(සුජිත් හේවාජුලිගේ )
පසුගිය රජය සියඹලාණ්ඩුවේ මෙගාවොට් 100 සූර්ය බල ව්‍යාපෘතිය වැඩි මිල ඉදිරිපත් කළ විදුලි බල මණ්ඩලයේම ඥාති සමාගමකට නිතියට පටහැනිව පැවරීමෙන් රුපියල් කෝටි 330 ක පාඩුවක් සිදුවී ඇතැයි ලාංකික මහජන එකමුතුවේ සභාපති පේෂල සේරසිංහ මහතා පැවසීය.
එසේ හෙයින් එම ටෙන්ඩරය වහාම අවලංගු කර අලුත් ටෙන්ඩරයක් කැඳවන්නැයි ජනාධිපති අනුර කුමාර දිසානායක මහතාගෙන් ඉල්ලීමක් කරන බවද ඔහු ප්‍රකාශ කළේය.
කොමිස් කුට්ටි ව්‍යාපෘතිවලට උල්පන්දම් දෙන පරණ පිල්ලි විදුලිබල මණ්ඩලයේ තවමත් හොල්මන් කරන බව පැවසූ සභාපතිවරයා ජනතාවට කොකා පෙන්වමින් මෙගා ව්‍යාපෘතිවලට යෑම ඔවුන්ගේ එකම ඉලක්කය බවද සඳහන් කළේය.
පේෂල සේරසිංහ මහතා මෙසේ පැවසුවේ බොරැල්ල එන්. අැම් පෙරේරා ශාලාවේදී අද (2) පෙරවරුවේ පැවති ප්‍රවෘත්ති සාකච්ඡාවකදිය.
සේරසිංහ මහතා මෙසේද පැවසීය.
සියඹලාණ්ඩුව මෙගා වොට් 100 සූරිය බල ව්‍යාපෘතිය ටෙන්ඩරයට පාර්ශව දෙකක් ඉල්ලුම් කරනවා. රිවිදනවි කියන ආයතනයට තමයි ටෙන්ඩරය හිමිවන්නේ. අඩු ටෙන්ඩරය ඉදිරිපත් කරපු පාර්ශ්වය පැත්තකට දමා වැඩි ටෙන්ඩරය හිමිවූ සමාගමට ටෙන්ඩරය දෙනවා. එමගින් කෝටි 33ක පාඩුවක් සිද්ධ වුණා.. එම සිද්ධියට හිටපු නායකයන් වගකිව කිවයුතුයි.
රිවිදනවි විදුලි බල මණ්ඩලයට සම්බන්ධ ආයතනයක්. ඒ ටෙන්ඩරයේ පාරිශුද්ද භාවය ඉන් අහෝසි වුණා. විදුලි බල මණ්ඩලයේ එක්තරා ප්‍රධානියකු පුනර්ජනනීය විදුලි බලයට වඩා වෙනත් මාධ්‍ය වෙනුවෙන් උනන්දු වී කටයුතු කරන බව පේනවා. පරණ පිල්ලි තවමත් හොල්මන් කරන හෙයින් බලශක්ති ක්ෂෙත්‍රයේ ලොකු පසුබෑමක් ඇතිවී තිබෙනවා. මේ කර්මාන්තයේ ඍජු රැකියා ලක්ෂයක් තියෙනවා. වක්‍ර රැකියා ලක්ෂ තුනක් තියෙනවා.
සූර්ය බලය ප්‍රවර්ධනය කරන බව ජාතික ජනබල වේග ප්‍රතිපත්ති මාලාවේ තිබෙනවා. විදුලි බල මණ්ඩලයේ සිටින යම් යම් පිල්ලි ජනතාවට කොකා පෙන්වමින් කරන කටයුතු හෙළා දකිනවා. මණ්ඩලය අද යන්නේ මෙගා ව්‍යාපෘතිවලට. එසෙම දේශීය ආයෝජකයන් මගහරිමින් කටයුතු කරන තත්වයක් තියෙනවා. වර්තමාන සෝලා ව්‍යාපෘති හරහා ලොකු කොමිස් කුට්ටි ගන්න බැහැ. මෙමගින් සිදුවන්නේ ජනතාවගේ අයිතිය කොල්ලකෑමක්.
දූෂණය නැති කිරීමට ආපු ජනාධිපතිවරයා මේ ටෙන්ඩරය ඉදිරියට ගෙනියනවාද. අපි ඒක බලාගෙන ඉන්නවා.ටෙන්ඩරය ක්‍රියාත්මක වී නැහැ. නමුත් තවම තියෙනවා. මේ දූෂිත ටෙන්ඩරය අවලංගු කර නැවත කැඳවන්න කියලා අපි ඉල්ලනවා. කෙසේ නමුත් මේ ව්‍යාපෘතිය අනිවාර්යයෙන් කළ යුතුයි. නමුත් ඒක වෙන්න ඕන විනිවිදභාවයකින්. නිලධාරීන් ආණ්ඩුව ගොනාට ඇඳුවාදැයි සැකයක් තියෙනවා.
මෙම ප්‍රවෘත්ති සාකච්ඡාවට සංවිධානයේ විධායක කමිටු සාමාජික නවෝද් හේවගේ මහතාද සහභාගි විය.
