බ්‍රසීලයේ රියෝද ජැනයිරෝ නුවරදී ආරම්භ වූ පැරාලිම්පික් ක්‍රීඩා උළෙලේ සමාරම්භක උත්සවයේ දී බෙලරූස් කණ්ඩායමේ නිලධාරියකු විසින් එම තරගාවලිය තහනම් කර තිබෙන රුසියාවේ ධජය ඔසවා විරෝධය පෑමක් සිදු කරනු ලැබ ඇතැයි විදෙස් මාධ්‍ය වාර්තා පවසයි.
තහනම් උත්තේජක චෝදනා යටතේ ජාත්‍යන්තර පැරාලිම්පික් කමිටුව රුසියා කණ්ඩායමට මෙවර පැරාලිම්පික් තරගාවලිය තහනම් කැර තිබිණි.
සමාරම්භක උත්සවය පැවැති මරකානා ක්‍රීඩාංගණයේ ආචාර පෙළපාළියේ ගමන් ගත් බෙලරූස් කණ්ඩායමේ නිලධරයකු එසේ රුසියා ධජය ඔසවා ඇතැයි ද කියති. මේ අතර රුසියාව කියනුයේ තහනමට ලක්වූ තම ක්‍රීඩකයන් වෙනුවෙන් සහෝදරත්වය ප්‍රකාශ කිරීමක් ලෙස එය දකින බවයි.
පැරාලිම්පික් බලධාරීන් අදාළ නිලධරයා ක්‍රීඩාංගණයෙන් පිටුවහල් කිරීමට ද කටයුතු යොදා ඇත.
