(බිමල් ශ්‍යාමන් ජයසිංහ)

ග්‍රෑන්ඩ්පාස් ධනවත් ව්‍යාපාරිකයකු  පැහැරගෙන ගොස් මරණීය තර්ජනය කරමින් රුපියල් ලක්ෂ 70ක කප්පම් මුදලක් ලබා ගත් සිව් දෙනකුගෙන් යුත් කල්ලියක් අත්අඩංගුවට ගත් බව ග්‍රෑන්ඩ්පාස් පොලිසිය කියයි.

කප්පම් වශයෙන් ලබාගත් ලක්ෂ 70 ක මුදල හා එම පැහැර ගැනීමට කුලී පදනම මත ලබා ගත් වෑන් රථය ද පොලිස් බාරයට ගෙන ඇත.

ව්‍යාපාරිකයා ඉකුත් 10 වැනිදින  ආගමික වතාවත් ඉටු කිරීම සඳහා ග්‍රෑන්ඩ්පාස් ප්‍රදේශයේ පල්ලියක් වෙත යතුරුපැදියකින් යමින් සිටියදී සැකකරුවන් වෑන් රථයකින් පැමිණ මඟ හරස් කර ඔහු ඒවා වෑන් රථයට දමාගෙන අතපය සහ මූණ ගැටගසා නිවසකට රැගෙන ගොස් මරණීය තර්ජනය කරමින් කප්පම් ලක්ෂ 90 ක මුදලක් ඉල්ලා තිබූ බව පොලිසිය කියයි.

පැහැර ගැනීමට ලක් වූ ව්‍යාපාරිකයා මිතුරකුට ඒ බව පවසා රුපියල් ලක්ෂ 70 ක මුදලක් කප්පම් කරුවන්ට ලබා දීමෙන් අනතුරුව ඔහු නිදහස් කර තිබූ බව පොලිසිය කියයි.

අනතුරුව ග්‍රෑන්ඩ්පාස් පොලිසියට ලද පැමිණිල්ලක් අනුව සීසීටීවී දර්ශන ඔස්සේ සිදුකළ විමර්ශනවලදී එම වෑන් රථය පයාගල ප්‍රදේශයේ පුද්ගලයකුට අයත් එකක් බවට අනාවරණය වීමෙන් අනතුරුව එම පුද්ගලයාගෙන් සිදු කළ ප්‍රශ්න කිරීමේදී ඔහු මාකොළ ප්‍රදේශයේ කුලී පදනම මත වාහන ලබා දෙන ස්ථානයකට වෑන් රථය ලබාදී ඇති බවට අනාවරණය වූ බව පොලිසිය කියයි.

අනතුරුව එම ස්ථානයට ගොස් ඒ පිළිබඳ විමසීමේ දී ඔහු මාවරමංඩිය ප්‍රදේශයේ පුද්ගලයකුට එම වෑන් රථය කුලී පදනම මත ලබා දුන් බවත් එම පුද්ගලයාද කිරිබත්ගොඩ ප්‍රදේශයේ පුද්ගලයකුට ලබාදුන් බවට අනාවරණය වීමෙන් අනතුරුව කිරිබත්ගොඩ පුද්ගලයාගෙන් සිදු කළ ප්‍රශ්න කිරීමේදී වෑන් රථය රැගෙන ගිය පුද්ගලයන් පිළිබඳ තොරතුරු අනාවරණ වූ බව පොලිස් නිලධාරියෙක් පැවැසීය.

ඒ අනුව එම සැකකරුවන් සිව්දෙනා වත්තල මීගමු පාරේ නිවසක දී අත්අඩංගුවට ගත් බව පොලිසිය කියයි.

සැකකරුවන් අතර අන්තර්ජාලය හරහා ව්‍යාපාර කටයුතු කරන පුද්ගලයන් දෙදෙනකු සහ තීරෝද රථ රියැදුරන් දෙදෙනකු ද වන බවත් ඔහුන් මට්ටක්කුලිය මරදාන හා වත්තල පදිංචි පදිංචිකරුවන් බවත් අනාවරණය වූ බව පොලිසිය කියයි.