පෙනෙන නොපෙනෙන ලෝකය
මෙලොව උපන් සියලුම දෙනාම යම් දිනෙක මිය යන්නේය. මරණයෙන් පසුව තවත් ආත්ම භාවයක පරලොව මුල්කරගෙන උප්පත්තිය ලබයි. නමුත් ඒ කුමන හැඩරුව සහිත සත්වයෙක් ලෙසද යන්න කාටනම් කිව හැකිද? නමුත් පුනරුප්පත්තිය සැබෑනම් එය අනිවාර්යයෙන්ම සිදුවේ. තම තමන් කර ඇති පින් දහම් අනුව යමින්, මරණාසන්නයේදී ඇති වූ සිතුවිලි සමුදාය මුල්කරගෙන අපාගතවීම, දිව්‍යතල, බ්‍රහ්මතල ආදී ලෝකතල වලට වැටී දුක හෝ සැප සහිත ආත්ම භාවයන් ලැබෙන බව බුදු දහම උගන්වයි.
තමාගේ සංසාර චක්‍රයේ ලැබෙන ආත්මභාවයන් මිනිස් ඇසට ගෝචර නොවේ. මිනිස් ඇසට නොපෙනෙන දෑ සම්බන්ධව යම් අවස්ථාවල සමහර අයගේ නෙත් අභියස පෙනී සිටි අවස්ථා බොහෝ තිබේ. සමහර නොපෙනෙන බලවේග මැඩ පැවැත්වීම සඳහා අනාදිමත් කාලයක සිට මිනිසා විසින් නිර්මාණය කරගෙන ඇති ගුප්ත විද්‍යා කටයුතු සුලු කොට තැකිය නොහැකිය. මේවා අතර බලිතොවිල් අණවින හූනියම් බන්ධන ආදියත්, යන්ත්‍ර මන්ත්‍ර සහ තන්ත්‍ර විශේෂ කොට සැලකිය හැකිය.
එසේ නම් මෙවැනි ශාස්ත්‍ර කටයුතු පුරාණයේ සිටම පැවත ආවේ මෙම පෘථිවිතලය තුළ යම් ප්‍රමාණයකට නොපෙනෙන බලවේග ක්‍රියාත්මක වී මිනිසාට වින කඨින නිසා විය හැකිය. නොපෙනෙන බලවේග ලොව තුළ හොල්මන් කරන්නේ යැයි පුරාණ ඍෂිවරුන් පවා පිළිගත් කාරණයකි. මෙම පැරණි මන්ත්‍ර ආදී කෘති කල්යල් බලා එක් එක් විෂයන්ට බලැති ඍෂිවරුන් විසින් සම්පාදනය කර ලොවට දායාද කළ බව පැරණි පොත්, පත්, පුවත් පරිශීලනය කිරීමේදී අපූරුවට ඔප්පු වේ. පසුකාලීනව ඒවා මිනිසුන් විසින් නොයෙකුත් භාෂාවලට පරිවර්තනය කිරීමේදී ඒවායේ ඇති වූ අඩුපාඩු නිසා එම ශිල්ප ශාස්ත්‍රය වළපල්ලට ගොස් ඇති බව නොකියාම බැරිය.
ඔහු මුළු ගම් නියම් ගම් සිසාරා අනවින හදි හූනියම් කිරීම පිළිබඳ අතිශූර දස්කම් ඇති ප්‍රසිද්ධ වෙද ඇදුරෙකි. ගමේ ගොඩේ සරල භාෂාවෙන් පැවසිය හොත් පළපුරුදු කට්ටඩියෙකි. ඔහුට යක්කු, ප්‍රේතයෝ පමණක් නොව ගමේ ගොඩේ අහල පහල එදිනෙදා ඇසුරු කරන අයද ඔහුව ඇසුරු කරන්නේ ඉතාම ප්‍රවේශමෙනි. ඒ තරමටම ඔහුට කේන්තියක් ආවොත් කරන ගුප්ත වැඩවලට පිළියමක් නැති හෙයිනි. කට කතාවටද ගම්මුන් පවසන්නේ ළඟින් ගියොත් ඇසක්ද අහිමි වන බවයි. ඒ තරමටම ඔහු ගුප්තය. මොහුගේ පෙනුමද මහා කළු සිංහලයෙක් මෙනි.
මේ අයුරින් කාලය ගෙවී යද්දී තමන් ජීවත්වන ගම් පියසේ සිට ගම් තුනකට මෙපිටින් පිහිටි දුප්පත් ගමකි. ඔවුන්ගේ ජීවනෝපාය සවිකරගත්තේ ගොවිතැන් බත් කිරීමෙනි. ඒ තුළින් උපයා ගන්නා සොච්චම් මුදල එදිනෙදාටද ප්‍රමාණවත් නොවීය. ඒ තරමටම ආර්ථික අහේනිය ඔවුන් පිටුපස එළවමින් පහර දෙන කාලයක් එළඹි තිබුණු බව කිව යුතුමය.
දිනක් එම ගමේ තරමක වියපත් කාන්තාවක් බුලත් හුරුල්ලක්ද රැගෙන කට්ටඩි වෙද මහතා හමුවීමට ආවාය. ඇය ඉතාම බයාදු ආකාරයෙන් බුලත් හුරුල්ලේ කුඩා තුටු පඬුරක් තබා තමන්ගේ නිවසට වී ඇති වින්නැහිය වෙද මහතාට පවසන ලදී. ඒ සියලු විස්තර අසා සිටි කට්ටඩි ඇඳුරා ‘‘ඕකනම් බලගතු යක්ෂ දෝෂයක්, මේක ඉවරයක් කරන්න ටිකක් වියදම් යයි... හ්ම් මම ඊළග සතියේ පළමු කෙම්මුර දිනයේ හැන්දෑ කොරේ එනවා. මෙන්න මේ අඩුව කුඩුම ටික ලෑස්ති කරලා තියපන්, හැබැයි අඩුපාඩුවක් කරන්න එපා. එහෙම උනොත් උන්දෑ එලවන්න ටිකක් කරදර වෙයි.’’ කියමින් තෝත්තරයට අවශ්‍ය සියලුම දෑ ලියා ඇය අත තැබුවේය.
තම ස්වාමි පුරුෂයාට කලක පටන් ඇති වී තිබෙන යක්ෂ දෝෂය නිමා කිරීම සඳහා නොකළ වෙදකමක් නැත. නමුත් සියල්ල ගඟට කැපූ ඉනි මෙන් නිෂ්ඵල ක්‍රියාවක් විය. සියලුම සේසත අවසන් ෙවන තුරු කළ වෙදකම් වලින් පලක් නොවූයේ පෙර කරන ලද පාප කර්මයක් නිසා යැයි අසල්වාසීන්ද නිතර කියනු ඇයට ඇසී ඇත. කෙසේ වෙතත් මෙම ගුප්ත කටයුත්ත නිසා අධික ලෙස තමන්ගේ හරිහම්බ කර ගත්ත දෑ විනාශ වී ඇති මොහොතක මෙම කටයුත්ත සිකුරටම ඉටු කරවා ගැනීමට යුහුසුළු වූයේ තමන්ගේ පවුලේ අගහිඟකම්ද අමතක කරමින්ය. අඩුම කුඩුම ලැයිස්තුවට අනුව සියලුම ද්‍රව්‍ය සම්පාදනය කර ගැනීමට ගමේ හිතවතුන්ගේ සහාය ලබා ගත් ඇය එදා රාත්‍රියට අවශ්‍ය කෑම බීම සෑහෙන ප්‍රමාණයක්ද සපයා ගැනීමටද අමතක නොකළාය.
අදාළ දිනය උදාවූයෙන් සවස් ෙවන්නටත් පෙර යකඳුරා එම නිවස වෙතට පැමිණ වතාවත්වල යෙදී අඩුපාඩු සොයා බලා අතපසු වී ඇති අමතක වී ඇති දෑ පවා ගෙන්වා ගැනීමට කටයුතු කළේය. රාත්‍රී අටට පමණ රෑ කාලයට අවශ්‍ය පිළිහිඩි වලින් තොර ආහාර වේල සම්පායම් වී මෙම කටයුත්ත අලංකරණය කර ගැනීමට අවශ්‍ය රාජකාරියන්හි යෙදීම පිණිස වෙන් වෙන් වශයෙන් ගමේ අහල පහල තරුණ පිරිස් කීපදෙනෙකු හවුල් කර ගැනීමට යුහුසුළු වූයේ ආතුරයාගේ අසනීපය සුව කිරීම පහසු කාර්යයක් නොවන හෙයිනි. මේ ෙවන විටත් ශබ්ද පූජාව පැවැත්වීම සඳහා දවුල් සහ බෙරකරුවන්ද පැමිණ සිටීම නිසා රාත්‍රී දොළහේ කණිසමට පෙර තේවාව පටන් ගැනීමට පහසු කරවන්නක් විය.
ගෙමිදුලේ නිම කර තිබූ මල්පැල්, පහන්පැල් වල පහන් දල්වා ආගමානුකූල ක්‍රියාවන්හි යෙදීමෙන් පසු ආතුරයාව සුදුවතින් සරසවා ගෙන පහන් පැල අසල වාඩි කරවාගෙන පන්දම් එළියෙන් කට්ටකුමංජල් සහ දුම්මල ආලෝකය විහිදුවාගෙන සීමිත ප්‍රදේශයක් පමණක් ඒකාලෝකමත්ව සිටින සේ කටයුතු කරමින් මතුර මතුරා ජප නූලට ගැට දමා ආතුරයාට වැසී ඇති යක්ෂ අධිපතියා ඔහුගේ ශරීර කූඩුව ගෙන්වාගෙන ආරූඪ කරවීමට සමත්වූයේ අසල්වාසීන්ද මවිතයට පත්කරමින්ය. සෑහෙන වේලාවත් බෙරනඳ, සක්නඳ, දවුල් නඳ පතුරවා මුළු ප්‍රදේශයම ගිගුම් දෙද්දී ආතුර ශරීර කූඩුවට වින කඨින යක්ෂයා ආවේශවීමෙන් අඩව් අල්ලන්ට පටන් ගෙන සෑහෙන වේලාවක් නැටවීමෙන් පසු තමනට අවනත කර ගැනීමක් වැනි දෙයක් කර ගත්හ. එයින් පසු ආතුරයාගේ ශරීර කූඩුවට වැසී ඇති මළගිය ප්‍රාණකාරයා සමඟ යම් අත්භූත සංවාදයක යෙදෙන්නට විය.
හ්ම්... හහ් හහ් හා, මේ මාගේ ආතුරයාගේ ප්‍රාණය බිලි ගන්න බලාගෙන ඇවිත් ආරුඪ වී ඉන්නේ කවුද? කථා කරපන්, කථා කරපන්, ඇයි කටවහගෙන ඉන්නේ.
යක්ෂ ආවේශය කිසිම හාවක් හූවක් නැත. තමාගේ ආරක්ෂාවට ළඟ තබාගෙන සිටි ජප කරන ලද වේවැලෙන් පහර කීපයක් ආතුරයාගේ පිට හරහා වැදිණි. ඒත් ආරූඪ යක්ෂයාගෙන් වචනයක් පිටට ගැනීමට නොහැකි විය. දහස් වාරයක් ජප කරන ලද තෙල් හිස ගිල්වා බැලිණි. නමුත් ප්‍රතිඵලයක් නොමැත. මන්ත්‍රයෙන් ජීවන් කර ඇති පොල් මල රැගෙන ආතුරයාගේ හිස පුපුරවා පහර පිට පහර දුන්නේ නරඹන්නන් මවිතයට පත් කරමිනි.
ආතුරයා සිහිමුර්ජා වී බිම ඇද වැටිණි. ජීවං කරන ලද පැන් ඉසීමෙන් ප්‍රකෘති සිහිය ලද පසු ඉහත ප්‍රශ්න කීපය නැවත වරක් කට්ටඩියාගේ මුවින් පිට වුණත් යක්ෂ ආවේශ වූ ආතුරයා කථා කිරීමෙන් වැළකී දත් හපමින් තරහින් පුපුරමින් වෙව්ලන්නට විය. යක්අැඳුරාගේ සීමාව ඉක්මවා ගියේ යක්ෂ ආවේශයේ මුවින් එකදු වචනයක්වත් ගැනීමට නොහැකි වීම නිසයි.
‘‘ඇයි උඹ මට ඔරවන්නේ. දත්මිටි කන්නේ මට ගහන්නද? ආ ගහපත් ගහපන්’’ යැයි පවසමින් ආතුරයාගේ ඉදිරියට පැමිණියත් අවට සිටි ආවතේව තරුණයන්ද කීපදෙනෙක්ද සීරුවෙන් සිටියහ.
‘‘ගනිල්ලා ඔය අඟුරු කබල’’ යක්ඇඳුරාගේ අතට ගිනියම් වූ රත් පැහැයෙන් බබලන ගිනිඅඟුරු කබල ලැබිණි.
‘‘හහ් හහ් හා... උඹ මේ ගිනි අඟුරු කබල අතට ගන්නවාද? නැද්ද’’
‘‘බැහැ, බැහැ මට ගන්න බැහැ’’
‘‘බැරිනම් මේ ප්‍රාණකාරයා අත් හැරලා යනවාද?’’
‘‘නැහැ මම යන්නෙම නැහැ. පුළුවන්නම් මාව එළවපන්.’’
‘‘හ්ම් මේ යකාගේ කට නම් තියෙනවා උජාරුවට. උඹ මේ කබල ගන්නවාද නැද්ද?’’ ‘‘නැහැ’’
අඹ දල්ලක් මෙන් රත්වූ කබල අතට ගන්න තරම් යක්ෂ ආවේෂය සූදානම් නැත. නැවත වෙදා දුම්මල අහුරු කීපයක් අහසට මුදා හැරියේය.
‘‘දැන් උඹ මොකද කියන්නේ.’’
‘‘හරි මම යනවා. මට නරබිල්ලක් ඕනැ’’
‘‘උඹට දෙන්න මෙහේ නරයෝ නැහැ. උබට ඕනනම් සැවුල් බිල්ලක් දෙන්නම්.’’
‘‘මට සැවුල් බිලි එපා මට නරබිල්ලක් අවශ්‍යයි. මට නරබිල්ලක් දෙන්නේ නැත්තම් මම එකට තුනක් ගන්නවා.’’
‘‘අනේ යකෝ උඹ කොහොමද නරබිල්ලක් වෙනුවට නරබිලි තුනක් ගන්නේ’’
‘‘මම ගන්නද?’’
‘‘හ්ම් පුළුවන්නම් ගනින්’’
‘‘හරි මම ගන්නම් පුළුවන්නම් නතර කරපන්.’’
යක්ඇඳුරාටද හරි පුදුමය. තමුන්ගේ කට්ටඩි ජීවිතේ මෙවැනි යක්ෂ දෝෂයකට මුහුණ දී නොමැත. ඒ කෙසේ වෙතත් නරබිලි තුනක් ගැනීමට තරම් බලගතු යක්ෂයෙක් නොවන බව ඇඳුරා තේරුම් ගත්තත් මෙහි යම් ගුප්ත බවක් ගැබ්වී ඇති බව ඔහුට හැඟී ගියේය. තත්පර කීපයකින් ලෙඩා ප්‍රකෘති සිහියට පැමිණියේය. පෙර ජීවත් වූ තත්ත්වයට පත් ෙවනවා යන්නෙන් අදහස් කරන්නේ යක්ෂ දෝෂය තාවකාලිකවම හෝ ඔහුගේ ශරීරයෙන් ඉවතට යෑමයි. වෙදදුරු ජීවිතයේ මොහුට මෙවැනි අත්දැකීමක් ලැබී නැති සෙයක් පෙනෙන්නට තිබුණි.
ආතුරයා ප්‍රකෘති තත්ත්වයට පැමිණීම ගැන උබතෝකෝටික ප්‍රශ්නයකට වෙදඇදුරා මැදිවිය. කෙසේ වෙතත් විනාඩි පහක් වැනි කෙටි කාලයක් තුළදී යක්ෂ ආවේශය ආතුරයාට ආරූඪ විය. ක්ෂණයකින් ආතුරයා සිනා ෙවන්නටත් සතුටින් කථා කරන්නටත් පටන් ගත්තේය.
‘‘ඔන්න වෙදෝ හරි. උඹට මා වෙනුවෙන් එක නරබිල්ලක් දෙන්න බැරි වුණානේ. ඕන්න මම එකට තුනක්ම ගත්තා’’ යැයි කියමින් ආවේශ වූයේය.
‘‘එකට තුනක්ම ගත්තා. උඹ කොහොමද මාව රවටන්නේ. හ්ම් උඹ එකට තුනක්ම නරබිලි ගත්ත නම් මට ඔප්පු කරලා පෙන්නපන්’’ යකඳුරා ගෝරනාඩු කරන්නට විය. ‘‘වෙදෝ උඹට හෙට උදේ බලා ගන්න පුළුවන් වෙයි. මෝරපු තැඹිලි ගෙඩි එකයි, ළපටි තැඹිලි ගෙඩි දෙකයි.’’ නමුත් යක් ඇඳුරාට එම අණ්ඩර දෙමළය තේරුම් ගැනීමට නොහැකි විය.
‘‘හරි අපි හෙට උදේ බලමු. නරබිලි තුනක්ම ගත්තහම දැන් උඹට යන්න පුළුවන්ද?’’
‘‘ඔව් මම පාන්දර දෙකයි පහට මාගේ විමානයට යනවා‘‘
‘‘යකෝ උඹ මට විශ්වාස කරන්න බැහැ. කට ඇරියොත් කියන්නේ බොරු. කෙරුවොත් කරන්නේ බොරු. එම නිසා මට උඹ සාක්ෂියක් පෙන්වන්න ඕනැ.’’
‘‘හරි වෙදෝ මම නපුරු යකෙක්. මා උඹට පාන්දර දෙකයි පහට ඔප්පු කරල මේ නර පණුවාගේ ශරීරයෙන් ඉවත් වෙනවා. මේ ගෙදර ඉදිරිපිට ඇති කිරි ගහේ බටහිරට ඇති අත්ත කඩාගෙනම යන්නම යනවා. ආයිමත් මෙම ශරීරයට වින කරන්නේ නැහැ.’’
‘‘කිරි ගහ කීවේ යකෝ’’
‘‘අනේ වෙදෝ කිරි ගහවත් උඹ දන්නේ නැහැ. මේ අහපන් හෙරළි ගහ, හෙරළි ගහ’’
‘‘ආ යකෝ කොස් ගහ නේද? උඹ එහෙනම් පාන්දර යාමය පසුවන කනිසමේ දෙක පසු වී මිනිත්තු පහට මෙතනින් තොලොන්චි වෙන්න ඕනෑ.’’
පසුදා උදෑසන ආසන්න වෙලාවට සියලුම කටයුතු සැකසිනි. ශබ්ද පූජාව සැවුල් බිලි, හත් මාලුව, ගෙරි මස්, වෙරි පහ, පහන් ආලෝකය, දුම්මල කට්ටකුමංජල් ආදී පූජාත්, පන්දම් ආලෝකයත් ජප මන්ත්‍ර, ස්තෝත්‍ර කියමින් වෙදදුරා ආතුරයාව මායම් කරවන්නට විය. අවට සිටි අාවතේව තරුණයන්වද හදිසි අවශ්‍යතාවයක් ඇති වුවහොත් සහය ලබා ගැනීමට සීරුවෙන් තබන ලදී.
අදාළ වේලාව උදාවන්න විනාඩියකට පෙර සිට වේලාව බලමින් මතුර මතුරා දුම්මල ආලෝකය දසත පතුරුවා හැරීමට කට්ටඩියා කටයුතු කළේය.
හරියටම පසුදා අලුයම දෙකේ කනිසම පසුවී විනාඩි පහ උදා වූවා පමණි. ‘‘ජරාස්’’ යන ශබ්දයෙන් මුළු පළාතම ගිගුම් දුන්නේය. නිවස ඉදිරිපිට ඇති මහ විශාල හෙරලි ගසේ දකුණු අත්ත බිමට පතිත විය. එය තනි මිනිසෙකුට දෑතින් බඳන්නට නොහැකි කොස් අත්තකි. යකදුරා පැවසුවේ මෙම කොස් අත්ත කඩන්නට තරම් යකා කොපමණ හැඩිදැඩි ඉතා බලසම්පන්න එකෙක් දැයි වචනවලින් පැවසිය නොහැකි බවය. ඒත් සමඟ දිගු නින්දකින් ඇහැරුණාක් මෙන් ආතුරයාට ප්‍රකෘති සිහියට පැමිණීමට හැකි විය. පසුදා පහන් ෙවනතුරු කළ තෝත්තරයේ ප්‍රතිඵල ලැබීම ගැන නිවැසියන් සහ ගම්වාසීහුද අසල්වාසීහුද ඉතාම සතුටට පත් වූහ.
විශාල වර්ෂාවක් බිමට පතිත වී නැවතුනාක් මෙන් අවට නිහඬතාවය පැතිරුණේය. ආතුරයාද සිනා මුසු මුහුණින් සිටී. නමුත් ඔහු වෙච්ච සිද්ධිය දන්නේ නැත. කොස් ගසේ කඩා වැටී තිබූ අත්ත දුටු ඔහුටද පුදුම සිතෙන්නට ඇති.
ඉන්පසු යාගයේ අවසන් භාගය පැමිණ ඇති හෙයින් සියලුම දෙනා තුනුරුවන්හි පිහිටුවා උදෑසන ආහාරයද ගෙන තමන්ට ලැබීමට නියමිත අදාළ තුටුපඬුරට අයත් බුලත් හුරුලු සමඟින් මිල මුදල් ඇඳුම් පැලඳුම් කෑම බීම ආදිය සකසනු ලැබූහ. නිවස බලා පිටත්වීම සඳහා සහායක තරුණයෙක් අදාළ නිවසින් ලබා දුනි.
සහායක කොලුවා සමඟ තමාගේ කෙරුවාවන් පවසමින් ඉතාම ආඩම්බරයෙන් ගමන ආරම්භ කර නිවසට ළඟාවිය.
වෙනදා මෙන් නොව නිවස තුළින් හාවක් හූවක් නැත. යකදුරාද, තරමක අවිනිශ්චිතතාවයකින් යුතුව විපරම් කළේය. නිවසේ ප්‍රධාන දොරටුවද විවෘත කර නොමැත. තමා අතැති යතුර ගෙන දොරගුළු විවෘත කළේය. ඇස් අදහාගත නොහැකි කලබැගෑනියක් සිදුවී ඇති බව වැටහුනේය. තම දරු දෙදෙනා සහ බිරිඳ තවම නිදි පැදුරේය. තවදුරටත් පරීක්ෂා කිරීමේදී දැන ගැනීමට ලැබුණේ තිදෙනාම නිදි පැදුරේම මිය ගොස් ඇති බවයි.
පෙරදා රාත්‍රියේ යක්ෂ ආවේශ වූ ආතුරයාගේ මුවින් පිටවූ වදන් පෙළ සමඟ වාදය සිහිවිය. ‘‘මට නර බිල්ලක් දෙන්නේ නැත්තම් මම එකට තුනක්ම ගන්නවා.’’ ‘‘අනේ යකෝ උඹ කොහොමද නර බිල්ලක් වෙනුවට නරබිලි තුනක් ගන්නේ.’’ ‘‘මම ගන්නද?’’ ‘‘හරි පුළුවන්නම් ගනින්.’’ ‘‘හරි මම ගන්නම් පුළුවන් නම් නතර කරපන්.’’ යක්ෂ දිෂ්ඨිය නරබිලි තැඹිලිවලට ආදේශ කළේ ඔහුගේ බිරිඳ සහ දූ දරුවන් බව ඔහුට වැටහෙන්නට වැඩි වේලාවක් ගියේ නැත.
වෙද මහතාගේ ගතින් හීන් දහඩිය මතුවිය. තමන්ට පෙර දිනයේ අතපසු වීමක් සිදුවී ඇති බව සිහියට ආවේය. එය නම් තම නිවස සහ දූ දරුවන් හට අමනුෂ්‍ය බලපෑම් ඇති නොවීම පිණිස පැය හතළිස් අටක කාලයක් නිරුපද්‍රිතව සිටීමට ආරක්ෂක ජප නූල් දමා යාමට අතපසු වීමයි. එසේ ආරක්ෂා කර තමන්ගේ සේවය සැපයීම සඳහා ගියේ නම් මේ වැනි අපරාධයක් සිදු නොවනු ඇත. දැන් ප්‍රමාද වැඩිය. යක්ෂ ආවේශයට අවශ්‍ය දේ සිදු කරගෙන හමාරය.
සුළු ප්‍රමාද දෝෂයක් නිසා ඉතාම අති දක්ෂ යක්ඇඳුරෙකුට තමන්ගේ බිරිඳ ඇතුළු දරු දෙදෙනා අහිමි වී ඇත.
මෙය සිදු වූයේ කෙසේද? භූත ලෝකයෙන් මිනිස් ලොවට ප්‍රබල බලපෑම් එල්ලෙවන බවට මෙය කදිම සාක්ෂියක් හැටියට ගත හැකිය. මෙවැනි ප්‍රබල යක්ෂයින්, ප්‍රේතයින්, භූතයින් පෘථිවි තලය තුළ හොල්මන් කරන බවට තේරුම් ගත යුත්තේ මෙවැනි ක්‍රියාකාරකම් නැතැයි සමාජයට සාක්ෂි සපයන භූතවේදයේ නියැලී සිටින නවීන මනෝ චිකිස්සකයින් බව කිව යුතුමය. එම නිසා මෙවැනි ක්‍රියාකාරකම් මිනිස් සමාජයේ නැතැයි යන නිගමනයට එළැඹෙන්නේ කෙසේද? මිනිස් ලොවත් පරලොවත් අතර සම්බන්ධය ප්‍රලාපයක් යැයි සිතා එය බැහැර කළ හැකිද?
මෙය සත්‍ය සිද්ධියකි. වයඹ පළාතේ කුරුණෑගල දිස්ත්‍රික්කයේ හැටේ දශකයේ මුල් භාගයේදී එවකට ගොවිතැන් බතින් ජීවත් වූ ගම්පියසක සිදු වූ මහත් ආන්දෝලනාත්මක ගුප්ත ප්‍රවෘත්තියක සුල මුලෙහි අවසානයක කථාවකි. එම නිසා මිනිසුන් වන අප මියයන තුරු ගුප්ත බලවේගවලට හසු නොවී මෙම පෘථිවි තලය තුළ ඉතා ප්‍රවේශමෙන් ආගමානුකූලව ජීවත් විය යුතු බව තේරුම් ගත යුතුය.
කුලියාපිටියේ
එස්. ප්‍රබෝධ සමරක්කොඩි
