(බී.ජී. චතුරංග සහ උපුල් හේරත්)
වසර තිහකට වැඩි කාලයක සිට මිරිසවැටිය රජ මහ විහාරය අසල පැරණි රථ ගාලේ වෙළඳාම් කටයුතු වල නිරතව සිටි තමන්, එම භූමියෙන් එළියට ඇද දමා ඇති බව කියමින් වෙළඳුන් පිරිසක් අද (28ද) මිරිසවැටිය රථ ගාල අසල උද්ඝෝෂණයක නිරත වූහ.
විවෘත කෙරුණු නව රථ ගාලේ වෙළඳාම් කටයුතු සිදු කිරීමට ඉඩ ලබා නොදීම හේතුවෙන්, තමන් දැඩි අසරණ භාවයට පත්ව ඇති බවද ඔවුහු කීය.
වසර ගණනාවක් පැරණි වෙළඳුම් සිටියද නව රථ ගාලේ අලුත් මල් වෙළඳුන් කිහිප දෙනෙකු සහ නව වෙළඳ සැලක් ඉදිකර ඇති බව එම වෙළඳුන් මෙහිදී පැවසූහ.
තමන්ට යළිත් වරක් මිරිසවැටිය අසල වෙළඳාම් කිරීමට අවස්ථාව සලසා දෙන ලෙස ඉල්ලා අටමස්ථානාධිපති නා හිමිපාණන්, දිසාපති, නාගරික කොමසාරිස්, පුරාවිද්‍යා කොමසාරිස්, ලගට ගොස් තම දුක් ගැනිලි ඉදිරිපත් කළද, අද (28) දිනය වන විටත් තමන්ට ඒ සඳහා විසඳුමක් නොලැබුණු බව එම පිරිස් මෙහිදී සඳහන් කළහ.
මෙම ගැටළුව සම්බන්ධයෙන් අනුරාධපුර දිස්ත්‍රික් ලේකම් රංජිත් විමලසූරිය මහතාගෙන් සිදු කල විමසීමකදී ඒ මහතා මෙසේ පැවසීය.
" සම්බන්ධයෙන් පූජා භූමි සංවර්ධන කමිටුව නියෝජනය කරන, මහා සංඝරත්නය පුරා විද්‍යා දෙපාර්තමේන්තුව, නාගරික සංවර්ධන අධිකාරිය ඇතුළු සියලු පාර්ශ්වයන් සමග සාකච්ඡා කර විධිමත් ක්‍රම වේදයකට අනුව මෙම වෙළඳුන්ට සාධාරණයක් ඉෂ්ට කරන්න මේ වන විටත් සැලසුම් සකස් කෙරෙමින් තිබෙනවා."
