(එම් .සුසිල් ප්‍රියන්ත)
ප්‍රජාතන්ත්‍රවාදී සියලුම බලවේග ඒකරාශී කරගෙන විසි වැනි ව්‍යවස්ථා සංශෝධනය අපි පරාජය කරනවා. පාර්ලිමේන්තුවේ සිටින ප්‍රබල විපක්ෂය හැටියට අපිට ඒක කරන්න පුලුවන්.ප්‍රජාතන්ත්‍රවාදයට ගරු කරන සියලුම දෙනා අපිත් සමඟ එකතු වේවි යැයි සමගි ජන බලවේගයේ නායක පාර්ලිමේන්තු විපක්ෂ නායක සජිත් ප්‍රේමදාස මහතා පැවසීය.
විපක්ෂනායකවරයා මේ බව පැවසුවේ අද (20) අම්බලන්ගොඩ පැවති ජන හමුවකදීය.
එහිදී තවදුරටත් කතා කළ ප්‍රේමදාස මහතා මෙසේ ද කීවේය.
‘මේ ආණ්ඩුවට ඕනෑ ජනතාවට සේවය කරන්න නෙමෙයි.ජනතාවගේ ප්‍රශ්න විසදන්නත් නෙමෙයි. විසි වැනි ව්‍යවස්ථා සංශෝදනයක් ගෙනැල්ලා ඒ අයගේ බලය තරකර ගන්නයි. විසි වැනි සංශෝධනයට අපි විරුද්ධයි. ඒකේ කතා දෙකක් නැහැ. අපි මේ ව්‍යවස්ථා සංශෝධනය පාර්ලිමේන්තුවට ගෙන එනවට කොහෙත්ම කැමති නැහැ.මේ ව්‍යවස්ථා සංශෝධනය ජනතාවට මෙන්ම රටට මර උගුලක්. ජනතාවගේ ප්‍රජාතන්ත්‍රවාදයට එය මරු පහරක් වෙනවා. ජනතාවගේ ප්‍රජාතන්ත්‍රවාදී අයිතිවාසිකම් මේ 20 වැනි ව්‍යවස්ථා සංශෝධනයෙන් කප්පාදු වෙනවා.’
‘මේ ව්‍යවස්ථා සංශෝධනයට නව සංශෝධන එකතු කරලත් සම්මත කර ගන්න හොඳ එකක් නෙමෙයි. අපි පැහැදිලිවම ඒක තේරුම් අරගෙන ඉන්නේ. මේ සම්බන්ධයෙන් ජනතාවත් දැනුම්වත් කරලා මේ රටේ ඉන්න ප්‍රජාතන්ත්‍රවාදී පිරිස් ඒක රාශී කර ගෙන රටට, ජනතාවට විනයක් වූ මේ 20 වැනි සංශෝධනය පරාජය කිරීමට අපි කටයුතු කරනවා. රටේ විපක්ෂට හැටියට එය අපේ කාර්‍යභාරයක්. මේ රටට වින කරන කොඩි වින කරන ඕනෑම ව්‍යවස්ථා සංශෝධනයක් පරාජය කරන්න අපි පෙරමුණ ගන්නවා.’
