(*** අංජුල මහික වීරරත්න )
ප්‍රගතිශීලී ජනතාවගේ සෘජු මැදිහත්වීම නිසා අද ‘‘විස්සේ” කෑලි ගැලවෙමින් තිබෙන්නේ යැයිද විසිවන සංශෝධනය හැදුවේ කවුදැයි රාජ්‍ය බුද්ධි අංශයටවත් සොයා ගන්නට නොහැකි තත්වයක් නිර්මාණයවී ඇතැයි ද සමගි ජන බලවේගය නායක සහ විපක්ෂ නායක සජිත් ප්‍රේමදාස මහතා කොළඹ දී පැවසීය.
ආඥාදායක විසිවැනි ව්‍යවස්ථා සංශෝධනය වෙනුවට දහනව වැනි සංශෝධනයෙනුත් ඔබ්බට ගිය ප්‍රගතිශීලී ව්‍යවස්ථා සංශෝධනයක් සඳහා රටපුරා ගොස් ජනතාව බලමුළු ගන්වන බව ද විපක්ෂ නායකවරයා සඳහන් කළේය.
විපක්ෂ නායක සජිත් ප්‍රේමදාස මහතා මේ බව පැවසූවේ ‘‘20 පරදවමු” තේමාවෙන් සමගි ජන බලවේගය සංවිධාන කළ සම්මන්ත්‍රණයේ ප්‍රධාන ආරාධිතයා ලෙස සහභාගී වෙමිනි. කොළඹ නව නගර ශාලාවේ පැවැති සම්මන්ත්‍රණයේ දී සජිත් ප්‍රේමදාස මහතා මෙසේද පැවසීය.
අද දිනය හඳුන් වන්නේ ජාත්‍යන්තර ප්‍රජාතන්ත්‍රවාදී දිනය ලෙසයි. එවැනි දිනයක අප එක්වී සිටින්නේ ආඥාදායකත්වය පරාජය කර ප්‍රජාතන්ත්‍රවාදය ජයග්‍රහණය කරවන්නටයි. විසිවැනි ආණ්ඩු ක්‍රම ව්‍යවස්ථා සංශෝධනය රටට අහිතකර බව අප සැවොම දන්නවා. රටට ආදරේ කරන බොහෝදෙනා මේ තර්කය පිළිගන්නවා.
මා විධායක ජනාධිපති ක්‍රමය අනුමත කළ පුද්ගලයෙක්. ඒත් 2010 සිට2015 දක්වා සහ ඉන් පෙරත් වූ ප්‍රජාතන්ත්‍රවාදී නොවන ක්‍රියාවලි හරහා රටට වූ හානිය මා හොඳින් අවබෝධ කර ගත්තා. යුගයට ඔබින ආකාරයට ජනාධිපති ක්‍රමවේදයේ සංශෝධනයක් අවශ්‍ය බවට මා පිළිගත්තේ ඒ අනුවයි. 2015 වසරේදී ජනාධිපති බලය අඩු කිරීම වෙනුවෙන් පෙනී සිටියේ ඒ අනුවයි.
ඉන් පසුව දහනව වැනි ආණ්ඩුක්‍රම ව්‍යවස්ථා සංශෝධනය ස්ථාපිත කරනු ලැබුවා. ඒ අනුව යහපත් රාජ්‍ය පාලනයක් සඳහා වන ආයතන නිර්මාණය කරන්නට හැකි වුණා. තනි පුද්ගලයකුට රාජ්‍ය තන්ත්‍රයම ගොදුරු කරගෙන තනි තීන්දු ගැනීමේ බලය අහිමි වුණා. අධිකරණවලට විනිසුරුවන් පත් කිරීමේදී තනි තීන්දුවලට නොයමින් සහභාගිත්ව තීරණවලට තැනක් ලැබුණා. ව්‍යවස්ථාදායක සභාව හරහා ඒ වැඩ කටයුතු නිර්මාණය වුණා.
ස්වාධීන මැතිවරණ කොමිසම හරහා ජීවිත අහිමි නොවන ආකාරයේ මැතිවරණ පවත්වන්නට හැකි වුණා. ඇමැතිවරුන් පත් කිරීම සීමා වුණා. එමෙන්ම ප්‍රසම්පාදන කොමිසම බිහි වුණා. විගණන කොමිසම බිහි වුණා.
රටේ තිබෙන්නේ නියෝජිත ප්‍රජාතන්ත්‍රවාදී ක්‍රමයයි. මේ මොහොතේ කළ යුත්තේ ජනතා පරමාධිපත්‍ය පළුදු කිරීම නොවෙයි. ජනතා පරමාධිපත්‍ය ශක්තිමත් කිරීමයි.
පාර්ලිමේන්තුවට ඉදිරිපත් කෙරෙන කෙටුම්පතකට විරුද්ධව මෙරට සිවිල් පුරවැසියන්ට අධිකරණයට යන්නට තිබෙන කාලය කෙටිවන විට සිදුවන්නේ ජනතා ස්වෛරීත්වය හීන වීමයි. අද වන්නේ ජනවරමේ නාමයෙන් බලය එක තැනක කේන්ද්‍රගත කරගෙන ඒකාධිපති ස්වරූපයකින් ආණ්ඩුක්‍රම ව්‍යවස්ථාව නිර්මාණය කිරීමයි.
ජනතා බදු මුදල් ගැන හොයන්න බැරි ප්‍රසම්පාදන කොමිසම කුමටද? විනිවිද බවකින් යුතු ප්‍රසම්පාදන කොමිසමක් දියුණු රටකට අත්‍යවශ්‍යයි. එමෙන්ම විගණන කොමිසම අත්‍යවශ්‍යයි. ජනපතිගේ සහ අගමැතිගේ ආයතන විගණනය කරන්නට නොහැකිවන ආකාරයට සංශෝධන ගෙනෙන්නේ මොන රටේ ද? දියුණු ප්‍රජාතන්ත්‍රවාදය මෙයද?
පුද්ගලයන් කේන්ද්‍ර ගත කරගත් ව්‍යවස්ථා සංශෝධන රටට ඉතා අහිතකරයි. දහ නව වැනි සංශෝධනය අංගසම්පූර්ණ සංශෝධනයක් නොවන බව අප පිළිගත යුතුයි. එහි අඩුපාඩු සහ ගැටලු තිබෙනවා. අඩුපාඩුකම් තිබුණා යයි රටක වැදගත් ආයතන විනාශ කිරීම යුතුකම නොවෙයි. අඩුපාඩුකම් මගහරවාගෙන ස්වාධීන ආයතන වැඩි වැඩියෙන් ශක්තිමත් කිරීම කළ යුතුයි.
අප අදහස් කරන දහ නවයෙන් ඉදිරියට යන වැඩපිළිවෙළ එයයි. අප එතැනින් නතරවන්නේ නැහැ. රටේ ජාතික ආරක්ෂාව සම්බන්ධයෙන් ද වැඩපිළිවෙළක් ගැන අප සාකච්ඡා කරගෙන යනවා. කවුරුත් ජාතික ආරක්ෂාව ගැන කතා කළ ද ජාතික ආරක්ෂක කවුන්සිලයට පැහැදිලි නීතිමය පදනම නැහැ. ජාතික ආරක්ෂක කවුන්සිලය නිර්මාණය කිරීම ඇතුළු ආරක්ෂාව තහවුරු කිරීම සඳහා වැඩසටහන් රැසක් හඳුන්වා දීමට මා බලාපොරොත්තු වෙනවා.
විසිවැනි සංශෝධනයට විරුද්ධයි වගේම ඒ සංශෝධනය පරාජය කිරීම සඳහා සමගි ජන බලවේගය ඇතුළු විපක්ෂය නියෝජනය කරන සියලු බලවේග එකතු කර ගන්නවා.
අප නොබියව රට ගැන සිතා එල්ල කළ අභියෝග හමුවේ මහා බහුතරය තිබෙනවා යයි කියන කණ්ඩායම දණ ගැස්වූවා. මේ අතර කෙසේ හෝ විස්ස දිනවන බවට කොන්ත්‍රාත්තුව බාර ගත් පිරිසක් ද සිටිනවා. විසිවැනි සංශෝධනය දිනවීම සඳහා මන්ත්‍රීවරුන් සිටිනවාලු. කොහේ මන්ත්‍රීවරුන් සිටිනවාදැයි මා නම් දන්නේ නැහැ. සමගි ජන බලවේගයේ කිසිම කෙනෙකු තමන් වැදූ මව පියා පාවාදී මුදල් සූට්කේස්වලට යට වෙන්නේ නැහැ.
රටට ආඥාදායකත්වයක් අවශ්‍ය නැහැ. රටේ ඉන්නේ වහලු‍න් නොවෙයි. රටට අවශ්‍ය ප්‍රජාතන්ත්‍රවාදය ශක්තිමත් කිරීමයි. අධිකරණය ව්‍යස්ථාදායකය සහ විධායකය යන තුනම ශක්තිමත් විය යුතුයි. පුද්ගලයන් කේන්ද්‍ර කරගෙන එකිනෙකාගේ බලය අඩු කර ගන්න යෑම සාර්ථක ක්‍රමය නොවෙයි. පරිණත දේශපාලන ක්‍රමවේදයක් තුළ බාල ගති ලෙස ඒ ක්‍රම හැඳින්විය හැකියි. එවැනි ව්‍යවස්ථා සංශෝධන කර රටට අනාගතයක් ලබා ගන්න බැහැ.
කොතරම් විරෝධතා පැමිණිය ද අප සම්මන්ත්‍රණය නතර කරන්නේ නැහැ. ගම් නගර කේන්ද්‍ර කරගෙන ජනතාව දැනුවත් කිරීමේ වැඩසටහන සමගි ජන බලවේගයේ අප ක්‍රියාත්මක කරනවා. ඒ සඳහා සියලු ප්‍රගතිශීලී බලවේග එකතු කර ගන්නවා. සියලු ඡන්ද පොළ මධ්‍යස්ථානවල පොදු ජනතාව හමු වෙනවා.
විසිවැනි සංශෝධනය පරාජය කළයුත්තේ ඇයිදැයි අප එහි දී පැහැදිළි කරනවා.
දහ නවයෙන් ඉදිරියට ව්‍යාපාරයේ සභාපති දොස්තර රාජිත සේනාරත්න මහතාගේ මූලිකත්වයෙන් මන්ත්‍රී කණ්ඩායමේ සියලු දෙනාගේම ශක්තිය ගෙන මහා සංඝරත්නය ප්‍රමුඛ සියලු‍ම ආගමික නායකයන් ඒකරාශී කර ප්‍රබුද්ධ ගමනක් ක්‍රියාත්මක කරන්න මා නායකත්වය ගන්නවා.
ප්‍රගතිශීලී ජනතාවගේ සෘජු ස්ථාවරය නිසා අද විස්සේ කෑලි කෑලි ගැළවෙමින් යනවා. දහනවයෙන් ඉදිරියට වන ප්‍රගතිශීලි ව්‍යවස්ථා සංශෝධනය රටට ගෙන ඒම සඳහා අපි සැම අත්වැල් බැඳ ගනිමු යයි සජිත් ප්‍රේමදාස මහතා පැවසීය.
සම්මන්ත්‍රණය සඳහා මහා සංඝරත්නය සමගි ජන බලවේගය නියෝජනය කරන පාර්ලිමේන්තු මන්ත්‍රීවරුන් ප්‍රමුඛ විශාල පිරිසක් සහභාගී වූහ.
