(සමිත් බෝධිපක්ෂ චීනයේ බෙයිජිං නුවර සිට)
ලෝකයේ රටවලට දැන් අවශ්‍ය වන්නේ බෙදීම් හෝ ගැටුම් නොව සහයෝගිතාව සහ සම්බන්ධීකරණය බව චීන ජනාධිපති ෂී ජින්පින් මහතා පැවසීය.
ඔහු මේ බව කියා සිටියේ අද (29) චීනයේ බෙයිජිංහිදී ඇමෙරිකානු එක්සත් ජනපදයේ ජාතික ආරක්ෂාව පිළිබඳ ජනාධිපති සහකාර ජේක් සුලිවන් මහතා හමුවෙමිනි.
මිනිසුන්ට අවශ්‍ය වන්නේ විවෘතභාවය සහ ප්‍රගතිය මිස බැහැර කිරීම හෝ පසුබැසීම නොවන බවද චීන ජනාධිපතිවරයා කියා සිටියේය. ලෝකයේ ප්‍රධාන රටවල් දෙකක් ලෙස චීනය සහ ඇමෙරිකානු එක්සත් ජනපදය ඉතිහාසයට, ජනතාවට සහ ලෝකයට වග විය යුතු අතර, ලෝක සාමය සඳහා ස්ථාවර මූලාශ්‍රයක් විය යුතු බවද ඔහු කීය.
චීන - ඇමෙරිකා සබඳතාවෙහි සහ දෙරට අතර සාධනීය වෙනස්කම් රැසක් සිදුව ඇතැයි පෙන්වාදුන් ෂී ජින්පින් මහතා, ස්ථාවර, සෞඛ්‍ය සම්පන්න සහ තිරසාර චීන-ඇමෙරිකා සබඳතා පවත්වාගැනීමේ ඉලක්කය වෙනුවෙන් චීනයේ කැපවීම නොවෙනස්ව පවතින බවද සඳහන් කළේය.
ඇමෙරිකා එක්සත් ජනපද පාර්ශ්වයද එලෙසම ක්‍රියා කරනු ඇතැයි තමන් විශ්වාස කරන බවද මෙහිදී චීන ජනාධිපතිවරයා පැවසීය.
තවදුරටත් අදහස් දක්වමින් හෙතෙම කියා සිටියේ චීනය සහ එහි සංවර්ධනය පිළිබඳ ඇමෙරිකාව ධනාත්මකව බලනු ඇති බවටත්, දෙරටෙහි සංවර්ධනය අභියෝගයකට වඩා අවස්ථාවක් ලෙස සලකනු ඇති බවටත් විශ්වාස කරන බවය.
