(ඩයනා උදයංගනී)
අග්‍රාමාත්‍යවරයා විසින් පාර්ලිමේන්තුවට ඉදිරිපත් කළ අයවැය බොරු ආදායම් පෙන්වා ජනතාව රවටන එකක් යැයි සමඟි ජන බලවේගයේ මහලේකම්, පාර්ලිමේන්තු මන්ත්‍රී රංජිත් මද්දුම බණ්ඩාර මහතා ලංකාදීපයට පැවසීය.
මෙය ජනතාවට කිසිම සහනයක් නොලැබුණු ඉලක්කම් හරඹයක් පමණක් යැයි ද මහලේකම්වරයා සඳහන් කළේය.
එමෙන්ම මෙය තමන්ගේ ඥාති මිත්‍රාදීන්ගේ ව්‍යාපාර වෙනුවෙන් බදු සහන දුන් ජනතාව පිට බදු පටවන අයවැයක් බව කී මහලේකම්වරයා මෙම වසර මුලදී හඳුන්වා දුන් බදු සහන ද තමන්ගේ හිත මිත්‍රාදීන් වෙනුවෙන් ගෙන ආ ඒවා යැයි කියා සිටියේය.
කොවිඞ් 19 වසංගත තත්ත්වය මර්දනයට හෝ රට වර්තමානයේදී මුහුණ පා ඇති කොවිඞ් වසංගත තත්ත්වය හේතුවෙන් රැකියා අහිමි වූ හා ව්‍යාපාර විනාශ වූ අය වෙනුවෙන් සහනයක් සැලසීමට මෙම අයවැයෙහි කිසිඳු පැහැදිලි වැඩපිළිවෙලක් ඇතුළත්ව නැතැයි ද මද්දුම බණ්ඩාර මහතා කීවේය.
එය කාලීනව අවධානය යොමුවිය යුතුම අංශයක් වුවත් රජය ඒ කෙරෙහි අවධානය යොමු නොකිරීම කණගාටුවට කරුණක් යැයි ඔහු පැවසීය.
එමෙන්ම මෙවර අයවැය මගින් කලු සල්ලි රටට ගෙන්වීමට ද අවසර ලැබී ඇතැයි කී මද්දුම බණ්ඩාර මහතා සොරකම් කර විදෙස් ගිණුම්වල තැන්පත් කර ඇති මුදල් රටට ගෙන්වා ගැනීමේ අවස්ථාව මෙහි ඇති යෝජනා මගින් හිමිවී ඇතැයි ද කීවේය.
