2005න් පසු පැවැති ආණ්ඩුවේ සිටි ඇමැතිවරුන්ට පක්ෂයෙන් සිදුවූ අකටයුතුකම් පිළිබඳව තමා සමඟ පැවසූ අය එදා ඔවුන්ට කරදර කළ අය පස්සෙන් ගොස් අද අලුත් බලවේග හැදීමට යාම ගැන පුදුම හිතෙන බව ජනාධිපති මෛත්‍රීපාල සිරිසේන මහතා අද කොළඹ පැවැති උත්සවයක දී පැවසීය.
ජනාධිපතිවරයා එසේ පැවසුවේ හිටපු අමාත්‍යවරයකු වූ ජෙයරාජ් ප්‍රනාන්දුපුල්ලේ මහතාගේ අට වැනි ගුණානුස්මරණ උළෙලට සහභාගී වෙමිනි.
‘එවකට ආණ්ඩුවේ අභ්‍යන්තර ප්‍රශ්න මතු වූ විට පක්ෂයේ සමගිය ආරක්ෂා කිරීම සඳහා ජෙයරාජ් ප්‍රනාන්දුපුල්ලේ මහතා කැපවිමෙන් ක්‍රියා කළා. ඒ ආණ්ඩුවේ සිටි සමහර ඇමැතිවරු එදා මට කිව්වා ජෙයරාජ් ඇමැතිතුමා ඉන්නකොට අපි අපේ ප්‍රශ්න එතුමාට කිව්වා, දැන් අපට ඔහු නැති නිසා පක්ෂයේ දුක්ගැනවිලි කියන්න ඉන්නේ ඔබතුමා තමයි කියලා. එදා මට එහෙම කිව්ව ඇමැතිවරුන්ගේ නම් වුණත් කිව හැකියි. නමුත් මම කියන්නේ නෑ.
මට තියෙන පුදුමට එදා මට එහෙම කිව්ව අයත් ඒ අයට කරදර කළ අය පස්සේ ගොස් අද අලුත් බලවේග දහන්න යාමයි.‘
