(මස්කෙළිය-ගාමිණී බණ්ඩාර ඉලංගන්තිලක)
ශ්‍රී ලංකා නිදහස් පක්ෂය හා ශ්‍රී ලංකා පොදුජන එක්සත් පෙරමුණ පක්ෂ දෙකක් බවත්, ශ්‍රී ලංකා නිදහස් පක්ෂය පසුගිය කාලයේ එක්සත් ජාතික පක්ෂය සමග හිඳිමින් ශ්‍රී ලංකා පොදුජන පෙරමුණ හා එහි නායකයින්ට සහ ඒ අයට අධිකරණ ගානේ ගොස් කරදර කළ බවත්, දැන් එකතුවී එක සංධානයක් හැදුවත් පරණ අතීත සිදුවීම් සම්පූර්ණයෙන් අමතක කරන්නේ නැති බවත් හිටපු රාජ්‍ය අමාත්‍ය හා නුවරඑළිය දිස්ත්‍රික් ශ්‍රී ලංකා පොදුජන පෙරමුණේ අපේක්ෂක එස්.බී.දිසානායක මහතා පැවසීය.
කොත්මලේ නගරයේ අද (18) පැවති ජන හමුවකින් අනතුරුව මාධ්‍යවේදීන්ගේ ප්‍රශ්න වලට පිළිතුරු දෙමින් අමාත්‍යවරයා එසේ පැවසීය.
එහිදී වැඩිදුරටත් අදහස් දක්වමින් දිසානායක මහතා මෙසේද කීය.
“සජිත් ප්‍රේමදාස මහතා දන්නවා... ඉර හඳ වගේ බලයට ඒම කෙසේ වෙතත් හරියට විපක්ෂයවත් හදා ගන්න බෑ කියලා. මැතිවරණ ප්‍රථිපලයත් එක්ක ස්ථීර වශයෙන්ම සජිත්ලා ඉන්නේ ටී.එන්.ඒ. එක හා අනෙක් සුළු ජාතික පක්ෂ වලටත් පිටිපස්සෙන්. විපක්ෂයවත් ඒ අයට ඉතුරු වෙන්නේ නෑ. ඒ අයට ඕන දෙයක් කියන්නත් පුළුවන්. ඕන පොරොන්දුවක් දෙන්නත් පුළුවන්. අඩුම වශයෙන් විපක්ෂයවත් අල්ලගන්න පුළුවන්නම් පොඩි වගකීමක් තියෙනවා කියල හිතෙයි. එහෙමත් බැරි බව ඒ අය දන්නවා. විපක්ෂයේ, පිටුපස මන්ත්‍රීවරයෙන් විදිහට ඉන්න සජිත්ට මොනවද කියන්න බැරි? ඒ නිසා ඒවා පුස් වැකි නිසා අපි කිසිම සැලකිල්ලකටවත් භාජනය කරන්නේ නෑ.
එක්සත් ජාතික පක්ෂයට නව වැඩ පිළිවෙලක් හදන්න ඒ පක්ෂයේ ඉන්න සුළු පිරිසකට ඕනකම තිබ්බත් රනිල් වික්‍රමසිංහ එ.ජා.ප.යේ නායකතුමාට වෙනස් වෙන්න බෑ. ඒක ඇත්තටම එතුමාට තිබෙනව මානසික ප්‍රශ්නයක්. ඒ නිසා එජාපය කවදාවත් අළුත් වැඩපිළිවෙලකට යන්නේ නෑ. අපි පසුගිය මැතිවරණයට ඉදිරිපත් කරපු සෞභාග්‍යයේ දැක්ම වැනි වැඩසටහනක් ගැන මේ අය අධ්‍යයනය කරලත් නෑ. දැන් අකිලලා වගේ අය මේ පරාජය හිසේ තියාගෙනනේ ඉන්නේ. ඒ පක්ෂය දෙකට කැඩිලා විතරක් නොවෙයි පක්ෂයේ 80%ක් සජිත් එක්ක ගිහින්. රනිල් එක්ක ඉතුරු වෙලා ඉන්නේ 20% ක් විතර. අකිල දැන් ඉන්නේ ඒ 20% තියෙන පක්ෂයේ. එන මැතිවරණයේදී සජිත්ලා වගේ අය ආසන 25 ක් විතර ගනිද්දී මේ අයට ආසන 10 කටවත් යන්න අමාරු වෙයි.
මේ පක්ෂය ඉතාමත් අවාසනාවන්ත ඛේදවාචකයට මේ මැතිවරණයෙන් පස්සේ යනවා. ඒ නිසා දැන් ඒ අය ඔහේ දොඩවනවා. ඒ කතා දැක්මක් ඇතිව අධ්‍යනයක් කරලා කියන කතා නොවෙයි.” යැයි එස්.බී.දිසානායක මහතා වැඩිදුරටත් සඳහන් කළේය.
