පස් හැවිරිදි දැරියක් පැහැරගෙන ගොස් දින 4 ක් පුරා දුෂණය කළ පුද්ගලයෙකු අත්අඩංගුවට ගැනීමට දිල්ලි පොලිසිය සමත්ව ඇත.

මේ පුද්ගලයාගේ නිවස ළගින් ගිය කිහිප දෙනෙකුට කුඩා දරුවකුගේ කෑගැසීමක් ඇසී විමසා බැලීමේදී දැරිය සොයාගැනීමට හැකිව තිබේ.ඔවුහු වහාම දැරිය රෝහල කරා ගෙන ගියහ.

දිල්ලිහි ස්වාමි දයානාන්ද් රෝහලේ වෛද්‍යවරුන් පවසන පරිදි දැරිය සිටින්නේ ඉතා අවදානම් තත්ත්වයකය.ඇය ජීවත් වනු ඇත්ද යන්න ගැන නිගමනයකට පැමිණිය හැක්කේ තවත් ප්‍රතිකාර කිරීමෙන් පසුව බව  ඔවුහු කියති.දැරියගේ ජනනේන්ද්‍රිය ප්‍රදේශයෙන් බෝතලයක්,ඉටිපන්දම් කිහිපයක්

ශරීරයට ඇතුල් කර තිබී ඇති අතර ඒවා පිටතට ගැනීමට වෛද්‍යවරුන් වෙහෙසෙති.වෛද්‍ය කණ්ඩායම සදහන් කරන ආකාරයට දැරිය අධික වේදනාවෙන් සිටීම නිසා ඇයට ප්‍රතිකාර ලබා දීමද ගැටලූවක් වූ බව පවසයි.‘‘ඇය සිටියේ හොද සිහියෙන් නොවේ‘‘වෛද්‍ය ආර්.කේ බෙන්සාල් කියයි.

දැරියගේ සිරුර පුරා තැලූම් හා තුවාල  ඇත.පැහැරගත් දිනයේ පටන් ඇය පහරකෑම් වලටද ලක්ව ඇති බව පෙනෙන්ට ඇතැයි වෛද්‍යවරුන් පවසයි.

පසුගිය සතිය පුරාම දිල්ලි නගරයෙන් කුඩා දැරියන් දුෂණය කිරීමේ සිද්ධී වාර්තා විය.දිල්ලි වැසියන් අතර මේ වන විට ඇත්තේ නොසන්සුන්තාවයකි.රජය දරුවන්ගේ හා කාන්තාවන්ගේ ආරක්ෂාව තකා පියවර ගත යුතුයැයි ඔවුන්ගේ අදහසයි.පොලිස් නිළධාරීන්ගේ අකාර්යක්ෂමතාව හමුවේ ජනතාව නීතිය තමන් අතට ගැනීමේ දිනය වැඩි ඈතක නොවන බව පෙනෙන්නට තිබේ.

දැරියගේ දෙමව්පියන් දැරිය අතුරුදන් වූ දිනයේම පොලිසියට පැමිණිලි කළ බව කියයි.වෙනත් පිරිසක් විසින් තම දරුවා සොයාගෙන පැමිණිලි කරන තෙක් ඔවුන් නිකම් සිටි බවට දෙමව්පියන් චෝදනා කරයි.දැරිය සොයාගත් තැන පොලිස් නිළධාරියෙක් සිය නිවසට පැමිණ රුපියල් 2000 කොළයක් දිගු කර මේ සිද්ධිය අමතක කර දමන ලෙසත්,දුෂණයක් ලෙස නොසළකන ලෙසත් පැවසූ බව දැරියගේ පියා පවසයි.

මේ චෝදනා දිල්ලි පොලිසිය බැහැර කරයි.ඔත්තුවක් මත සැකකරු අත්අඩංගුවට ගත් බවත් ප්‍රශ්න කිරීමේ කටයුතු සිදුකරගෙන යන බවත් පොලිස් ආරංචි මාර්ග සදහන් කරයි.