දෙමටගොඩ රෙදි සාප්පු සේවකයකු පැහැරගෙන පහරදුන්නැයි කියන සිද්ධිය සම්බන්ධයෙන් පාර්ලිමේන්තු මන්ත්‍රිනී හිරුනිකා ප්‍රේමචන්ද්‍ර ගේ සහායකයන් බව කියන අට දෙනෙක් කොළඹ අතිරේක මහේස්ත්‍රාත් විසින් අද (4) යළිත් ලබන 6 වැනිදා තෙක් රිමාන්ඩ් කරනු ලැබූහ.
දෙමටගොඩ රෙදි සාප්පු සේවක අමිල ප්‍රියංකර පැහැරගෙන පහරදුන්නැයි කියන සිද්ධිය සම්බන්ධයෙන් පොලිසියට දෙවැනි ප්‍රකාශයක් දීම මයිකල් ජොන්සන් නම් සැකකරු ප්‍රතික්ෂේප කළ බව වැල්ලම්පිටිය පොලිසිය කොළඹ අතිරේක මහේස්ත්‍රාත් මොහොමඩ් මිහිලාන් මහතාට දැන්වීය.
ජොන්සන්ගේ 11 හැවිරිදි දියණියගේ කටඋත්තරය ලියාගත් බව පොලිසිය අධිකරණයට දැන්වීය. මේ සම්බන්ධයෙන් නීතිපති උපදෙස් ලැබී නැතැයි ද පොලිසිය කීවේය.
සැකකරුවන්ගේ ඡායාරූප වෙබ් අඩවි හා ෆේස්බුක් ගිණුම්වල පළවූ නිසා අඳුනාගැනීමේ පෙරට්ටුවක් නොපවත්වන ලෙස සැකකරුවන් වෙනුවෙන් පෙනී සිටි නීතිඥවරු ඉල්ලා සිටියහ. පොලිසිය ඊට විරුද්ධ විය. ඒ අනුව පෙරට්ටුව ජනවාරි 6 වැනිදාට කල් තැබිණි.
ඡායාරූප - ජයමාල් චන්ද්‍රසිරි
