බණ්ඩාරගම සංඝමිත්තා මාවතේ රූපලාවන්‍ය ශිල්පිණියක් (30) සිරුරට ගිනි ඇවිලීමෙන් මියගොස් ඇතැයි පොලිසිය කියයි. ඇය නියෝජ්‍ය ඇමැති අජිත් පී.පෙරේරාගේ සම්බන්ධීකරණ ලේකම්වරයකුවූ ලසන්ත ජානක පෙරේරා ගේ බිරියයි.
ගයනි ලංකාධාරී නමැති ඇගේ සිරුරට පසුගිය 25 වැනිදා ගිනි ඇවිලීමෙන් පසු සැමියා හා අසල්වාසීන් එක්ව ගින්න නිවා රෝහල් ගත කැර තිබුණු අතර අද කොළඹ ජාතික රෝහලේදී ඇය මිය ගියාය.
ඇගේ සැමියාගේද සිරුරට ගිනි ඇවිලීම හේතුවෙන් ඔහුද පානදුර රෝහලේ ප්‍රතිකාර ලබන බව පොලිසිය පවසයි.
ඇගේ මරණ පරීක්ෂණය හා වෛද්‍ය වාර්තා පිළිනොගන්නා බව කියමින් ඇයගේ ඥාතීන් කොළඹ නාගරික හදිසි මරණ පරීක්ෂක මොහොමඩ් අෂ්රොෆ් රූමි මහතා ඉදිරියේ කලබලකාරී ලෙස හැසිරීම නිසා ඇගේ මළ සිරුර පිළිබඳ මහේස්ත්‍රාත් පරීක්ෂණයක් අද පැවැත්වීමට නියෝග කැරිණි. ඒ අනුව පානදුර මහේස්ත්‍රාත් කල්හාරි කාංචනා ලියනගේ මහත්මිය අද (27) ස්ථාන පරීක්ෂණයක් කළාය.
ගින්න නිවා දැමීමට රූපලාවන්‍ය ශිල්පිනියගේ සැමියා හා එක්වූ අසල්වාසීන්ට ඉදිරි දිනයක සාක්කි දීම සඳහා අධිකරණයේ පෙනී සිටින ලෙසත් මළ සිරුර සම්බන්ධ මහේස්ත්‍රාත් පරීක්ෂණයක් පැවැත්වීමට මාළිගාකන්ද අධිකරණ මහේස්ත්‍රාත් කැඳවන ලෙස මහේස්ත්‍රාත්වරිය පොලිසියට නියෝග කළාය.
