ජනප්‍රිය ගායක ජස්ටින් බීබර් ලොව ජනාදරයටපත් ගායකයෙකි. ඔහු ළමා කාලයේදී එක්රැස් කර ගත් රසික පිරිස දැන් ඔහුගෙන් ඈත්වීමට පටන් ගෙන ඇති බව විදෙස් මාධ්‍ය පෙන්වාදෙයි. එයට හේතුව ලෙස ඔවුන් සිද්ධි රැසක් පෙන්වාදෙයි.
පසුගියදා ඔහු සිය ප්‍රේක්ෂිකාවක් විසින් ලබාදුන් ත්‍යාගයක් විසිකරන ආකාරය කැමරා කාචයක් සටහන් වී තිබේ. මේ සිද්ධිය සිදු වී ඇත්තේ බීබර් නිව්යෝර්ක් නුවර ප්‍රසංගයක් සඳහා සහභාගි වීමට යන අවස්ථාවේදීය. ඔහු එම ප්‍රසංගයට සහභාගි වීමට යාමේදී ඔහු යන මෝටර් රථයට ඔහුගේ රසිකාවියක් විසින් ත්‍යාගයක් ලබාදෙන අතර, එය ඔහු ගෙන නැවත ඇය වෙතටම විසිකර ඇත. මේ දිනවල එය ට්විටර් ගිණුම්වල දැඩි දෝෂාරෝපණයට ලක් වූ වීඩියෝවක් බවට පත්ව ඇත. එයට හේතුව බීබර්ගේ මේ නොමනා හැසිරීමය.
මීට අමතරව පසුගියදා ඔහු තම ට්විටර් ගිණුමේ සඳහන් කරන දෙයක් නිසා ඔහුගේ අනුගාමිකයන් ප්‍රමාණය අඩුවෙමින් පවතින බවද සඳහන්වෙයි. මේ පිළිබඳව ඔහු පවසන්නේ තමන්ගේ ජනප්‍රියත්වය දැන් තමාට හිසරදයක් වී ඇතැයි කියාය.
ජස්ටින් බීබර් එහි වැඩිදුරටත් සඳහන් කර තිබුණේ තමන්ව වට කරගන්නා රසික රසිකාවියන් කෙළවරක් නැතිව තමන්ගේ ඡායාරූප ගැනීම මහ කරදරයක් වී ඇති බවයි. “ප්‍රසිද්ධ තැන්වලදි රසික රසිකාවියන් මාව දැක්කාම අඩුගානෙ මට "හායි" කියලවත් කියන්නෙ නැතුව මගේ ෆොටෝ ගන්නවා. ඒ අය මොහොතකටවත් හිතන්නෙ නැහැ, මමත් මනුස්සයෙක් කියලා. ඒ අය වටකර ගත්තාම මට හිතෙන්නෙ මම සත්තු වත්තක කූඩු කරලා ඉන්න සතෙක් වගේ කියලා.” යැයි බීබර් වැඩිදුරටත් මෙහි පවසා ඇත.
මේ සිදුවීමෙන් පසුව ඔහු පසුගිය දිනෙක ප්‍රසිද්ධ උද්‍යානයක හුදෙකලාව ගත කර ඇති බවද සඳහන්වෙයි. මෙහිදී ඔහු හෙඩ්ෆෝන් එකක් පැලඳගෙන මියුරු ගීත අසමින් සිට ඇත. නමුත් මෙතැනට බීබර්ට කරදර කිරීම සඳහා කිසිවෙකු පැමිණි නොමැති බවද සඳහන් වෙයි. මේ කාරණා නිසා බීබර්ගේ ෆේස්බුක් ගිණුමේ ලයික්ස් ප්‍රමාණය යම්තාක් දුරට අඩුවී ඇති අතර, තම ට්විටර් ගිණුමේ අනුගාමිකයන්ද අඩු වී ඇත. මොහුගේ මෙම ක්‍රියා හේතුවෙන් මොහු වටා ගොඩනැගුණු රසිකයන්ද ඔහුගෙන් ටිකෙන් ටික ඈත්වීමට ඉඩ ඇති බව විදෙස් මාධ්‍ය සඳහන් කර සිටියි. මෙවැනි කාරණා සිදුවීමට සෙලීනාගේ වෙන්වීම බලපා ඇති බවද ඇතැමුන් පවසනවා. අවසන්වරට සෙලීනාගේ වෙන්වීම නැවත එක්කර ගැනීමට ඔහුට නොහැකි වූයේ එම කාලයේදී බීබර් නව පෙමක් සඳහා ඇලීගැලී සිටි නිසා බවද සඳහන්වෙනවා.
කෙසේ නමුත් සෙලීනා ගෝමස් සහ බීබර් සමග තිබූ පෙම් සබඳතාව අවසන් වුවත්, එය නැවත හරිගස්සා ගැනීමට බීබර්ට අවස්ථා ලැබුණු බවද සඳහන් වෙනවා. මේ බව සෙලීනාගේ හොඳම මිතුරියක වන ටේලර් ස්විෆ්ට් විසින් පවසා තිබෙනවා. ඇය විසින් සඳහන් කර ඇත්තේ බීබර් සහ සෙලීනා හය වතාවක් ඔවුන්ගේ පෙම් සබඳතාවය අවසන් කළ බවයි. ඒ සෑම අවස්ථාවකදීම බීබර්ට සෙලීනාව නැවත යාළු කර ගැනීමට හැකියාව ලැබුණු අතර, මෙවර එම වෙන්වීම නැවතත් ආදරයක් බවට පත්කර ගැනීමට බීබර් හැකියාව නොමැති බව ඇය සඳහන් කර සිටිනවා.
මොවුන් දෙදෙනා වෙනුවෙන්ද ඇය පසුගියදා ගීතයක් එළිදැක්වූවාය. '1989' හි ගීත ඇල්බමයට ඇතුළත් වන එක් ගීතයක් ජස්ටින් බීබර් සෙලීනා ගෝමස්ව නැවත දිනාගැනීමට දරන උත්සාහය පිළිබඳව කියැවෙන බව සඳහන්වෙයි. මෙම හේතු කාරණා නිසා බීබර්ගේ හැසිරීම පිළිබඳව ඔහුගේ රසිකයන්ගෙන් අප්‍රසාදය පළ වී ඇත. මේ කාරණා පිළිබඳව බීබර් සඳහන් කරන්නේ තමන්ගේ රසිකයන්ට අවශ්‍ය පරිදි තමා කිසිසේත් නොහැසිරෙන බවය.
මේ දිනවල බීබර්ගේ නව පෙම්වතිය ලෙස විදෙස් මාධ්‍ය සඳහන් කර සිටින්නේ බොලිවුඩයේ ජනප්‍රිය ළබාල නිළියක වන "Nicola Peltz"ය. ඒ නිසාම මොවුන් දෙදෙනා පිළිබඳව බොහෝ දෙනාගේ අවධානයද යොමු වී ඇත. කෙසේ නමුත් බීබර් තම ජනප්‍රියත්වය වැඩි අහංකාරකම නිසා තමන් වටා රොක්ව ඇති රසිකයන් කෙමෙන් කෙමෙන් ඈත් කරනු ලබන කාලය වැඩි ඈතක නොවන බව බොහෝ දෙනා පවසා සිටිනවා.
ඩිලාන් ක්‍රිෂාන්ත
