(අංජුල මහික වීරරත්න)
ශ්‍රී ලංකාවට වැළඳී තිබෙන දූෂණය වංචාව නාස්තිය නැමැති පිළිකාව සුව කරන බව ජනාධිපති අනුර දිසානායක මහතා ක්ලීන් ශ්‍රී ලංකා වැඩසටහන අරඹමින් ජනාධිපති කාර්යාලයේදී පැවසීය.
ජනාධිපතිවරයා මෙසේ ද කීය.
මේ නව වසරක ආරම්භයයි.නව වසර සමඟ අපේ රට අලුත් පරිවර්තනයකට ලක්වෙනවා.මුළු දේශපාලන අධිකාරියම ඒ වෙනුවෙන් පෙනී සිටිනවා.අප මේ රට ගොඩනැගීම සඳහා අවශ්‍ය වන පදනම ගොඩ නගමින් සිටිනවා.
පවුල් වාදයේ බලය අසීමිත ලෙස ජනතාවට එරෙහිව උපයෝගී කර ගැනීම ආදී සියල්ල අහෝසි වෙනවා.ජනතා උවමනා සමග පෙළ ගැසුණු නව දේශපාලන සංස්කෘතියක් අප අරඹා තිබෙනවා.
අපේ ආර්ථිකය බංකොලොත් තැනකට වැටී තිබුණා.ආර්ථිකයේ මතුපිට තලයේ යම් ස්ථාවරත්වයක් ඇතිකර තිබෙනවා.ආර්ථික දේහයේ ගැටලුවලට විසඳුම් සෙවීම සඳහා මේ වසරේදී අප කටයුතු කරනවා.
අප විවිධ පන්නයේ ආරක්ෂක තර්ජන වලට මුහුණ දුන් රටක්.මේ වන විට ආරක්‍ෂාව ඉතා හොඳින් තහවුරු කරන්නට හැකි වී තිබෙනවා. අරුගම්බේ කේන්ද්‍ර කරගෙන ප්‍රහාරයක් ගැන තොරතුරු වාර්තා වුණා. ආරක්ෂක අංශ සක්‍රීයව වැඩ කොටසක් කළා.
එමෙන්ම අප ක්‍රමානුකූලව නීතියේ ආධිපත්‍යය රටේ ස්ථාපිත කිරීමට කටයුතු කර තිබෙනවා.අපරාධකරුවන් නීතියට උඩින් සිටින යුගයක් තිබුණා.ජනාධිපතිවරුන්ද ව්‍යවස්ථාව කඩා ඇති බවට ශ්‍රේෂ්ඨාධිකරණ තීන්දු දුන් අවස්ථා තිබෙනවා.ඒ නිසා අප නීතිය ආධිපත්‍යය යළි තහවුරු කිරීමට විශාල වෙහෙසක් ගන්නවා.
අල්ලස දූෂණ වංචාව නාස්තියක් රාජ්‍ය පුරාම පැතිරී තිබෙනවා.දූෂණය වංචාව නතර කරන්න විශාල වෙහෙසක් ගන්නට සිදු වී තිබෙනවා.නීතිපති දෙපාර්තමේන්තුව එය මැඩීම සඳහා අවශ්‍ය සහාය දෙනු ඇතැයි අප සිතනවා.
