මුදල් අමාත්‍ය රවී කරුණානායකට එරෙහි විශ්වාසභංගය කවුරුන් විසින් ගෙන එන ලද්දක් වුවත් එයට පක්ෂව ඡන්දය දීමට තීරණය කළ බව ජනතා විමුක්ති පෙරමුණේ ප්‍රචාරක ලේකම් පාර්ලිමේන්තු මන්ත්‍රී විජිත හේරත් මහතා කියයි.
ඉතිහාසයේ වැඩිම ණය ලබාගත් ආණ්ඩුව බවට රාජපක්ෂ ආණ්ඩුව පත්වූ බවත් පැවසූ විජිත හේරත් මහතා වත්මන් ආණ්ඩුව ද ඩොලර් බිලියන 4.6ක් විදේශ ණය ලබාගෙන ඇතැයි ද පවසයි.
සාලාව යුද හමුදා කඳවුරේ ගින්න නිසා විශාල පිරිසක් භීතියට පත්වූ බවත් ඒ පිරිසගේ දේපොළවලට හානි සිදුවූ බවත් කඳවුර ජනාකීර්ණ පෙදෙසක පිහිටීම නිසා එම තත්ත්වය ඇතිවූ බවත් මන්ත්‍රීවරයා කීවේය. නුසුදුසුදු තැනක අවි ගබඩාව තිබෙන බවත් දේපළ අලාභ හානිවූ අයට හා විපතට පත්වූ අයට වන්දි ලබාදෙන්නැයි ඉල්ලා සිටින බවත් ඔහු පැවසීය.
අද (6) ජවිපෙ මූලස්ථානයේ පැවැති මාධ්‍ය හමුවකදී විජිත හේරත් මහතා ඒ බව පැවසීය.
