‍ෙගමන් කරන ලොරියකින් කොළඹ ලිෆ්ටන් වටරවුමේදී උම්බලකඩ පෙට්ටියක් සොරකම් කළ බව කියන ත්‍රිරෝද රථ රියදුරකු අල්ලා දීමට කොළඹ මහාධිකරණ විනිසුරු ප්‍රීති පද්මන් සූරසේන මහතාට හැකි විය. වාහන තදබදයක් නිසා විනිසුරුතුමා ගමන් කළ රිය මදකට නතර වෙද්දී ඉදිරිපස වූ ත්‍රිරෝද රථයට ලොරියකින් පෙට්ටියක් පටවනු විනිසුරුතුමා දැක ඇත. ඔහු තම පොලිස් නිලධාරීන්ට ඒ බව දැන්වීය. එහෙත් සැකකරු දිවුවේය. ආරක්ෂක නිළධරයා ඔහු ලුහුබැද ගොස් අල්ලා ගත්තේය. උම්බලකඩද ත්‍රිරෝද රථයේ තිබිණි. ත්‍රිරෝද රථ රියැදුරා සහ හොර බඩු කුරුඳුවත්ත පොලිසිය බාර දුන්නේය. උම්බලකඩ වල වටිනාකම රුපියල් 13580කි.කිරුලපොනේ ත්‍රිරෝද රථ රියැදුරු අශෝක රුක්ෂාන් අබේවර්ධන ලබන 18 දැක්වා රිමාන්ඩ් කරන ලෙස කොළඹ ප්‍රධාන මහේස්ත්‍රාත් රශ්මි සිංගප්පුලි මහතා නියෝග කෙළේය. ත්‍රිරෝද රථ රියැදුරා වෙනුවෙන් පෙනී සිටි නීතිඥවරයා උසාවියට පැවැසූයේ ත්‍රිරෝද රථ රියැදුරා අහිංසක බවයි. වෙනත් අයකු උම්බලකඩ පෙට්ටිය සොරකම් කළ බව ද ඔහු කීවේය.