කොස්ගම, සාලාව යුද හමුදා කඳවුරේ ආයුධ ගබඩාව මේ වසර අවසන් වන විට එම ස්ථානයෙන් ඉවත්කිරීමට සැලසුම් කර තිබූ බවත්, බොහෝ ආයුධ ඉන් ඉවත්කර තිබූ බැවින් ගිනිගැනීම සිදු වූ අවස්ථාවේ එහි තිබුණේ සියයට 10ක පමණ ආයුධ ප‍්‍රමාණයක් බවත් බටහිර ආඥාපති මේජර් ජෙනරාල් සුදන්ත රණසිංහ මහතා පැවසීය.
එහි ගබඩා කර තිබූ අවි පතරොම් සියල්ල විද්‍යනුකූලව නියමිත ප‍්‍රමිතියකට අනුව පොළව මතුපිට හා භූගතව ගබඩා කර තිබූ බවද පැවසීය.
මෙහි තිබූ ආයුධ ප‍්‍රමාණාත්මක වශයෙන් දන්නා නමුත් ඒවායේ වටිනාකම කාලයෙන් කාලයට වෙනස් වන නිසා විනාශ වූ ආයුධවල වටිනාකමද තවමත් ප‍්‍රකාශ කළ නොහැකි බව බටහිර ආඥාපතිවරයා කීවේය.
මෙම ගින්නෙන් හා පිපිරීම්වලින් කොස්ගම, ශාලාව යුද හමුදා කඳවුර සම්පූර්ණයෙන්ම පාහේ විනාශ වුවත් එහි කිසිවකුත් මිය නොගිය බව කී මේජර් ජෙනරාල්වරයා ඒ අසල ඇති ආබාධිත රණවිරුවන් ජීවත්වන රණවිරු ගම්මාන දෙකෙහි කිසිවකුටත් හානියක් සිදුව නැතැයි ද කීය.
මිය ගිය හමුදා සෙබළා ද තුවාල ලබා සිට රෝහල්ගත කර සිටියදී මිය ගිය බව මේජර් ජෙනරාල්වරයා කීවේය.
