විගමණික ශ‍්‍රමිකයන්ගේ අවම වැටුප ලබන ජනවාරි මාසයේ සිට ඇමෙරිකානු ඩොලර් 300 දක්වා (රුපියල් 45,000ක් පමණ දක්වා) ඉහළ නැංවීමට පියවර ගන්නා බව විදේශ රැකියා ඇමතිනී තලතා අතුකෝරළ මහත්මිය පැවසුවාය.
මේ වන විටත් ඒ සම්බන්ධයෙන් විවිධ රටවල් සමඟ සාකච්ඡා කරමින් සිටින බවත්, රටවල් කිහිපයක් සමඟ අවබෝධතා ගිවිසුම් අත්සන් කළ බවත් ඒ අනුව ලබන ජනවාරියේ සිට එය ක‍්‍රියාත්මක කරන බවත් අමාත්‍යවරිය සඳහන් කළාය.
දිගු කලක් තිසසේ මෙම කටයුත්ත පිළිබඳ අවධානය යොමු කර තිබුණද විවිධ හේතු මත එය ප‍්‍රමාද වූ බවද අමාත්‍යවරිය කීවාය.
ඇමතිනී තලතා අතුකෝරළ මහත්මිය මේ බව පැවසුවේ විදේශ සේවා නියුක්ති කාර්යාංශයේ ලියාපදිංචි නොවී රැකියා සඳහා ගොස් රක්‍ෂණ වන්දි හිමිකම් නොලබා මිය ගිය හා ආබාධිත තත්ත්වයට පත් වූ ශ‍්‍රමිකයින් වෙනුවෙන් වන්දි ලබාදීමේ අවස්ථාවකට එක්වෙමිනි.
