ලාංකීය සිනමාව ජාත්‍යන්තරයට ඔසවා තැබීමේ අරමුණින් හිරු රූපවාහිනිය මගින් දෙවැනි වරටත් සංවිධානය කරන ”හිරු රන් සම්මාන රාත‍්‍රිය-2016” (Hiru Golden Film Awards - 2016) අද (11 පස්වරු 7.00ට කොළඹ 07, නෙළුම් පොකුණ රඟහලේදී ජාත්‍යන්තර ප‍්‍රමිතියෙන් යුතුව පැවැත්වීමට කටයුතු යොදා තිබේ.
ආසියානු මාධ්‍ය ජාලයේ සභාපති රේනෝ ද සිල්වා මහතාගේ සංකල්පයක් මත සංවිධානය කරන මෙම සිනමා සම්මාන උළෙල සඳහා 2014-2015 වසර තුළ මෙරට තිරගත වූ චිත‍්‍රපට 40ක් සමග කෙටි චිත‍්‍රපට නිර්මාණකරුවන් 150 දෙනකුගේ කෙටි චිත‍්‍රපට සම්මාන විනිශ්චය කොට කලාත්මක, ජනප‍්‍රිය සහ විශේෂ සම්මාන 40ක් ප‍්‍රදානය කෙරේ.
මෙවර සම්මාන උළෙල සඳහා බොලිවුඩයේ සුපිරි තාරකාවන් වන මධුරි ඩික්සිත්, ශ‍්‍රි දේවි, ජැකී ෂෙරොෆ්, කරිෂ්මා කපූර්, නීල් නිතින් මුකේෂ්, සුනිල් ෂෙට්ටි සමග බොනී කපූර් වැනි බොලිවුඞ් චිත‍්‍රපට නිෂ්පාදකවරුන්ද සහභාගි වීම විශේෂත්වයකි. එදින නෙළුම් පොකුණ රඟහල ඇතුළත හා පිටත එකම සැණකෙළියක් බවට පත් කරන බවත්, පිටත සිටින හිරු ශ‍්‍රාවකයන්ට මෙහිදී බොලිවුඞ් තරකාවන් සමග අපේ රටේ නළු නිළියන්ද රතු පලස මතින් ගමන් ගන්නා අයුරු දැක ගැනීමට ඉඩ ප‍්‍රස්ථාව ලබා දී ඇති බවත් ජනප‍්‍රිය නිවේදක හා සම්මාන උළෙලේ සම්බන්ධීකාරක රංගන ද සිල්වා ”සැඳැල්ලට” පැවසීය.
මෙහිදී ජනප‍්‍රිය නළුවා, නිළිය හා ජනප‍්‍රිය චිත‍්‍රපට ගීතය ජනතා මනාපයෙන් තෝරා පත් කර ගන්නා අතර, ඒ සඳහා නිර්දේශිත අවසන් තිදෙනා ප‍්‍රකාශයට පත් කර තිබේ. ඒ අනුව ජනප‍්‍රිය නළුවා සඳහා රන්ජන් රාමනායක, උද්දික පේ‍්‍රමරත්න හා හේමාල් රණසිංහ ද, ජනප‍්‍රිය නිළිය සඳහා ශලනි තාරකා, උදාරි පෙරේරා හා ඩිනක්ෂි ප‍්‍රියසාද් ද, ජනප‍්‍රිය චිත‍්‍රපට ගීතය ලෙස ”සුහද කොකා” චිත‍්‍රපටයේ ”දාන සෙල්ලම් අපේ රාජමන්ත‍්‍රී”, ”හෝ ගානා පොකුණ” චිත‍්‍රපටයේ ”හෝ ගානා පොකුණේ” ගීතය ද ”ප‍්‍රවේගය” චිත‍්‍රපටයේ ”සිහිලැල් වූ” ගීතයද තේරී පත් වී සිටිති.
එමෙන්ම ළමා රංගන ශිල්පියා ලෙස ”හෝ ගාන පොකුණ” චිත‍්‍රපටයේ අංජලී මෙත්සරා, ”ඇහැලේ පොළ කුමාරිහාමි” චිත‍්‍රපටයේ ප‍්‍රමුදිත උදයකුමාර හා ”හෝ ගානා පොකුණ” චිත‍්‍රපටයේ ටිශාන්‍යා කුමාරසිංහ නිර්දේශ වී සිටිති.
එතෙර මෙතෙර ජනප‍්‍රිය තාරකාවන් රැුසක් පායමින් ශ්‍රී ලාංකීය සිනමා ඉතිහාසයේ ස්වර්ණමය ස්වරූපය යළිත් වරක් වර්ණවත් කරමින් ලාංකීය සිනමාවේ සියලූම විෂයයන් අභිෂේක ගන්වමින් රන් සම්මානයෙන් පුද කරන අවස්ථාව අද උදාවේ. එය සැබැවින්ම ලාංකීය සිනමාව ජාත්‍යන්තර තලයට ඔසවා තබන සම්මාන උළෙලක් වනු නියතය.
සමන්ත යහම්පත්
