'ට්‍රිබල් එක්ස්' අලුත්ම හොලිවුඩ් චිත්‍රපටයේ ප්‍රධාන චරිතයට පණ පොවන බොලිවුඩ් සිනමාවේ අංක එකේ නිළිය වන දීපිකා පදුකෝන් දෙවැනි වතාවට 'අයිටම්' ගීතයක් සඳහා ආරාධිත නර්තනයකට එක්වීමට බලාපොරොත්තුවෙන් සිටියි. ඒ නවක සිනමා අධ්‍යක්ෂවරයෙකු වූ දිනේෂ් විජාන්ගේ 'රබ්තා' චිත්‍රපටයේය. මෙහි ප්‍රධාන චරිත සූශාන්ත් රාජ්පූත් හා ක්‍රිති ෂැනොන් රංගනයේ යෙදෙන අතර, චිත්‍රපටය ලබන වසර පෙබරවාරි 10 වැනිදා තිරගත වීමට සූදානම් කර තිබේ. මීට පෙර දීපිකා 2013 වසරේ තිරගත වූ රොහාන් සිප්පියාගේ 'දම් මරෝ දම්^ චිත්‍රපටයේ 'දම් මරෝ දම්' ගීතය සඳහා 'අයිටම්' නර්තනයකින් දායක වී තිබුණි.
කෙසේ වෙතත්, ප්‍රකට 'කෝයි මෝයි' වෙබ් අඩවිය සඳහන් කරන්නේ, මේ වනවිට දීපිකාට සුපිරි නළු සල්මාන් සමගින් රංගනයේ යෙදීමට චිත්‍රපටයක් ලැබී ඇති බවයි. ඒ දීපිකා පසුගිය වසරේ බොහෝ පිරිසක් අතරේ වඩාත් ජනප්‍රිය වූ 'බාජිරාඕ මස්තානි' චිත්‍රපටය අධ්‍යක්ෂණය කළ සංජය ලීලා බන්සාලිගේ චිත්‍රපටයක් සඳහායි. සල්මාන් මීට පෙරද බන්සාලිගේ චිත්‍රපටයක් සඳහා එක්වූ අතර, ඒ 'සාවරියා' චිත්‍රපටයේ සෝනම්ගේ විවාහක සැමියා ලෙස රංගනයේ යෙදෙමිනි. දීපිකා හා සල්මාන් ඛාන් සිනමා පෙම්වතුන් ලෙස සිය රසික පිරිස් හමුවන පළමු අවස්ථාව ලෙසද මෙය බොලිවුඩ් ඉතිහාසයට එක් වේ.
