කොළඹ නගරයේ ඇළ මාර්ග හරස් කරමින් ඒ දෙපස පවුල් 8470ක් පදිංචි වී සිටින බව මහ නගර හා බස්නාහිර සංවර්ධන අමාත්‍ය පාඨලී චම්පික රණවක මහතා ශ්‍රී ලංකා ඉඩම් ගොඩකිරීමේ හා සංවර්ධනය කිරීමේ සංස්ථාවේ සේවය කරන ආපදා තත්ත්වයෙන් පීඩාවට පත්වූවන්ට ආධාර ලබාදීමේ අවස්ථාවට එක්වෙමින් පැවසීය.
රාජ්‍ය ඉඩම් ගොඩකිරීමේ සංස්ථාවේ සංඛ්‍යා ලේඛනයන්ට අනුව ප‍්‍රධාන ඇළ මාර්ග ආශ‍්‍රිතව පවුල් 543ක් කොළඹ අවට පිහිටි කෝට්ටේ, ගොතටුව, බ්ලූමැන්ඩල් ආදී ද්විතීයික ඇළ මාර්ග අවට පවුල් 2327ක් හා බස්නාහිර පළාතේ අවිස්සාවේල්ලේ සිට කැලණි ගඟ දක්වා ඇති ඇළ මාර්ග හරස් කර පවුල් 5600ක් පදිංචි වී සිටින බව අමාත්‍යවරයා සඳහන් කළේය.
එමෙන්ම පනත්වල ඇති දුර්වලතා භාවිතා කරමින් හා දේශපාලන බලපෑම් ඇතිව පහත්බිම් අනවසරයෙන් ගොඩකිරීමේ කටයුතුද සෙනසුරාදා ඉරිදා දිනවල සිදුවන බව කී අමාත්‍යවරයා 2015දී අනවසර ගොඩකිරීම් 296ක් හා මේ වසරේ අපේ‍්‍රල් මාසය වන විට 190ක් බස්නාහිර පළාතෙන් වාර්තා වී ඇතැයිද කීවේය.
කොළඹ නගරයේ ගංවතුර ඇතිවීමට අවිධිමත් නාගරීකරණය හේතු වී ඇතැයි කී අමාත්‍යවරයා එය පාලනය කිරීම සඳහා විධිමත් සැලසුමක් ඉදිරි පස් වසරේ ක්‍රියාවට නංවන බව ද පැවසීය.
