(මුදිතා දයානන්ද)
දිගන සිදුවීම් වලදී වගේම මහනුවර මාවනැල්ල බුදුපිළිම විනාශ කිරිමේ ක‍්‍රියාවලිය පිටුපසත් දෙමළ ඩයස් පෝරාව වැනි ජාතිවාදය අවුස්සා තමන්ගේ උවමනා ඉටුකරගන්න උත්සාහ කරන පිරිසක් සිටිය හැකි බැවින් ඒ උගුලට හසුනොවන ලෙස සියලූ ජනතාවගෙන් ඉල්ලා සිටිනවා යැයි ජාතික නිදහස් පෙරමුණේ නායක පාර්ලිමේන්තු මන්ත‍්‍රී විමල් වීරවංශ මහතා අද (28) පැවසීය.
ඔහු මෙසේ පැවසූයේ පිටකෝට්ටේ පිහිටි ජාතික නිදහස් පෙරමුණේ ප‍්‍රධාන කාර්යාලයේදි පැවති මාධ්‍ය හමුවක දීය.
මාවනැල්ල, මහනුවර ප‍්‍රදේශවල මේ දවස්වල බුදුපිළිම විනාශ කිරිමේ වැඩපිළිවෙළක් ක‍්‍රියාත්මක වෙමින් තිබෙනවා. සෑම දේශපාලන කුණාටුවකින් පසුවම මෙවැනි දේවල් අපේ රටේ සිදුවුණා. නාමල්කුමාර නමැති පොලිස් ඔත්තුකරුවා රටට හෙළිදරව් කළ ආකාරයට මීට පෙර දිගන ප‍්‍රදේශයේ ඇතිවූ ජාතිවාදි කළබල ත‍්‍රස්ත විමර්ශන කොට්ඨාසයේ හා දෙමළ ඩයස් පෝරාවේ ඇතැමුන්ගේ උවමනාවන් අනුවයි සිදුකර තිබෙන්නේ.
ඒ අනුව අපට සැකයක් තියෙනවා මේ මහනුවර හා මාවනැල්ල ප‍්‍රදේශවල සිදුවන බුදු පිළිම කඩාබිඳ දැමීම් පිටුපසත් එවැනි බලවේගයක් ඉන්නවාද කියලා. දිගන සිදුවිම කෙළවර වුණා වගේම මේකට කිසිම සම්බන්ධයක් නැති පිරිසක් අත්අඩංගුවට අරන් ප‍්‍රශ්නය කෙළවර කරයිද කියලත් අපට සැකයක් තිබෙනවා. ඒ නිසා අපි ඉල්ලා සිටිනවා මේ ප‍්‍රශ්නයේ සැබෑ වගකිව යුත්තන් සොයා දඬුවම් දෙන ලෙස.
