සර් ජෝන් කොතලාවල රාජ්‍ය ආරක්ෂක විශ්ව විද්‍යාලය වේරහැර ඉදිකෙරෙන ශික්ෂණ රෝහල කරදියාන කුණු කන්දෙන් මීටර් පන්සියක පමණ දුරින් පිහිටන අතර රුපියල් මිලියන 2600 වියදමින් ඉදි කෙරෙන එහි ශල්‍යාගාර, පිළිකා ඒකක, දැඩිසත්කාර ඒකක සහ අතිනවීන පහසුකම් ද වේ.
හඳුනා නොගත් විස බීජ ද පාරිසරික ගැටලු රැසක් ද ඇතිකරන බව කියන අක්කර 37 පුරා පැතිරුණු කුණු කන්ද එතැනින් ඉවත් කළ යුතු බව ප්‍රදේශවාසීහු කියති.
මීතොට මුල්ලේ නායගිය කුණු කන්ද අධිකරණ අවසරයෙන් කරදියානට දින හතකදී රැගෙන ඒම සහ වැසි සහිත කාලගුණික තත්වය සමග කරදියාන කුණු කන්දේ දුඟඳ කිහිප ගුණයකින් ඉහළ යාම සිය නිවෙස්වල මැසිමදුරැ උවදුරද වැඩි වීමට හේතුව ඇතැයි ඔවුහු පවසති.
වේරහැර ගංගාරාම විහාරයට පසුගියදා ඒකරාශිවූ ප්‍රදේශවාසීන් ඇතුළු පිරිසක් මේ හේතුවෙන් ඇති වී ඇති ගැටලු සාකච්ඡා කළහ. කරදියාන කුණු කන්ද නිසා සිය දරුවන්ගේ ජීවිත අනතුරේ වැටී ඇති බව අසල්වැසි කාන්තාවක් කීවාය.
පලාත් පාළන ආයතන නවයකින් පමණ කරදියානට කසල බැහැර කෙරෙන බව සඳහන් කරන ප්‍රදේශවාසීහු කසළ අංඟනය අසලින් ගලා බසින බොල්ගොඩ ජලාශයද අධීක ලෙස දුෂණය වීම නිසා දුර්ලබ මත්ස්‍ය වර්ග විසිතුනක් වඳවීමේ තර්ජනයට මුහුණ පා ඇතැයි ද කියති.
