(*** අංජුල මහික වීරරත්න)
රාජ්‍ය සේවකයන්ට හොඳින් සලකන බව කියා බලයට පැමිණි පොහොට්ටු ආණ්ඩුව දැන් රාජ්‍ය සේවය දියකර හරිමින් රාජ්‍ය සේවක සියලු දීමනා සහ අයිතීන් කප්පාදු කරමින් සිටින බව එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහ මහතා හෝමාගම දී පැවසීය.
එක්සත් ජාතික පක්ෂය බලයට පත්වූ සැණින් රනුග්ගේ කමිටු වාර්තාව ක්‍රියාත්මක කරන බව කී රනිල් වික්‍රමසිංහ මහතා රාජ්‍ය සේවකයන්ට තම රජය දුන් සහන සියල්ලක්ම නැවතත් ලබාදීම ආරම්භ කරන බවද අවධාරණය කළේය .
එක්සත් ජාතික පක්ෂ හෝමාගම සංවිධායක සහ හිටපු පාර්ලිමේන්තු මන්ත්‍රී දයා ගමගේ මහතා සංවිධාන කළ මෙම ජනහමුව හෝමාගම, පිටිපන අමල්යා උත්සව ශාලාවේ දී පැවැත්විණි. එහිදී තවදුරටත් අදහස් දැක්වූ එක්සත් ජාතික පක්ෂ නායක රනිල් වික්‍රමසිංහ මහතා මෙසේද පැවසීය.
අද සියලුම දෙනා ජීවත් වන්නේ අසීරුවෙනුයි. ගෙවල්වල තිබෙන තත්ත්වය අමුතුවෙන් කිව යුතු නැහැ.
සෑම දෙනාටම ප්‍රශ්නවලට මුහුණ දෙන්න සිදු වී තිබෙන බව මා දන්නවා. කුමන ක්ෂේත්‍රයක වුවද රජයේ මෙන්ම පෞද්ගලික අංශයේත් වෙළෙඳ ව්‍යාපාර, සංචාරක, ප්‍රවාහන ව්‍යාපාරවල සිටියත් අද සැමගේ ආර්ථිකයට පහර වැදී තිබෙනවා.
රජයේ සේවකයන්ට අපේ ආණ්ඩුව ඉතා හොඳින් සැලකුවා. රජයේ සේවකයන් දේශපාලන බලපෑමෙන් ඉවත් කරන්න අපට අවශ්‍ය වුණා. ඒ වගේම පොලිසිය දේශපාලන බලපෑමෙන් ඉවත් කරන්න අවශ්‍ය වුණා. ස්වාධීන රාජ්‍ය සේවා කොමිසම, ස්වාධීන මැතිවරණ කොමිසම ඒ අනුව මා ස්ථාපිත කළා. අප පටන් ගත්තේ එතැනින් ඊටත් වඩා හොඳ වාර්තාවක් අප සතුව තිබෙන නිසයි.
1948 න් පසු අප තරම් රාජ්‍ය සේවකයන්ට වැටුප් හා දීමනා දුන් වෙනත් ආණ්ඩුවක් නැහැ. අනෙක් අය කතා කරනවා පමණයි. පෙළපාළි යනවා සටන් පාඨ කියනවා පමණයි.
ආණ්ඩුව පත්වී මාස දෙකෙන් එනම් පළමු අයවැයෙන් රුපියල් දස දහසක් රාජ්‍ය සේවක වේතන වැඩි කළා. 2019 වසරේ මා ආපසු ආණ්ඩුව බාර දෙන විට රාජ්‍ය සේවක වැටුප සියයට 107කින් වැඩි කර තිබුණා. අප එවැනි දියුණුවක් ඇති කළා.
අප විශ්‍රාම වැටුප් විෂමතා සංශෝධනය කර විශ්‍රාමිකයන් ලක්ෂ 5ක ගේ දීමනා වැඩි කළා. රුපියල් 12,500 සිට රුපියල් 48,000 දක්වා එය වැඩි කළා.
ශ්‍රී ලංකා පොලිසිය දේශපාලන බලපෑමෙන් මා ඉවත් කළා. පත්වීම් හා උසස්වීම් සියල්ල කළේ පොලිස් කොමිසමෙනුයි. රුපියල් 10000 වැටුප් වැඩිවීමට අමතරව තවත් 40% කින් වැටුප් වැඩි කළා. 2015 සහ 2019 වසරවල දී අප හමුදාවේ වැටුප් අට වතාවක් වැඩි කළා.
ඒත් අද සිදුවී ඇත්තේ කුමක්ද? අද රාජ්‍ය සේවය විශාල අර්බුදයකට පැමිණ තිබෙනවා. රටේ විශාල ආර්ථික අර්බුදයක් තිබෙන බව දැන ගත්තේ රාජ්‍ය සේවකයන්ට නොසලකා හැරීමට පටන් ගත් නිසයි.
මෙරට ආර්ථික අර්බුදය පටන් ගත්තේ කොරෝනා සමග නොවෙයි. පළමුවෙන්ම ආර්ථික අර්බුදය පටන් ගත්තේ 2020 දී රාජ්‍ය සේවකයන්ට දිය යුතු දීමනා සියල්ල නතර කළ මොහොතේයි. කොරෝනා පැතිරෙන්නට පටන් ගත්තේ පෙබරවාරි, මාර්තු මාසවලදීයි. ඒත් ජනවාරි වලදීම ආර්ථික අර්බුදය ඇරඹුණා.
මේ ආණ්ඩුව පසුගිය නොවැම්බරයේදී සමාගම්වලින් එන බදු අඩු කර ආදායම අහිමිකර ගත්තා. එයින්ම කරදරේ වැටුණා. ඉන්ධන මිල අඩු නොකළේ ඇයි දැයි ජාත්‍යන්තර මූල්‍ය අරමුදල ලංකාවෙන් විමසුවා. ඒ වෙනුවට විශාල ව්‍යාපාරවල බදු අඩු කළේ ඇයි දැයි ඇසුවා. 2020ජනවාරි වන විට විශේෂ දීමනා ගෙවන්නට බැරි තත්ත්වයට ආණ්ඩුව පත් වුණා.
නිලධාරීන්ගේ කැමැත්ත නැතිව අරමුදල් සඳහා පඩි කපන්න පටන් ගත්තා. ආර්ථික අවුලට ඇද දමා පඩියට තට්ටු කළා. අතිකාල සහ අනිත් දීමනා සියල්ල කපන්න පටන් ගත්තා. පසුගිය සිංහල – දෙමළ අවුරුද්ද ඓතිහාසික අවුරුද්දක් බව කිව යුතුයි. පළමු වතාවට රාජ්‍ය සේවකයන් සඳහා රුපියල් 10,000 ක උත්සව අත්තිකාරම් දුන්නේ නැහැ.
රාජ්‍ය සේවය නැති කරන්න ජනාධිපති කාර්ය සාධක බළකායක් පත් කළා. පොලිසියේ මාරුවීම්වලට ඇඟිලි ගැසුවා. පොලිස් නිලධාරීන් එකවරම ඉවත් කරන්න කටයුතු කළා.
අප වරමක් ඉල්ලන්නේ ජනතාව සමග සම්මුතියක් ඇති කර ගෙනයි. රාජ්‍ය සේවකයන්ගේ නතර කළ දීමනා සියල්ල අප ආණ්ඩුව පිහිට වූ පසු දෙනවා. ඒවා නතර කරන්නේ නැහැ. රනුග්ගේ කමිටු වාර්තාව මා ක්‍රියාත්මක කරනවා. ජනවාරියේ දීමනා ගණනාවක් දෙන්න තිබුණා. ඒ සියලුම දීමනා දෙනවා.
අපේ ප්‍රතිපත්තිය කුමක්ද? අර්බුදයෙන් ගැලවෙන්න හැකියාව ඇත්තේ ජනතාවගේ අතට මුදල් දීමෙනුයි. ජනතාව මුදල් වියදම් කළ යුතුයි.
එක්සත් රාජධානිය සෑම පවුලකටම පවුම් පන්සීයයක වවුචරය බැගින් දෙනවා. එය බැංකුවට දාන්න බැහැ. සාප්පුවක හෝ ආපන ශාලාවක හෝ වියදම් කළ යුතුයි. සිල්ලර වෙළෙඳාම දියුණු කරන්නේ මේ අයුරින් අතට මුදල් දීමෙනුයි.
අප ලබා දෙන්නේ අලුත් දීමනා නොවෙයි. අප දෙන්න පොරොන්දු වූ දීමනා බව කිව යුතුයි. රනුග්ගේ වාර්තාව ක්‍රියාත්මක කර ආධාර උපකාර කරන්න මා බලාපොරොත්තු වෙනවා. ඒ වාර්තාව මගින් උසස්වීම් දීමනා දෙන්න කටයුතු කරනවා.
පොලිසියටත් මෙහි වාසිය ලැබෙනවා. මාලි රාජ්‍යයට බලඇණියක් පිටත් කිරීමට මා ගත් තීරණය ඉතාම හොඳ බව බොහෝ දෙනා කියනවා. තවත් අය එහි ගොස් මුදලක් සොයාගන්න කැමතියි. ඒ නිසා අපට ජාත්‍යන්තර සබඳතා අනුව එක්සත් ජාතීන්ගේ සාම හමුදාව සඳහා සම්පූර්ණ බල සේනාවක්ම ලබාදෙන්න හැකියාව තිබෙනවා. පාබල හමුදාව පමණක් නොව. සන්නද්ධ කාලතුවක්කු ආදී සැමට එහි ගොස් මුදලක් උපයා ගන්න අවස්ථාව ලැබෙනවා.
එක්සත් ජාතික පක්ෂයේ ජාත්‍යන්තර සබඳතා නිසා මේ කටයුතු කළ හැකියි. මේ ආණ්ඩුව ආබාධිත රණවිරුවන් වෙනුවෙන් කළේ කුමක්ද? අප ඔවුන්ගේ විශ්‍රාම වැටුප් ප්‍රශ්නය විසඳනවා. හමුදාවටත් අග්‍රහාර පහසුකම් දෙනවා.
අධිකරණයේ ස්වාධීනත්වය ආරක්ෂා කරන්න මා කටයුතු කරනවා. නතර කළ අතිකාල දීමනා සියල්ල දීම මගේ ප්‍රතිපත්තියයි.යයි ද එක්සත් ජාතික පක්ෂ නායක රනිල් වික්‍රමසිංහ මහතා වැඩිදුරටත් සඳහන් කළේය.
එක්සත් ජාතික පක්ෂ හෝමාගම ආසන සංවිධායක හිටපු පාර්ලිමේන්තු මන්ත්‍රී දයා ගමගේ මහතා,
මේ ආණ්ඩුවට තව දුර යන්න බෑ. කොහොම වුණත් රනිල් වික්‍රමසිංහ මහතාගේ ඔඩොක්කුවට මේ ආණ්ඩුව කඩා වැටෙනවා. අපේ නායක රනිල් වික්‍රමසිංහ මහතා රට කඩා වැටෙන තුරු බලා ඉන්නේ නැහැ.
අතීතයේ පවා කඩාවැටුණු ආර්ථිකය ගොඩගන්නට එතුමා කටයුතු කළා. ප්‍රභාකරන් පවා දුර්වල කර යුද්ධය නිමා කිරීම සඳහා මූලික අඩිතාලම දැමූ දුරදක්නා නුවණින් යුතු නායකයා එතුමා යයි දයා ගමගේ මහතා පැවසීය.
මෙම අවස්ථාවට එක්සත් ජාතික පක්ෂයෙන් කොළඹ දිස්ත්‍රික්කයට තරග කරන අපේක්ෂක අපේක්ෂිකාවන් ඇතුළු පිරිසක් සහභාගී වූහ.
