මාධ්‍ය ආයතන අඩු මිලට ගත් විදේශීය ටෙලි නිර්මාණ විකාශය කිරීමෙන් ලංකාවේ ටෙලිනාට්‍ය ක්ෂේත්‍රය හින්දිකරණයේ සහ කොරියන්කරණයේ ආක්‍රමණයට ලක්ව ඇති බවත් කලාකරුවන් කුලීකරුවන් වී ඇති බවත් ජනතා විමුක්ති පෙරමුණු පාර්ලිමේන්තු මන්ත්‍රී නලින්ද ජයතිස්ස මහතා පැවසීය.

වෙරිටේ රිසර්ච් ආයතනය සංවිධානය කළ කලා ක්ෂේත්‍රයේ අර්බුද සම්බන්ධයෙන් සාකච්ඡාවකට එක්වෙමින් මන්ත්‍රීවරයා ඒ බව පැවසීය.

කලාවේ අරමුණු පසෙකලා ලාභ ඉපයීම පමණක් ඉලක්ක කරගත් ක්ෂේත්‍රයක්, කර්මාන්තයක් බවට ටෙලි නාට්‍ය පත්වී ඇති බවත් ටෙලි නාට්‍යයක එක් කොටසක් වෙනුවෙන් මාධ්‍ය ගෙවන මිල අතිශයින් අවමවීම හේතුවෙන් දක්ෂ නිර්මාණ ශිල්පීන් ක්ෂේත්‍රයෙන් ඉවත් වන බවත් ඒ නිසා ක්ෂේත්‍රයේ විශාල කඩාවැටීමක් ඇතිවී ඇති බවත් මන්ත්‍රීවරයා සඳහන් කළේය.

අවර ගණයේ විදේශීය නිර්මාණ අඩුමිලට ගෙන ඒ හරහා ජනමාධ්‍ය පළමු ඉපයීම සිදුකරන බවත් ඒ හරහා ප්‍රවර්ධනය වන ඉන්දියා සාරිය, සෙරෙප්පුව, මාලය, වළල්ල විකුණන වෙළෙන්දා දෙවැනි ඉපැයීම සිදුකරන බවත් ආක්‍රමණකාරී ටෙලි වසංගතය ජනප්‍රියත්වයේ හිණිපෙත්තටම නංවා ඇති බවත් එම සාකච්ඡාවට එක්වූ ටෙලි නාට්‍ය අධ්‍යක්ෂ අනුරුද්ධ ජයසිංහ මහතා පැවසීය.

සාකච්ඡාව සඳහා පේරාදෙණිය විශ්ව විද්‍යාලයීය ලලිත කලා අධ්‍යනාංශයේ ජ්‍යෙෂ්ඨ කථිකාචාර්ය අතුල සමරකෝන් හා ටෙලි නිර්මාණවේදීන්ගේ සංසදයේ ලේකම් සුරේෂ් අබේසේකර යන අයද එක්ව සිටියහ.