(නිමල් ජයරත්න)
පොළොන්නරුව දිස්ත්‍රීක් පාරිභෝගික නිලධාරීහු පිරිසක් පොළොන්නරුවේ ප්‍රධාන පෙලේ සහල් මෝල් හා අනෙකුත් සහල් මෝල්වල පවතින සහල් හා වී තොගයන්හි සංචිතයන් හා සහල් නිෂ්පාදන ක්‍රියාවලිය පිළිබඳව අද දින සොයා බැලූහ
පාරිභෝගික සේවා අධිකාරියේ සභාපතිවරයාගේ හා අධ්‍යක්ෂ ජනරාල් වරයාගේ උපදෙස් පරිදි මෙම නිරික්ෂණ චාරිකාවට එක් වූහ.
පොළොන්නරුව මහා පරිමාණ වී තොග රැස් කරන හා සහල් නිෂ්පාදනය කරනු ලබන මින්නේරිය සී.පි.පුර ප්‍රදේශයේ පිහිට් නිපුන සහල් නිෂ්පාදන ආයතනය හා වැලිකන්ද,සිංහපුර ප්‍රදේශයේ පිහිටි රත්න සහල් නිෂ්පාදන ආයතනයේ මේවනවිට පවතින වී තොග සහ සහල් තොග පරීක්ෂාවට ලක්කර එම සහල් හා වී තොගවල දත්ත රැස් කළේය.
මෙහිදී නිපුන සහල් ආයතනයේ සභාපති සිරිපාල ගම්ලත් මහතා මෙම පරීක්ෂාව සදහා පැමිණි පාරිභෝගික නිලධාරීන් වෙත පවසා සිටියේ තම ආයතනය වෙත රජයේ පාලන මිළට සහල් වෙළදපොල වෙත අඛණ්ඩව ලබා දෙන බවත් රජයේ පාලන මිළට වඩා අඩුවෙන් රුලියල් 219 ක් වැනි මිළකට තොග වෙලදුන් වෙත සහල් අලෙවි කිරීමට කටයුතු කරන බවයි.
ඒ අනුව නාඩු සහල් කිලෝවක් රුපියල් 220ක් වන රජයේ පාලන මිළට පාරිභෝගිකයින්ට සහල් අලෙවි කල හැකි බවයි.
තමන්ට නාඩු සහල් කිලෝවක් නිෂ්පාදනය කිරීම සදහා රුපියල් 225ක මුදලක් වැය වෙන බවත් රුපියල් 219ක් වන මෙම මිළ ගණන් යටතේ සහල් අලෙවි කිරීමෙන් එක් සහල් කිලෝවකින් රුපියල් 6ක පාඩුවක් සිදුවන බවත් එම පාඩුව දරා ගණිමින් රජයේ පාලන මිළට සහල් අලෙවි කිරීමට කටයුතු කරන බව ද ඔහු කියා සිටියේය.
මේ අතර පොළොන්නරුව දිස්ත්‍රීක්කයේ පිහිටි අනෙකුත් මහා පරිමාණ වී මෝල් වන වැලිකන්ද රත්න සහල් ආයතනයේ හා පොළොන්නරුව ඇතුමල්පිටිය ප්‍රදේශයේ පිහිටි අරලිය සහල් ආයතනවලටද පොළොන්නරුව පාරිභෝගික අධිකාරියේ නිලධාරීන් ගොස් එම ආයතන වල ගබඩා කර ඇති වී හා සහල් ප්‍රමාණයන්හි සංචිත පිලිබද තොරතුරු සංඛ්‍යා ලේඛන ලබා ගැනීමට කටයුතු කරනු ලැබූහ.
