විපක්ෂ නායක සජිත් ප්‍රේමදාස
බුද්ධිගලනය සිදුවීමට බලපාන අභ්‍යන්තර හා බාහිර හේතුන් සම්බන්ධයෙන් අවධානය යොමු කළ යුතු බව විපක්ෂනායක සජිත් පේමදාස මහතා පෙරේදා (6දා) පාර්ලිමේන්තුවේදී බුද්ධි ගලනය පිළිබඳ විවාදයට එක්වෙමින් පැවසීය.
විරැකියාව, ව්‍යවසායකත්වය සඳහා සුදුසු පරිසරයක් නොමැති වීම, දුර්වල සමාජ ආර්ථික ජීවන තත්ත්වය, වංචාව, දූෂණය, නිදහස නැති වීම, යුක්තිය පසිඳලීමේ ක්‍රියාවන් ක්‍රියාත්මක නොවීම, යුදමය තත්ත්වය, අස්ථාවරත්වය ආදිය අභ්‍යන්තර සාධක ලෙසත් බාහිර සාධක ලෙස විදෙස් රටවල ඇති අඩු නිලධාරීවාදය, ඉහළ වැටුප්, ශිෂ්‍යත්ව, නිවාස සෞඛ්‍ය කේන්ද්‍ර කර ගත් සුබසාධන රාජ්‍ය, දේශපාලන ස්ථාවරත්වය, සාමකාමිත්ව ආදිය දැක්විය හැකි බවත් විපක්ෂ නායක සජිත් ප්‍රේමදාස මහතා වැඩිදුරටත් පැවසීය.
මේ වන විට අප රටේ වෘත්තිකයන් විශාල ප්‍රමාණයක් රට හැර යන බවත් ඒ අතර වෛද්‍ය, ඉංජිනේරු, තොරතුරු තාක්ෂණ, ගණකාධිකාරී, තාක්ෂණ ශිල්පීන් සිටින බවත් එය ඛේදනීය තත්ත්වයක් බවත් ඉරාණය, යේමනය, උතුරු කොරියාව, මියන්මාරය ආදි බුද්ධිගලනය වැඩි රටවල් අතරට අප රටත් කෙමෙන් කෙමෙන් එක්වන බවත් මෙසේ බුද්ධිගලනය සිදුවන අභ්‍යන්තර හා බාහිර සාධක සම්බන්ධයෙන් විද්‍යාත්මක අධ්‍යයනයක් සිදුවිය යුතු වුවත් වත්මන් රජය එවැනි අධ්‍යයනයක් සිදු කිරීමට උත්සාහ කර හෝ නොමැති බවත් විපක්ෂ නායකවරයා පැවසීය.
1974 සිරිමාවෝ බණ්ඩාරනායක මැතිනියගේ සමයේ බුද්ධි ගලනයක් සිදු වුවත් ඒ සම්බන්ධයෙන් වෙනමම කැබිනට් කමිටුවක් ස්ථාපිත කර සොයා බැලූ නමුත් වත්මන් රජය පාර්ලිමේන්තු කමිටුවක් හෝ මේ සම්බන්ධයෙන් ස්ථාපිත කිරිමට කටයුතු නොකළ බවත් විපක්ෂ නායකවරයා පැවසීය.
