මාර්ගය පුළුල් කිරීම සඳහා ගලවා ඉවත් කළ කුරුණෑගල රණවිරු ස්මාරකය යළි ස්ථාපනය කරන ලෙස මෛත්‍රිපාල සිරිසේන ජනපති අද ආරක්ෂක ලේකම්වරයාට නියෝග කළේය.
මෙම ස්මාරකය ගලවා ඉවත් කර වෙනත් සුදුසු ස්ථානයක පිහිටුවන බව එය ගලවන්නට පෙර මාර්ග සංවර්ධන අධිකාරිය හා ආරක්ෂක අමාත්‍යංශය ප්‍රකාශ කළේය. එහෙත් හිටපු ජනපති මහින්ද රාජපක්ෂ මහතා ඇතුළු පිරිසක් ඊට විරෝධය පළ කරමින් උද්ඝෝෂණය කළහ.
යහපාලන රජයට අවශ්‍යවී ඇත්තේ මේ රටේ යුද්ධයක් සිදු නොවූවා සේම රණවිරුවන් කොට්ඨාසයක් නොසිටියා යැයි පෙන්වීමට බවත් එබැවින් රණවිරු ස්මාරක කඩා ඉවත් කරන බවත් හිටපු ජනපති මහින්ද රාජපක්ෂ මහතා අද (31) කුරුණෑගල දී පැවසීය.
කුරුණෑගල මාලිගාපිටිය අසල රණවිරු ස්මාරකය කඩා ඉවත් කිරීමට විරෝධය පළ කරමින් පැවැති උද්ඝෝෂණයක් අවසන රණවිරු පවුල්වල සාමාජිකයන් හමුවී රාජපක්ෂ මහතා එසේ කීවේය.
එම රණවිරු ස්මාරකය ඉවත් කළේ මාර්ගය පිළිසකර කිරීමට බවත් එය මාර්ගය අලුත්වැඩියාවෙන් පසු යළි සුදුසු ස්ථානයක ඉදිකරන බවත් ඇමැති රාජිත සේනාරත්න අද පැවැති කැබිනට් තීරණ දැනුම්දීමේ මාධ්‍ය හමුවේදී පැවසීය.
රණවිරු ස්මාරකය තිබුණාට වඩා අලංකාර නව නිර්මාණශීලී එකක් ලෙස ඉදිකරන ලෙස උපදෙස් දුන් බවත් පිරිසක් මෙය කඩා ඉවත් කළ බව කියමින් බොරු ප්‍රචාර ගෙනයමින් ජනතාව නොමග යැවීමට දරණ උත්සාහය හෙළාදකින බවත් ජනපති මෛත්‍රිපාල සිරිසේන මහතා පැවසීය.
