(විමුක්ති එස් රුද්‍රිගු)
ජීවිතය පිළිබඳ ආපසු හැරී බැලීමටත් මරණය පිළිබඳ අත් දැකීමක් ලබා ගැනීමටත් අවස්ථාව ලබා දීම සඳහා අද්විතීය තේමාවක් යටතේ ජපානයේ කජියා හොන්ටෙන් මල් ශාලාව "මිනී පෙට්ටි අවන්හල" නමින් අවන්හලක් පසුගිය සැප්තැම්බර් මාසයේදී වීවෘත කර ඇත.
ජපානයේ ෆුට්සු නගරයේ පිහිටි අවුරුදු 120ක් පැරණි කජියා හොන්ටෙන් මල් ශාලාවේ බිම් මහළේ "මිනී පෙට්ටි අවන්හල" පිහිටි තිබේ. මේ වනවිට ෆුට්සු නගරවාසීන් අතර මෙන්ම ජපාන වැසියන් අතරද මෙම අවන්හල බෙහෙවින් ප්‍රසිද්ධ වී ඇත.
"මිනී පෙට්ටි අවන්හල" පැමිණෙන පාරිභෝගිකයන්ට තෝරා ගැනීමට පැකේජ තුනක් ලැබෙන අතර ඒ ඒ පැකේජයට ලැබෙන මිනී පෙට්ටි වර්ග එකිනෙකට වෙනස් වේ.
රත්රන්, කොළ සහ කහ ලෙස එම පැකේජ නම් කර ඇති අතර ඒ සඳහා අය කිරීම ඇමෙරිකානු ඩොලර් 14 ( ශ්‍රී ලංකා රුපියල් 4000 ක් පමණ) සිට ආරම්භ වේ.
මෙම අවන්හලට පැමිණෙන්නෙකුට මියගිය ලෙස මිනී පෙට්ටියක හාන්සි වී තමන් එතෙක් ගෙවූ ජීවිතයත් මරණය කෙබඳුවේද යන්නත් පිළිබඳව සිතීමට කජියා හොන්ටෙන් මල් ශාලාව සිය පාරිභෝගිකයන්ට අවස්ථාව ලබාදී ඇත.
මල් ශාලාවේ පහත මාලයේ අවන්හල් පිහිටා ඇතත් සැබෑ අවමගුල් වලට පැමිණෙන පුද්ගලයන්ට නොපෙනෙන අයුරින් මෙම අවන්හල නිර්මාණය කර ඇති බවද පැවැසෙයි.
ආදරවන්තයින් මෙම අවන්හලට වැඩි වශයෙන් පෙමිණෙන බවත් පිරිමිය සහ කාන්තාව මිනී පෙට්ටියක හාන්සිවී අත් අල්ලාගෙන ජීවිතය සහ මරණය ගැන කල්පනා කිරීමට පුරුදු වී ඇති බවද සඳහන් වේ.
