අනාවැකි පළ වුණු අයුරින්ම, බ්‍රිතාන්‍ය මහ මැතිවරණයෙන්, විපක්ෂය වන කම්කරු පක්ෂයට බලය හිමිවනු ඇතැයි පැවැසෙයි. ඒ අනුව කම්කරු පක්ෂයේ නායක කීර් ස්ටාර්මර් බි්‍රතාන්‍යයේ මීළඟ අග්‍රාමාත්‍යවරයා වනු ඇත.

කීර් ස්ටාර්මර් උපන්නේ, 1962 සැප්තැම්බර් 2 වැනිදා සරේ ප්‍රාන්තයේ ඔක්ස්ෆර්ඩ්හිදීය. ස්ටාර්මර්ගේ මව හෙදියකි. පියා යන්ත්‍රෝපකරණ නිර්මාණකරුවෙකි.

ස්ටාර්මර් ‘රෙයිග්‍රෙට් ග්‍රැමර්’ පාසලෙන් අධ්‍යාපනය ලැබුවේය. ඔහු නීතිය හැදෑරුවේ, ‘ලීඩ්ස්’ විශ්ව විද්‍යාලයෙනි. දේශපාලනයට පිවිසීමට පෙර, ස්ටාර්මර් සමාජ අසාධාරණය වෙනුවෙන් නැගී සිටි සහ මානව හිමිකම් වෙනුවෙන් පෙනී සිටි නීතීඥවරයෙක් විය.

නීතීඥවරයෙකු ලෙස ස්ටාර්මර් රාජකාරි ආරම්භ කළේ 1987 දීය.

අග්‍රමාත්‍ය ටෝනි බ්ලෙයාර්, ඇමෙරිකාවට සහාය පළ කරමින්, ඉරාකය ආක්‍රමණය කිරීමට ඇමෙරිකාව සමඟ එක් වෙද්දී, නීති විරෝධී බව පෙන්වා දෙමින් එය වැළැක්වීමට උත්සාහ ගත් නීතීඥවරයකු වන්නේ ද ස්ටාර්මර්ය.

1998 දී ස්ටාර්මර්ට වික්ටෝරියා හමුවිය. ඇය හෙදියකි. දෙදෙනා විවාහ වූයේ 2007 වසරේදීය. යුවළට දරුවෝ දෙදෙනෙක් වෙති. 2008 දී ස්ටාර්මර්, රාජ්‍ය නඩු පැවැරීමේ අධ්‍යක්ෂවරයා ලෙස පත් විය.

ඉහළ පෙළේ නඩු විභාග කීපයක් මෙහෙයවීය. 2014 වසරේ දී බකිංහැම් මාලිගයේදී දෙවැනි එලිසබත් රැජින, ස්ටාර්මර්ට නයිට් පදවියක් ද පිරිනැමුවාය.

ස්ටාර්මර් දේශපාලනයට පිවිසියේ 2015 වසරේදීය. ඒ, හොල්බෝර්න් සහ ශාන්ත පැන්ක්‍රාස් සඳහා මන්ත්‍රීවරයකු ලෙසිනි. කම්කරු පක්ෂයේ ප්‍රධාන තනතුරු කීපයක් හෙබවීමට සමත් විය.

කම්කරු පක්ෂයේ නායකත්වය දැරූ ජෙරමි කෝර්බින් ඉවත් වීමත් සමඟ, පක්ෂ අභ්‍යන්තර ඡන්දයෙන් කීර් ස්ටාර්මර් පක්ෂ නායකත්වයට පත් විය. ‘පක්ෂයට පෙර රට’ යන සංකල්පය මුල්කර ගනිමින්, ස්ටාර්මර් සැමවිටම කටයුතු කරයි.

යුරෝපා සංගමයෙන් බ්‍රිතාන්‍යය ඉවත් වීම සම්බන්ධයෙන් අප්‍රසාදය පළ කර ඇතත්, බ්‍රිතාන්‍යය යළි යුරෝපා සංගමයට එක් නොකරන බව ස්ටාර්මර් පැහැදිලි කර තිබේ. තමන් අග්‍රාමාත්‍ය ධුරයට පත්වුවහොත් මහා බ්‍රිතාන්‍යයේ ස්ථාවර වෙනස්කම් සිදු කිරීමට අපේක්ෂා කරන බව ද පවසා ඇත.

(බීබීසී)