය සහ විදේශීය පර්යේෂණ රැසක් නියෝජනය කර ඇති ඔහු පර්යේෂණ පත්‍රිකා රැසක් ද පළ කර ඇත. ග්‍රන්ථ සහ ලිපි කතුවරයෙකි. සාහිත්‍ය විචාරකයෙකි. දේශකයෙකි.
තිරනාටක රචකයෙකි. සම්මාන උළෙල ජුරි සභිකයෙකි. මනාප 76,505 ක් ලබා ගැනීමට සමත් විය.
9. වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය වසන්ත සමරසිංහ මහතා:-
මෙවර මහ මැතිවරණයේදී ජාතික ජන බලවේගයෙන් මන්ත්‍රීධුර අපේක්ෂකයෙකු ලෙස අනුරාධපුර දිස්ත්‍රික්කයේ කණ්ඩායම් නායකයා ලෙසට තරග කළ හේරත් මුදියන්සේලාගේ වසන්ත සමරසිංහ මහතා මනාප ජන්ද 2,51,639 ක් ලබා ගත්තේය.
තඹුත්තේගමදී උපත ලැබූ වසන්ත සමරසිංහ මහතා තඹුත්තේගම ප්‍රාථමික විද්‍යාලයෙන් මූලික අධ්‍යාපනය ලබා ඉන්පසුව තඹුත්තේගම මධ්‍ය මහා විද්‍යාලයට ඇතුළත්ව උසස් පෙළ වාණිජ අංශයෙන් වැඩිම ලකුණු හිමි කර ගනිමින් කැළණිය විශ්ව විද්‍යාලයට ඇතුළත් විය.
කැළණිය විශ්ව විද්‍යාලයේ මහා ශිෂ්‍ය සංගමයේ සභාපතිවරයා ලෙසත් අන්තර් විශ්ව විද්‍යාලීය ශිෂ්‍ය සංගමයේ වැඩබලන කැඳවුම්කරු ලෙසටත් ඔහු කටයුතු කළේය.ඔහු ව්‍යාපාර පරිපාලන ගෞවර උපාධිධරයෙකි.
ජනතා විමුක්ති පෙරමුණේ සෘජු දේශපාලන ක්‍රියාකාරිකයෙකු වූ ඔහු පසුව අන්තර් සමාගම් සේවක සංගමයේ සභාපතිවරයා ලෙසත් ජාතික වෘත්තීය සමිති මධ්‍යස්ථානයේ ජාතික සංවිධායකවරයා ලෙසත් " දූෂණ විරෝධි හඬ " සංවිධානයේ කැඳවුම්කරු ලෙසත් මේ වන විටත් කටයුතු කරමින් සිටී.
10. වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න මහතා:-
බදුල්ල' රිදීමාලියද්දේ උපත ලද ජාතික ජනබලවේගය බදුල්ල දිස්ත්‍රික් කණ්ඩායම් නායක සමන්ත විද්‍යාරත්න මහතා මෙවර පාර්ලිමේන්තු මැතිවරණයේ දි බදුල්ල දිස්ත්‍රික්කයේ වැඩිම මනාප ලබා ගත් (208,247) අපේක්ෂකයාය.
ඌව පළාත් සභාවේ හිටපු මන්ත්‍රීවරයකු මෙන්ම පාර්ලිමේන්තු වේ හිටපු සංස්කෘතික කටයුතු, ජාතික උරුමයන් පිළිබඳ නියෝජ්‍ය ඇමතිවරයකු ලෙසත් කටයුතු කළ ඔහු කැලණිය විශ්ව විද්‍යාලයේ ආර්ථික විද්‍යාව පිළිබඳව විශේෂවේදි උපාධිධාරියෙකි.
11. කෘෂිකර්ම පශු සම්පත් ඉඩම් හා වාරිමාර්ග අමාත්‍ය කේ.ඩී ලාල් කාන්ත මහතා:-
ජාතික ජන බලවේගයේ මහනුවර දිස්ත්‍රික් කණ්ඩායමේ නායකත්වය දරන කේ.ඩී ලල් කාන්ත මහතා මෙරට දේශපාලයේ දීර්ඝකාලීන අත්දැකීම් සහිත නායකයෙකි. වෘත්තිය සමිති මධ්‍යස්ථානයේ සභාපතිවරයා වශයෙන් මෙන්ම ජනතා විමුක්ති පෙරමුණේ දේශපාලන මණ්ඩල සහික සහ ජාතික ජන බලවේගයේ විධායක කමිටු සාමාජික ලෙස කටයුතු කරන ලාල් කාන්ත මහතා මෙවර මහ මැතිවරණය සඳහා මහනුවර දිස්ත්‍රික්කයෙන් තරග කර මනාප 3,16,951 ක් ලබා ගත්තේය.
12. විද්‍ය හා තාක්ෂණ අමාත්‍ය ජ්‍යෙෂ්ඨ මහාචාර්ය විශේෂඥ වෛද්‍ය ක්‍රිෂාන්ත අබේසේන මහතා:-
ක්‍රිස්තියානි අධ්‍යාපනය පිළිබඳ ශාස්ත්‍රවේදී උපාධිය, බෞද්ධ අධ්‍යාපනය පිළිබඳ ශාස්ත්‍රවේදී උපාධිය හා ජාත්‍යන්තර සබඳතා පිළිබඳ ශාස්ත්‍රපති උපාධිය හිමිකරගෙන ඇති ක්‍රිෂාන්ත අබේසේන මහතා ‚ ජාතික ජනබලවේගයේ සෞඛ්‍ය ප්‍රතිපත්ති සම්පාදක කමිටුවේ ප්‍රධානියා ලෙසද කටයුතු කරයි.
විශ්ව විද්‍යාල වෛද්‍ය පීඨ ක්‍රියාකාරී කමිටුවේ කැඳවුම්කරු ලෙසද අබේසේන මහතා කටයුතු කර ඇත.
13. පරිසර අමාත්‍ය වෛද්‍ය ධම්මික පටබැඳිගේ මහතා:-
කෑගල්ල අඹන්පිටිය ග්‍රාමයේ උපන් වෛද්‍ය හෙට්ටිතන්ත්‍රි පටබැඳිගේ ධම්මික පටබැඳිගේ මහතා කොළඹ ආනන්ද විද්‍යාලයේ ආදි ශිෂ්‍යයෙකි. කොළඹ වෛද්‍ය පීඨයට ඇතුළත්ව වෛද්‍ය උපාධිය ලබා ඇති ධම්මික පටබැඳිගේ මහතා කෙටි කාලයක් වෛද්‍ය වෘත්තියේ නියැලී, පසුව වෛද්‍ය වෘත්තියට සමුදී පූර්ණ කාලීනව ජනතා විමුක්ති පෙරමුණෙන් දේශපාලනයට පිවිස තිබේ.
ජාතික ජන බලවේගයේ විධායක සභිකයකු ලෙසත්, කෑගල්ල දිස්ත්‍රික් සංවිධායකවරයා ලෙසත් කටයුතු කරන ධම්මික පටබැඳිගේ මහතා පසුගිය මහා මැතිවරණයේදී කෑගල්ල දිස්ත්‍රික්කයේ මනාප ඡන්ද 186,409 ක් ලබාගෙන මනාප ලැයිස්තුවේ පළමු තැන හිමි කරගෙන තිබුණි.
14. තරුණ කටයුතු හා ක්‍රීඩා අමාත්‍ය සුනිල් කුමාර ගමගේ මහතා:-
වෘත්තියෙන් වරලත් ගණකාධිකාරීවරයකු වන සුනිල් කුමාර ගමගේ මහතා ජාතික ජන බලවේගයේ ජාතික ලැයිස්තුවෙන් පාර්ලිමේන්තුවට තේරී පත්විය.
15. නාගරික සංවර්ධන, ඉදිකිරීම් හා නිවාස අමාත්‍ය අනුර කරුණාතිලක මහතා:-
කැලණිය විශ්ව විද්‍යාලයේ ගණිත අංශයේ ජ්‍යෙෂ්ඨ කථිකාචාර්යවරයෙක් වන කරුණාතිලක මහතා ජාතික ජන බලවේගයේ ප්‍රතිපත්ති සම්පාදක කමිටුවේ සාමාජිකයෙකි.
16. ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකරන් මහතා:-
පාර්ලිමේන්තුවේ හිටපු නියෝජ්‍ය කාරක සභා සභාපතිවරයකු වන රාමලිංගම් මහතා ජාතික ජන බලවේගයේ යාපනය දිස්ත්‍රික් සංවිධායකවරයා වෙි.
17. රාජ්‍ය පරිපාලන පළාත් සභා සහ පළාත් පාලන අමාත්‍ය මහාචාර්ය චන්දන අබේරත්න මහතා:-
කැලණිය විශ්වවිද්‍යාලයේ උපාධිධරියකු හෝ චන්දන අබේරත්න මහතා මේවන විට කැලණිය විශ්වවිද්‍යාලයේ ඉතිහාස අධ්‍යයන අංශයේ මහාචාර්යවරයා ලෙස කටයුතු කරයි.
18. අධිකරණ හා ජාතික ඒකාබද්ධතා අමාත්‍ය නීතීඥ හර්ෂණ නානායක්කාර මහතා :-
1997 වසරේ එංගලන්තයේ ෂෙෆීල්ඩ් විශ්ව විද්‍යාලයෙන් නීති ගෞරව උපාධිය ලබාගෙන ඇත.
1998 වසරේ දී එංගලන්තයේ හි Lincoln's Inn බැරිස්ටර් වරයකු ලෙස කැඳවුම් ලබා තිබේ. 1994 වසරේ දී ශ්‍රී ලංකාවේ නීතිඥවරයෙකු ලෙස දිවුරුම් දී නීතිඥ වෘත්තියේ නියැලෙයි.
2000 - 2004 කාලය තුළ ඔහු රජයේ අධිනීතිඥවරයෙක් ලෙස ද කටයුතු කර ඇත.
19. ග්‍රාමීය සංවර්ධන සමාජ ආරක්ෂණ හා ප්‍රජා සවිබල ගැන්වීම් අමාත්‍ය මහාචාර්ය උපාලි පන්නිලගේ මහතා :-
රුහුණු විශ්ව විද්‍යාලයේ මානව ශාස්ත්‍ර හා සමාජීය විද්‍යා පීඨයේ හිටපු පීඨාධිපතිවරයායි. ඔහු ජාතික ජන බලවේගයේ ප්‍රතිපත්ති සම්පාදක කමිටුවේ සාමාජිකයෙකි.
20. ප්‍රවාහන මහා මාර්ග වරාය හා සිවිල් ගුවන්සේවා අමාත්‍ය බිමල් රත්නායක මහතා:-
මොරටුව විශ්වවිද්‍යාලයේ උපාධිධාරියෙකි. ඔහු 2015 වසරේ දී පාර්ලිමේන්තුවේ මන්ත්‍රීවරයෙක් ලෙස කටයුතු කළේය. ජනතා විමුක්ති පෙරමුණේ ජාතික සංවිධායක ලෙස කටයුතු කරයි.
21. බලශක්ති අමාත්‍ය කුමාර ජයකොඩි මහතා:-
පේරාදෙණිය විශ්ව විද්‍යාලයේ ඉංජිනේරු උපාධිධරයකු වන කුමාර ජයකොඩි මහතා ඉංජිනේරුවකු මෙන්ම ව්‍යාපෘති කළමනාකරුවෙකි.ජාතික ජන බලවේගයේ ජාතික විධායක සභිකයෙකි.
