ඉදිරි දශක දෙකක කාලයකදී ශ්‍රී ලංකාව ඉහළ ආදායම් ලබන රටක් බවට පත් කරන බවත් ඒ සඳහා අවශ්‍ය ආර්ථික සංවර්ධනය විද්‍යාව, තාක්ෂණය හා නවෝත්පාදනය මත පදනම් වනු ඇති බවත් රනිල් වික‍්‍රමසිංහ අගමැති වෝටර්ස් එජ්හිදි අද (8) පැවැසීය.
විද්‍යාව හා තාක්ෂණය ප‍්‍රවර්ධන කිරීම රටේ අනාගතයට වැදගත් වන්නේ කෙසේද යන්න පිළිබඳවත් අගමැති ‘සමාජය උදෙසා හා විද්‍යාව හා තාක්ෂණය’ ශ්‍රී ලංකා 2016 සමුළුවේ තාක්ෂණික සැසිවාරවල ආරම්භක සැසිය අමතමින් කීවේය.
වික‍්‍රමසිංහ මහතා මෙසේ ද කීවේය.
‘‘ජාතික විද්‍යා තාක්ෂණ ප‍්‍රතිපත්තියක් සකස් කිරීමේ පළමු පියවර ලෙස මෙම සමුළුව පෙන්වාදිය හැකිය. විද්‍යාව හා තාක්ෂණය ශ්‍රී ලංකාවත් තුළත් කලාපය තුළත් විශාල කාර්යභාරයක් ඉටු කරනු ඇත. කි‍්‍රකට් කී‍්‍රඩාව මෙන් කලාපයේ රටවල් සහයෝගීතාව ඇති කිරීමට විද්‍යාව හා තාක්ෂණය හේතුවනු ඇත.
ශ්‍රී ලංකාව ඉතිහාසයේ නව පිටුවක් පෙරළමින් සිටිනවා. සියලූ ක්ෂේත‍්‍ර හා පාර්ශවවල ඇතුළත්වීම, තිරසාරත්වය හා ජාත්‍යන්තර ප‍්‍රජාව සමඟ සහයෝගයෙන් කටයුතු කිරීම යන ප‍්‍රධාන කරුණු තුන මත පදනම්ව අපි අපේ අනාගතය ගොඩනගනවා.“
