මලයාසියාවේ ශ්‍රී ලංකා මහකොමසාරිස් අයි .අන්සාර් මහතාට එරට සිටින එල්ටීටීඊ දෙමළ ඩයස්පෝරා කණ්ඩායමක පිරිසක් අද(4) ක්වාලාලාම්පූර් ගුවන්තොටුපළේදී ප්රහාරයක් එල්ල කර ඇතැයි විදේශ අමාත්‍යංශය පවසයි.
රාජකාරී කටයුත්තක් සඳහා ක්වාලාලම්පූර් ජාත්‍යන්තර ගුවන්තොටුපළට ගොස් යළි පැමිණෙමින් සිටි අවස්ථාවේදී ශ්‍රී ලංකා මහා කොමසාරිස්වරයා මෙලෙස දෙමළ ඩයස්පෝරා කණ්ඩායමක ප‍්‍රහාරයට ලක්ව ඇතැයි කියති.
එම අවස්ථාවේ අන්සාර් මහතා සමඟ සිටි ශ්‍රී ලංකා මහකොමසාරිස් කාර්යාලයේ දෙවන ලේකම්වරයාද මෙම ප‍්‍රහාරයට ලක්ව ඇතැයි වාර්තා වේ. අන්සාර් මහතා ශ්‍රී ලංකා විදේශ සේවයේ සිටින ජ්‍යෙෂ්ඨ නිලධාරියෙකි.
විදේශ කටයුතු අමාත්‍යාංශ ප‍්‍රකාශිකා මහිෂිනි කොළොන්නේ මෙනවිය ද මැලේසියාවේ අන්සාර් මහතාට ප්රහාරයක් එල්ලවී ඇති බව තහවුරු කළාය.
ශ්‍රී ලංකා රජය විසින් මැලේසියා රජය හා පොලීසිය සමඟ එක්ව නිසි පරීක්ෂණ පවත්වා සිද්ධිය සම්බන්ධයෙන් සම්පූර්ණ වාර්තාවක් ලබා ගැනීමට කටයුතු කරන බවද ,ඉන්පසුව ඊට අදාළ වැඩිදුර තොරතුරු ලබා දිය හැකි බවද ඇය කීවාය.
මේ අතර මැලේසියාවේ තානාපති ආරංචි මාර්ග සඳහන් කරන්නේ මෙම සිදුවීම සැලවීමත් සමඟ එරට පොලීසිය ශ්‍රී ලංකා මහකොමසාරිස්වරයාට දෙමළ ඩයස්පෝරාවගෙන් ප‍්‍රහාරයට ලක්වූ ස්ථානය වෙත පැමිණ ඇති අතර ඒ වන විටත් මහකොමසාරිස්වරයා එම විරෝධතාකරුවන්ගෙන් පහර කෑමට ලක්ව සිට ඇති බවය.
එම එල්ටීටීඊ හිතවාදී ඩයස්පෝරා කණ්ඩායමේ පිරිස් එල්ල කළ ප‍්‍රහාර වලින් තුවාල ලැබූ ශ්‍රී ලංකා මහකොමසාරිස්වරයා සහ දෙවන ලේකම්වරයා මේවන විට ක්වාලාලම්පූර් හි රෝහලක ප‍්‍රතිකාර ලබන බවද එම තානාපති ආරංචි කියයි.
ආසියානු දේශපාලන පක්ෂ වල ජාත්‍යන්තර සම්මේලනයට සහභාගී වීමට ඉකුත් 1වැනිදා මැලේසියාවට ගිය හිටපු ජනපති මහින්ද රාජපක්ෂ මහතා පැමිණීම සම්බන්ධයෙන් විරෝධය පාමින් එරට වෙසෙන කොටි දෙමළ ඩයස්පෝරා කණ්ඩායම් එක්ව ක්වාලාලම්පූර් නුවරදී විරෝධතා රැසක් සංවිධානය කළ අතර හිටපු ජනපතිවරයා සෙනසුරාදා (03) ආගමික වතාවත් සඳහා සහභාගී වීමට නියමිතව තිබූ එරට අගනුවර පිහිටි සෙන්තුල් බෞද්ධ විහාරයට ද ඔවුහු ප්රහාරයක් එල්ල කළහ.
මේ අතර ප‍්‍රහාරයට ලක්වූ ශ්‍රී ලංකා මහකොමසාරිස්වරයා සෙනසුරාදා (3) රාත‍්‍රියේදී සිය නිල නිවසේදී එරට පැවති ආසියානු දේශපාලන පක්ෂ වල ජාත්‍යන්තර සම්මේලනයට සහභාගීවූ අමාත්‍ය දයා ගමගේ, නියෝජ්‍ය අමාත්‍ය අනෝමා ගමගේ සහ හිටපු ජනාධිපතිවරයා ඇතුළු ඒකාබද්ධ විපක්ෂයේ මන්ත‍්‍රීවරුන්ට රාත‍්‍රී භෝජන සංග‍්‍රහයක් පවත්වා ඇතැයි ද කියති.
විදේශ කටයුතු අමාත්‍යංශය එම ප්‍රහාරය හෙළා දකිමින් ප්‍රකාශයක්ද නිකුත් කැර ඇත.
