(නිමල කොඩිතුවක්කු)
ආණ්ඩුවේ වැරැදි ආර්ථික සැලසුම් හේතුවෙන් ඉදිරි වසර තුළ රැකියා දස ලක්ෂයක් අහිමිවීමේ අවදානම තිබෙන බව’’ සමගි ජනබලවේගය ජාතික සංවිධායක, පාර්ලිමේන්තු මන්ත්‍රී තිස්ස අත්තනායක මහතා කොළඹදී ඊයේ (21) පැවසීය.
රට ඉදිරියේදී මුහුණදෙන ආර්ථික අර්බුදය පිළිබඳ තේරුම් ගැනීමට නොහැකි ආර්ථික උපදේශකයන් වත්මන් ආණ්ඩුවේ සිටින බව පැවසූ අත්තනායක මහතා, ආර්ථිකය යළි නගාසිටුවීමට, ජනතාවට සහන දීමට ජාතික ආර්ථික වැඩපිළිවෙළක් ආණ්ඩුව වහාම ක්‍රියාත්මක කළ යුතු බව ද සඳහන් කළේය.
නව ව්‍යවස්ථාවක් ගෙන ඒමට පෙර ජනතා ප්‍රශ්නවලට විසඳුම් සැපයීමට ආණ්ඩුව වහාම කටයුතු කළ යුතු බව ද කොළඹ මාකස් ප්‍රනාන්දු මාවතේ විපක්ෂ නායක කාර්යාලයේ පැවැති මාධ්‍ය හමුවකට එක්වෙමින් ඔහු පැවසීය.
වැඩිදුරටත් අදහස් දැක්වූ පාර්ලිමේන්තු මන්ත්‍රී තිස්ස අත්තනායක මහතා මෙසේ ද කීවේය.
‘‘අපේ සංවිධාන ජාලය ශක්තිමත් කර ගැනීමේ වැඩපිළිවෙළ පසුගියදා සජිත් ප්‍රේමදාස මහතාගේ ප්‍රධානත්වයෙන් ගාල්ල සහ මාතර දිස්ත්‍රික්කවලින් ආරම්භ කෙරුණා.
සමගි ජන බලවේගය වෙනුවෙන් සාමාජික ව්‍යාපාරය 2021 වසර සඳහා ආරම්භ කරන්න සූදානම් කරමින් තිබෙනවා. බිම් මට්ටමෙන් ඒ සාමාජික ව්‍යාපාරය ආරම්භ කරන්න අපි සැලසුම්කර තිබෙනවා.
මේ වනවිට රට විශාල ආර්ථික කඩාවැටීමකට ලක්වී තිබෙනවා. රටේ ණය බර නිදහස් කර ගැනීම වෙනුවෙන් ආර්ථිකයේ සියලු අංශ පරිත්‍යාග කරන්න අවශ්‍යයි කියා අජිත් නිවාඩ් කබ්රාල් ප්‍රකාශ කරනවා. මේක සම්පූර්ණ වැරැදි ප්‍රකාශයක්.
කෝවිඩ් වසංගතය නිසා අපේ ආර්ථිකය කඩා වැටුණා කියා ආණ්ඩුව කියනවා. අපේ ආර්ථිකය කඩා වැටීමට මූලික හේතුව කොරෝනා වසංගතය පමණක් නොවෙයි.
ආනයන වහා අත්හිටුවීමට මේ ආණ්ඩුව පියවර ගත්තා. අප ලෝකයත් එක්ක ගනුදෙනු කරන රටක්. ආනයනය වහා අත්හිටෙව්වයි කියා රටේ ආර්ථිකය ශක්තිමත් වෙන්නේ නැහැ. මේ නිසා විශාල භාණ්ඩ හිඟයක අවදානමක් රටට තිබෙනවා. මේ නිසා දේශීය කර්මාන්ත කඩා වැටීමේ අවදානමකුත් ඇතිවෙලා.
ආණ්ඩුවේ වැරැදි ආර්ථික සැලසුම් හේතුවෙන් ඉදිරි වසර තුළ රැකියා දස ලක්ෂයක් අහිමිවීමේ අවදානමක් තිබෙනවා. මේවා තේරුම් ගන්න බැරි ආර්ථික උපදේශකයන් තමයි ආණ්ඩුවේ ඉන්නේ.
අද රටේ තිබෙන්නේ ඍණ ආර්ථිකයක්. අපේ ආර්ථිකය විශාල පිපිරීමකට ලක්වීමේ අවදානමක් තිබෙනවා. රටේ ජීවන වියදම ඉහළ ගිහින්, උද්ධමනය වැඩි වෙමින් තිබෙනවා. එහි බලපෑම ඍජුවම ජන ජීවිතයට බලපානවා.
ආණ්ඩුව අනුගමනය කරන උපාය මාර්ගවල බරපතළ අර්බුදය නිසා තමයි අද ජීවන වියදම ඉහළ ගිහින් තිබෙන්නේ. ජීවන වියදම පාලනය කිරීම ආණ්ඩුවේ යුතුකමක්. වහින නිසා කරන්න බැහැ, පායන නිසා කරන්න බැහැ කියා ආණ්ඩුවට මේ වගකීමෙන් නිදහස් වෙන්න බැහැ. මේ ගැටලු කළමනාකරණය කර ගන්න තමයි ජනතාව ආණ්ඩුවක් පත්කර ගත්තේ. ඒ ටික අද වෙන්නේ නැහැ.
ව්‍යාපාර ස්ථාන 14,000කට කොරෝනා උවදුර නිසා ඍජුව බලපෑම් වෙලා. මේ අයට සහන දෙනවා කිව්වත් ඒවා විධිමත්ව සිදුවන්නේ නැහැ. මේ පීඩනයෙන් ජනතාව ගලවා ගැනීමට ආණ්ඩුව දිගුකාලීන යම් උපායමාර්ග ක්‍රියාත්මක කළ යුතුයි.
ආර්ථික අර්බුදය ආණ්ඩුවේ අර්බුදයක් විදියට පිළිගෙන වගකීමක් සහිතව මේ පිළිබඳ මුහුණ දිය යුතුයි. ආර්ථිකය යළි නගාසිටුවීමට, ජනතාවට සහන දෙන්න ජාතික ආර්ථික වැඩපිළිවෙළ ආණ්ඩුව වහාම ක්‍රියාත්මක කළ යුතුයි.
ආණ්ඩුවේ නාස්තිකාර වියදම් සීමා කරමින්, රටේ ආර්ථිකය ගොඩනගන්න මූලික තැන දිය යුතුයි. එහෙම නැතුව 20 වැනි සංශෝධනය ගෙනල්ලා තමන්ට බලය පවරා ගැනීම නෙවෙයි ආණ්ඩුව කළ යුත්තේ’’ යැයි ද ඔහු එහිදී පැවසීය.
පාර්ලිමේන්තු මන්ත්‍රී නලීන් බණ්ඩාර මහතා:
‘‘මහනුවර ප්‍රදේශයේ සිදුවූ නායයාමේ අවාසනාවන්ත තත්ත්වය පිළිබඳ අප කනගාටුව පළ කරනවා. පසුගිය දිනවල වූ භූ කම්පනවල බලපෑම නිසා මෙය සිදුවූවාදැයි භූ විද්‍යා පතල් කාර්යාංශයේ නිලධාරියෙක් කියා තිබුණා.
මේ රජයට ආපදා කළමනාකරණ අමාත්‍යාංශයක් නැහැ. ආපදා කළමනාකරණ ජාතික සභාව කැඳවා මේ ගැන සොයා බලන ලෙසත්, ආපදා කළමනාකරණය පිළිබඳ මෙයට වඩා අවධානය යොමු කරන්න කියාත් අපි රජයෙන් ඉල්ලා සිටිනවා.
හිටපු ආරක්ෂක ලේකම් සහ හිටපු පොලිස්පති පූජිත් ජයසුන්දර මහතා පාස්කු ප්‍රහාරය ගැන සොයා බලන ජනාධිපති කොමිසමට සාක්ෂි දුන්නා. දැන් ඒ ගැන හිටපු ජනාධිපතිතුමා මාධ්‍ය නිවේදනය නිකුත් කරලා තිබෙනවා.
කොමිසම ගෙදරට ගෙන්නගෙන හිටපු ජනාධිපතිතුමා සාක්ෂි දුන්නා. දැන් නිලධාරීන් කරන ප්‍රකාශවලට උත්තර දෙන්න සිරිසේන මහතා අවස්ථාවක් ඉල්ලනවා. ජනතාවට, රටට පේන්න කොමිසමට ගිහින් උත්තර දෙන්න කියා අපි සිරිසේන මහතාට කියනවා.
20 ගැන සොයා බලන්න අගමැති කමිටුවක් පත් කළා. අගමැති කමිටු වාර්තාව දැන් කුණු කූඩෙට වැටිලා. 20 ගැන මහින්ද රාජපක්ෂ මහත්තයටයි, ගෝඨාභය රාජපක්ෂ මහත්තයටයි එකඟතාවකට එන්න බැරුව කොහොමද ඉස්සරහට රට ගෙන යන්නේ? එතන බරපතළ ප්‍රශ්නය තිබෙනවා.
පොදු ව්‍යාපාර කාරක සභාවත්, රාජ්‍ය ගිණුම්කාරක සභාවත් මේ සතියේ රැස් වෙනවා. එහි වැඩි නියෝජනය ආණ්ඩුවට තිබෙනවා. අපට බහුතරය තිබියදීත් එහි සභාපති ධුර විපක්ෂයේ පක්ෂවලට දුන්නා. පොදු ව්‍යාපාර කාරක සභාවේ සභාපති තනතුරට මහින්දානන්ද අලුත්ගමගේ හරි මහින්ද අමරවීර මහතා හරි පත් කරන්න යනවා කියා අපට ආරංචියි.
දැන් මේ ආණ්ඩුව නරින්ට කුකුල්ලු බාරදෙන හැටි අපට බලන්න පුළුවන්. මේ ආණ්ඩුව යළිත් පරණ සෙල්ලම කරලා හොරකම් කරන්න තමයි මේ හදන්නේ.
සද්භාවයෙන් කටයුතු කරන ආණ්ඩුවක් නම් විපක්ෂයට මෙහි සභාපතිත්වයදී ආදර්ශය රටට පෙන්වන්න කියා අපි මේ ආණ්ඩුවේ ප්‍රධානීන්ට කියනවා. අප අනිවාර්යයෙන්ම මේ කමිටු දෙකටම අපේ සභාපති කෙනකු නම් කරනවා’’ යැයි ද ඔහු එහිදී පැවසීය.
