එක්සත් ජාතීන්ගේ සංවිධානය ශ්‍රී ලංකාවෙන් පාඩම් රැසක් උගත් බව මෙරට තෙදින නිල සංචාරයක යෙදී සිටින එක්සත් ජාතීන්ගේ මහ ලේකම් බැන් කි මූන් අද (2) පැවැසීය.
රුවන්ඩාව, ශ්‍රී ලංකාව හා ස්‍රෙබනීසා (බොස්නියන් යුද්ධයේ දී ස්‍රෙබනීසා නගරයේ සිදුවූ මුස්ලිම් ජන සංහාරය) හිදී එක්සත් ජාතීන්ගේ සංවිධානයේ අසමත් වීම් නිසා මනුෂ්‍ය ජීවිත රැසක් අහිමි වූ බවත් ඉදිරි අනාගතයේ දී අසමත් නොවී මනුෂ්‍ය ජීවිත රැක ගැනීමට ඇප කැපවී කටයුතු කරන බවත් එක්සත් ජාතීන්ගේ මහ ලේකම්වරයා කීවේය.
කොළඹ හිල්ටන් හෝටලයේ පැවැති “තිරසර සාමයක් කරා - තිරසාර සංවර්ධන ඉලක්ක මුදුන් පමුණුවා ගැනීම” යන තේමාව යටතේ පැවැති සම්මන්ත්‍රණයේ ප්‍රධාන දේශනය කරමින් මූන් එම කරුණු කීවේය.
දහනව වැනි ව්‍යවස්ථා සංශෝධනය සම්මත කරගැනීම, තොරතුරු දැනගැනීමේ පනත, මානව හිමිකම් ආදී කරුණුවලදී ශ්‍රී ලංකාව ඉදිරි පියවර තබා ඇතැයි ද ශ්‍රී ලංකාව අත්පත් කරගෙන ඇති ප්‍රගතිය සම්බන්ධයෙන් ආණ්ඩුවට පමණක් නොව ක්‍රියාකාරී සිවිල් සමාජයට ද එහි ගෞරවය හිමිවිය යුතු බව ද ඔහු කීය.
