(ඩයනා උදයංගනී)
සජිත් ප්‍රේමදාස මහතාට එක්සත් ජාතික පක්ෂ නායකත්වය නොලැබුණහොත් විකල්ප ක‍්‍රියාමාර්ගවලට යාමට සිදුවන බව එම පක්ෂ පාර්ලිමේන්තු මන්ත‍්‍රී නලීන් බණ්ඩාර මහතා පැවසීය.
එක්සත් ජාතික පක්ෂ මන්ත‍්‍රී කණ්ඩායම් රැස්වීම හෙට (16) පැවැත්වෙන අතර එහිදී සජිත් ප්‍රේමදාස මහතාට පක්ෂ නායකත්වය ලබාදීමට තීරණයක් ගැනෙනු ඇතැයි බලාපොරොත්තු වන බව ද මන්ත‍්‍රීවරයා සඳහන් කළේය.
ඉදිරි මහ මැතිවරණයේදී සජිත් ප්‍රේමදාස මහතාගේ නායකත්වයෙන් යුත් පුළුල් සන්ධානයකින් තරඟ කළ යුතුය යන්න පක්‍ෂයේ බහුතර මතය බව කී නලීන් බණ්ඩාර මහතා පක්‍ෂයේ නායකයින්ද එම තීරණය ගනු ඇතැයි කීවේය.
දැනටත් එම තීරණය ගැනීම ප‍්‍රමාද වී තිබෙන බව කී මන්ත‍්‍රීවරයා ඉදිරි මහ මැතිවරණයට සූදානම්වීමට නම් කඩිනමින් සජිත් ප්‍රේමදාස මහතාට නායකත්වය දිය යුතු බවත්, වත්මන් රජයේ වැඩපිළිවෙල ගැන ජනතාව කළකිරීමෙන් සිටින නිසා සජිත් ප්‍රේමදාස මහතාගේ නායකත්වයෙන් ඉදිරිපත් වුවහොත් ආසන 113කට වැඩි බහුතර බලයක් ලබාගැනීමේ හැකියාව එක්සත් ජාතික පෙරමුණට තිබෙන බව ද ප‍්‍රකාශ කළේය.
වත්මන් රජයේ ජනාධිපතිවරයා හා අගමැතිවරයා අතර ඇති ගැටුම් නිසා ගෝඨාභය රාජපක්‍ෂ මහතාට අවශ්‍ය රට හදන වැඩපිළිවෙල ක‍්‍රියාත්මක කිරීමට නොහැකි වී ඇතැයි කී නලීන් බණ්ඩාර මහතා ඉදිරි මහ මැතිවරණයේදී ජයග‍්‍රහණය කර ගෝඨාභය රාජපක්‍ෂ මහතාගේ වැඩපිළිවෙල ඉදිරියට ගෙනයාම සදහා සහය ලබාදීම තම පක්‍ෂයේ අරමුණ බව ද පැවසීය.
නලීන් බණ්ඩාර මහතා මේ බව පැවසුවේ කොළඹ, ශ්‍රීමත් මාකස් ප‍්‍රනාන්දු මාවතේ පිහිටි විපක්‍ෂනායක කාර්යාලයේදී අද (15) පැවති මාධ්‍ය හමුවක් අමතමිනි.
( ඡායාරූපය -ශාන්ත රත්නායක)
