යුද අපරාධ අධිකරණයක් පිහිටුවීම ආදී කරුණුවලට හිටපු ජනාධිපති මහින්ද රාජපක්ෂ ප්‍රමුඛ සන්ධාන ආණ්ඩුව එක්සත් ජාතීන්ගේ සංවිධානයට පොරොන්දු වූ බව ඔප්පු කළහොත් තමා පාර්ලිමේන්තු මන්ත්‍රී ධුරයෙන් ඉවත් බව කෙහෙළිය රඹුක්වැල්ල මහතා අද (7) කීවේය.
බැන් කි මූන් මහතා 2009 වසරේදී ශ්‍රී ලංකාවේ සංචාරයක නිරත වී රජයත් එක්සත් ජාතීන්ගේ මහ ලේකම්වරයාත් ඒකාබද්ධ මාධ්‍ය නිවේදනයක් නිකුත් කළ අවස්ථාවේදී යුද අපරාධ අධිකරණයක් පිහිටුවීම, මානව හිමිකම් උල්ලංඝනය වීම සම්බන්ධයෙන් සොයා බලන බවට මහින්ද රාජපක්ෂ ජනාධිපතිවරයා ප්‍රමුඛ ආණ්ඩුව පොරොන්දු වූ බවට අගමැති රනිල් වික්‍රමසිංහ හා විදේශ අමාත්‍ය මංගල සමරවීර මහත්වරුන් ප්‍රමුඛ වත්මන් ආණ්ඩුව කරන චෝදනාව සම්පූර්ණයෙන් ප්‍රතික්ෂේප කරන බව ද රඹුක්වැල්ල මහතා පැවසීය.
වත්මන් දේශපාලන තත්ත්වය දැනුම් දීම සඳහා පාර්ලිමේන්තු සංකීර්ණයේ අද (7) පැවැති මාධ්‍ය හමුවේදී අදහස් දක්වමින් කෙහෙළිය රඹුක්වැල්ල මහතා එම කරුණු කීය.
යුද්ධය අවසන් වී දින දෙකකට පසු 2009 වසරේ මැයි මාසයේදී එක්සත් ජාතීන්ගේ මහලේකම් බැන් කි මූන් මෙරට සංචාරයක නිරත වූ බවත් එහිදි ඔහු පෙන්වාදුන් දුන් කරුණු කෙරෙහි අවධානය යොමු කරන බව කීවද යුද අපරාධ අධිකරණයක් පිහිටුවන බවට කිසිදු අවස්ථාවකදී පොරොන්දු නොවූ බව ද රඹුක්වැල්ල මහතා පැවැසීය.
රටක ජාතික ආරක්ෂාව සම්බන්ධයෙන් තීරණ ගැනීමට හෝ අදහස් දැක්වීමට එක්සත් ජාතීන්ගේ මහ ලේකම්වරයාට අයිතියක් නැතැයි ද ඔහු එහිදි පෙන්වාදුන්නේය.
