භාරත ලක්ෂ්මන් ප්‍රේමචන්ද්‍ර මහතා ඇතුළු සිව් පුද්ගල ඝාතනයේ සැකකරුවන් විසි දෙනාගෙන් නඩු පවරන අය කවුදැයි ලබන පස් වැනිදා දැනුම් දෙන බව රජයේ නීතීඥ මාධව තෙන්නකෝන් මහතා කොළඹ අතිරේක මහේස්ත්‍රාත් ප්‍රසන්න ද අල්විස් මහතාට දැනුම් දුන්නේය.

දැනට සිංගප්පූරුවේ මවුන්ට් එළිසබෙත් රෝහලේ වසරකට ආසන්න කාලයක් ප්‍රතිකාර ලබන පාර්ලිමේන්තු මන්ත්‍රී දුමින්ද සිල්වා ද සැකකරුවෙකි.

තවත් සැකකරුවෝ 19 දෙනෙක් සිටිති. එයින් හත් දෙනෙක් ඇප මත මුදා හරිනු ලැබ සිටිති.

පළාත් පාලන ඡන්දය පැවති 2011 ඔක්තෝබර් 08 දින කොළොන්නාවේදී ප්‍රේමචන්ද්‍ර මහතා ඝාතනයට ලක් වන විට ජනපති වෘත්තීය සමිති උපදේශක වරයෙක් විය.

පැමිණිල්ලේ නීතීඥවරයා මහේස්ත්‍රාත්ට දැන්වූයේ දොන් ලියනගේ සමන් ශාන්ත පෙරේරා නම් සාක්කිකරු නීතිපතිට දිවුරුම් පෙත්සමක් ඉදිරිපත් කරමින් තමන් මුලින් කළ ප්‍රකාශය බලපෑම් මත සිදු කළ නිසා තවත් ප්‍රකාශයක් කිරීමට අවශ්‍ය බව පවසා ඇති බවයි.

ඩී එන් ඒ ජාන තාක්ෂණ වාර්තා කිහිපයක් හැර පැමිණිල්ලේ සියලු වාර්තා ලැබී ඇතැයි ඔහු කීවේය.