(ටී.කේ.ජී.කපිල )
කොකේන් මත්ද්‍රව්‍ය තොගයක් ගුලි වශයෙන් සකස් කර , ඒවා ගිල දමා පැමිණි සියරාලියෝන් ජාතිකයෙකු කටුනායක ගුවන් තොටුපොළ පැමිණීමේ පර්යන්තයේ , කිසිවක් ප්‍රකාශ කිරීමට නොමැති " හරිත මාවත " ඔස්සේ ගුවන් තොටුපොළෙන් පිටතට යාමට තැත් කරමින් සිටියදී රේගු මත්ද්‍රව්‍ය පාලන අංශයේ නිලධාරීන් පිරිසක් විසින් අත් අඩංගුවට ගෙන තිබේ .
මොහු සියරාලියෝන් හි වාසය කරන 32 හැවිරිදි වී ගොවියෙකි .
ගුවන් තොටුපොළ හරිත මාවත ඔස්සේ පිටව යාමට පැමිණි මෙම ගුවන් මගියා පිළිබඳ සැක සිතූ රේගු මත්ද්‍රව්‍ය පාලන අංශයේ නිලධාරීන් , මොහු පරිලෝකන පරීක්ෂා කිරීමකට
ලක් කිරීමේ දී , මොහුගේ ආමාශය තුළ , කොකේන් මත්ද්‍රව්‍ය ගුලි වශයෙන් සකස් කර ගිල දමා පැමිණ ඇති බව අනාවරණය වී තිබේ .
ඒ අනුව අත් අඩංගුවට ගත් මෙම ගුවන් මගියා කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට පියවර ගෙන තිබූ අතර , එම නිලධාරීන් , මෙම ගුවන් මගියා මීගමුව මහ රෝහල වෙත ඇතුළත් කිරීමට පියවර ගෙන තිබුණි .
