ආසියානු කනිෂ්ඨ මලල ක‍්‍රීඩා තරගාවලිය ශ්‍රී ලංකාවේදී පැවැත්වීම සම්බන්ධයෙන් කිසිදු ගැටලූවක් පැන නැගී නැතැයි ක‍්‍රීඩා ඇමැති මහින්දානන්ද අලූත්ගමගේ  මහතා ලංකාදීපයට පැවසීය. ඒ සඳහා දැනටමත් රටවල් 33ක් සහභාගිවීම සනාථ කර ඇති බවත් අවම ක‍්‍රීඩක ක‍්‍රීඩිකාවන් 800 දෙනකු ඒ සඳහා තරග වදින බවත් ඇමැතිවරයා එහිදී පැවසීය. ශ්‍රී ලංකා මලල ක‍්‍රීඩා සංගමය විසුරුවා හැරීමට කටයුතු කිරීමෙන් පසු කොළඹදී ලබන ජූනි 8 වැනිදා ආරම්භ වීමට නියමිත ආසියානු කනිෂ්ඨ මලල ක‍්‍රීඩා තරගාවලිය සංවිධානය කිරීම සම්බන්ධයෙන් ව්‍යාකූල තත්ත්වයක් මතුවී ඇතැයි පළවී ඇති වාර්තා සම්බන්ධයෙන් ලංකාදීපය කළ විමසුමකදී ඇමැතිවරයා එසේ පැවසීය. මෙම තරගාවලියේ සංවිධාන කටයුතු නිරීක්ෂණය කිරීමේ චාරිකාවක් සඳහා ආසියානු මලල ක‍්‍රීඩා සංගමයේ සභාපති මොරිස් නිකලස් මහතා ඊයේ (7) දිවයිනට පැමිණීමට නියමිතව සිටියත් එය හදිසියේ අත්හිටුවනු ලැබීය. ඇමැතිවරයා ‘ලංකාදීප’යට මෙසේද පැවසීය. මේ තරගාවලිය ශ්‍රී ලංකාවේදී යොදාගත් දිනවලට පැවැත්වීම සම්බන්ධයෙන් කිසිදු ගැටලූවක්  පැන නැගී නෑ. මලල ක‍්‍රීඩා සංගමයට වැඩිය හොඳට එය කරන්න ක‍්‍රීඩා අමාත්‍යාංශය සූදානම් වන බව නම් කියන්න පුළුවන්. මලල ක‍්‍රීඩා සංගමයේ හිටපු බලධාරීන් ඉවත්ව යන කොටත් ඒ සඳහා සත පහක්වත් හොයලා තිබ්බේ නෑ. ඔවුන් කියලා තිබ්බේ ක‍්‍රීඩා අමාත්‍යාංශයට මිලියන 12ක් දෙන්න. ඉතිරිය ඒ අය සොයා ගන්නම් කියලා. ආසියානු මලල ක‍්‍රීඩා සංගමයේ අපේ කැමැත්ත විමසීමෙන් පස්සේ ශ්‍රී ලංකාවේ සංචාරය ලබන මැයි මාසය දක්වා කල්දමා ගෙන තිබෙනවා. ඒ සම්බන්ධයෙන් කිසිම ගැටලූවක් පැන නැගී නෑ. තරගාවලියේ වියදම් සඳහා රුපියල් මිලියන 75ක් විතර යනවා. ඒක හොයා ගන්න ක‍්‍රීඩා අමාත්‍යාංශය පෞද්ගලික අනුග‍්‍රාහකයන්ගේ සහයෝගය ලබා ගන්නවා. මේ අතර මලල ක‍්‍රීඩා සංගමය ඉදිරියේ යොදාගත් පරිදි දේශීය තරගාවලි පවත්වන බවත් මලල ක‍්‍රීඩා සංගම් මූලස්ථානයේ සේවය කරන සේවක සේවිකාවන් කීප දෙනාට ක‍්‍රීඩා අමාත්‍යාංශයෙන් අඛණ්ඩව වැටුප් ගෙවන බවත් ක‍්‍රීඩා ඇමැති  මහින්දානන්ද අලූත්ගමගේ මහතා වැඩිදුරටත් පැවසීය.