දැල්පන්දු ක‍්‍රීඩාවේ පැවැත්ම උදෙසා විනය කඩකර හසුවන ක‍්‍රීඩිකාවන්ට දැඩි දඬුවම් ලබාදීමට තමා පසුබට නොවන බව ක‍්‍රීඩා ඇමැති මහින්දානන්ද අලූත්ගමගේ මහතා පැවැසීය. කොළඹදී පැවැති මාධ්‍ය හමුවකදී අදහස් දැක්වූ ඇමැතිවරයා ජාතික දැල්පන්දු සංචිතයේ ක‍්‍රීඩිකාවන් පිරිසකට මීට පෙර අවස්ථාවකදී විනය කඩ කිරීමේ චෝදනා එල්ල වූ බවත් ඔවුන් සංචිතයෙන් නෙරපා දැමීමට තමා කටයුතු කළ බවත් පැවැසීය. විදෙස් තරග සංචාර අවස්ථාවකදී ශ්‍රී ලංකා දැල්පන්දු කණ්ඩායමේ නායිකාවට කණ්ඩායමේ ක‍්‍රීඩිකාවන් කිහිපදෙනෙකු පහරදුන් බවට වාර්තාවුවත් එම සිදුවීම කළමනාකරු වාර්තාවේ සඳහන් වී නොමැති බවට මාධ්‍යවේදීන් මතු කළ ප‍්‍රශ්නයකට පිළිතුරු දෙමින් ක‍්‍රීඩා ඇමැතිවරයා මෙසේ පැවසීය. ”දැල්පන්දු සංචිතයේ සමහර ක‍්‍රීඩිකාවන්ගේ විනය විරෝධී හැසිරීම් මීට පෙරත් මට වාර්තාවුණා. ඒ ගැන කණ්ඩායමේ බලධාරීන් සමගත් මම සාකච්ඡා කළා. මේ ක‍්‍රීඩිකාවන් ගැන මට ආරංචි වූ සමහර දේවල් ප‍්‍රසිද්ධියේ කියන්නත් බැ. නමුත් ඒ විනය කඩකරපු එකම ක‍්‍රීඩිකාවක්වත් සංචිතයේ දැන් නෑ. ඔවුන් සංචිතයෙන් අයින් කරලා දාන්න මා කටයුතු කළා.” එහිදී ඇමැතිවරයා වැඩිදුරටත් පැවැසුවේ මේ වසරේදී දැල්පන්දු ක‍්‍රීඩාවේ සංවර්ධනයට ක‍්‍රීඩා අමාත්‍යාංශය අතහිතදීමට සූදානම් බවයි. ශ්‍රී ලංකාවට අන්තර් ජාතික පදක්කම් දිනා ගත හැකිවේ යයි විශ්වාස කරන ක‍්‍රීඩා ඉසව් අතර දැල්පන්දු ක‍්‍රීඩාවත් හඳුනා ගෙන තිබෙන බව ඇමැතිවරයා පැවැසීය. ක‍්‍රීඩක ක‍්‍රීඩිකාවන්ට විතරක් නොවේ වැරදි කළ නිලධාරීන් හතර දෙනකුටත් අපි දඬුවම් කළා. ඔවුන් කවුද කියලා ප‍්‍රසිද්ධියේ නම් කරන්න මා කැමැති නෑ. මේ සියලූ ක‍්‍රියාමාර්ග ගත්තේ ක‍්‍රීඩාවේ යහපත ගැනම හිතල බව මා කියන්න කැමැතියි.