උපුල් වික්‍රමසිංහ
මුදල් විශුද්ධිකරණය හා ත්‍රස්තවාදයට මුදල් සැපයීම සම්බන්ධ මූල්‍ය අපරාධවලට අදාළව පවරන නඩු විභාග කිරීම සඳහා වෙනම අධිකරණයක් පිහිටුවිය යුතු බවට, ශ්‍රී ලංකා මහ බැංකුවේ මූල්‍ය බුද්ධි ඒකකය විසින් නිකුත් කරනු ලැබ ඇති වසර 2021 – 2022 සඳහා වන මුදල් විශුද්ධිකරණය හා ත්‍රස්තවාදයට මුදල් සැපයීමේ ජාතික අවදානම ඇගයීමේ වාර්තාව මගින් නිර්දේශ කර තිබේ.
මෙම වාර්තාව මගින් ශ්‍රී ලංකාවේ සිදු වන මුදල් විශුද්ධිකරණ කටයුතු සහ ත්‍රස්තවාදයට මුදල් සැපයීම සම්බන්ධව නිර්මාණය වී ඇති අවදානම් පිළිබඳ විශ්ලේෂණය කර ඇති අතර, ඒ අනුව ශ්‍රී ලංකා රේගුව ආශ්‍රිත මුදල් විශුද්ධිකරණ කටයුතුවල අවදානම ඉහළ මධ්‍යම මට්ටමක පවතින බවද වාර්තාව කියයි.
මුදල් විශුද්ධිකරණයට අදාළ අපරාධ විමර්ශනය කරන විමර්ශන ආයතනවලට ඊට අදාළව දේශීය ආදායම් දෙපාර්තමේන්තුව සතුව ඇති තොරතුරු වෙත ප්‍රවේශ වීම සඳහා ප්‍රමාණවත් තරම් බලතල නොමැති බවද මෙම වාර්තාවෙන් හෙළි කර ඇත. මුදල් විශුද්ධිකරණ කටයුතු පිළිබඳ විමර්ශන පැවැත්වීමට ඒ සම්බන්ධ විශේෂඥ දැනුමක් සහිත විශේෂ ඒකකයක් ශ්‍රී ලංකා පොලීසියේ පිහිටුවිය යුතු යැයි ද මේ වාර්තාවෙන් නිර්දේශ කර තිබේ.
